Премиерот Заев на средба со членовите на ДИК

Зголемена транспарентност и ефикасност на ДИК ја оправдува довербата за организирање фер и демократски избори, било речено на средбата.

Претседателот на Владата на Република Македонија Зоран Заев, придружуван од Генералниот секретар на Владата, Драги Рашковски, денеска, се сретна со членовите на Државната изборна комисија (ДИК), предводени од нејзиниот претседател Оливер Деркоски.

Според соопштението од Владата, на средбата, се разговараше за тековни прашања поврзани со подготовките на сите потребни услови за успешна реализација на претстојните претседателски избори и предвремени локални избори во трите општини, Дебар, Охрид и Ново Село.

„Владата дава принципиелна поддршка, согласно законските овластувања, да обезбеди реализација на законските потреби на Државната изборна комисија, затоа што организирани слободни и фер избори се врвна демократска придобивка,  се јакне демократијата и се отстрануваат сомнежи за какви било нерегуларности“, рече премиерот Зоран Заев на средбата со членовите на ДИК.

Претседателот на ДИК, Деркоски и членовите на Комисијата посочија дека таа работи професионално и го информираа премиерот Заев за преземени активности, меѓу кои активна и ефикасна едукација на членовите на Избирачките одбори, како и на Општинските изборни комисии со цел навремено, достоинствено и целосно да одговорат на законските обврски пред граѓаните.

„Максимално сме посветени, со зголемен интензитет на ангажирање на луѓе и логистика, согласно законските прописи, да ги оствариме приоритетите и целите за реализација на фер и демократски избори“, нагласи претседателот на ДИК,  Деркоски. 

На работната средба, сите учесници се согласија дека одржувањето на избори е тест за политичката зрелост на државата и изразија подготвеност и посветеност за максимална транспарентност, почит и кредибилитет на претстојните претседателски избори и локални избори во три града во државата. 

Мицкоски: Наскоро ќе се знае коалицијата со која ќе настапи ВМРО-ДПМНЕ на изборите

 Многу скоро јавноста ќе го дознае составот на коалицијата со која ВМРО-ДПМНЕ ќе излезе на изборите, соопшти денеска лидерот на партијата Христијан Мицкоски.

Пред средбата со компаниите – членки на Стопанската комора Македонија – Турција (МАТТО), Мицкоски, одговарајќи на новинарски прашања, ги повика граѓаните да се придружат на вечерашниот протест од пред судот, што го организира ВМРО-ДПМНЕ. Тој упати апел и до сите политички партии кои, како што рече, беа гласни за ветинг и промени во судството, вечер на протестот да застанат до ВМРО-ДПМНЕ и заеднички да побараат „неправдата што се случува во државата, еднаш засекогаш да престане, да не се дозволи политичките конвертити од сваровски во Луј Витон судството да диктираат какви ќе бидат судските одлуки и пресуди".

Тој им посака на СДСМ и движењето БЕСА да се договорат за коалицијата и да излезат заедно на изборите.

– Секој ден ме прашувате за коалицирањето. Не би сакал да зборувам со кого конкретно сме во преговори и разговори. Кога ќе има промена на дневна основа, ќе ја известиме јавноста. Преговараме со многу политички партии. Но, за нас е најважно тоа што на 12 април, несомнено и недвојбено, ќе се случи најголемата историска победничка коалиција од осамостојувањето на Македонија, а тоа е победата на коалицијата „Обнова на Македонија". Постизборно, потоа, можеме да преговараме и разговараме со сите политички партии, напомена Мицковски.

Тој дополни и дека имал средби со сите политички лидери, вклучувајќи го и Билал Касами.

– Логично е што сме разговарале со Касами. Сме разговарале во тој момент за она што не чини во државата. Гледам дека сега разговараат со СДСМ, претпоставувам што чини и дека блескаме. Им посакувам конечно да се договорат, среќа и успеси на изборите. За нас е најважно да имаме фер и демократски избори на 12 април, но сега индициите се се, само не дека изборите ќе бидат фер и демократски, потенцира лидерот на ВМРО-ДПМНЕ.

Во врска со вечерашниот протест, тој повика граѓаните да заборават на политичката боја и партиската припадност.

– Живееме во време кога деспотизмот е на својот врв. Гледаме и слушаме како се нарачуваат судии и судски одлуки и тоа не од кој било, туку зборуваме за Врховниот суд. Гледаме како се управувале и манипулираат специјални јавни обвинители. Ќе ве потсетам, тој ист специјален обвинител мене ме уценуваше во минатото да соработувам за да го одмрзне имотот на политичката партија. Влегуваме во избори, имаме помалку од педесетина дена, имотот на ВМРО-ДПМНЕ е се уште замрзнат и ние практично, влегуваме на овие избори силно мотивирани да покажеме дека и без тоа, извесна и огромна е победата, истакна Мицковски, одговарајќи на новинарски прашања.

Одбележани 76 години од загинувањето на Кузман Јосифовски – Питу

Претставници на Сојузот на борци, здруженија на пензионери, политички партии и граѓански организации, денеска пред спомен обележјето во Козле одбележа 76 години од загинувањето на народниот херој Кузман Јосифовски – Питу.

Пред присутните се обрати градоначалникот на Општина Карпош Стефан Богоев.

– Драго ми е што за делото на Кузман се изучува постојано. Затоа што патриотизам е да се сеќаваш и да го вреднуваш минатото, но и да одиш напред. Ако народните херои се бореле за наша слобода и независност, денеска, нашиот влог е во развивањето и напредокот на државата, а за нас денес тоа е Македонија како членка на НАТО и на Европската унија и младина која добива шанса за просперитет тука, во сопствената држава. Тоа се генерациите кои ќе се карактеризираат со космополитски дух и отвореност, а нема да тонат во сиромаштија и популизам, рече Богоев.

Пред граѓаните говореше и претседателката на Советот на Град Скопје, Љубица Јанчева. Таа се осврна на животот на Кузман, кажувајќи дека иако живеел само 29 години, со својата мисија и делување, оставил аманет за многу сегашни и идни генерации.

Младите учат и го почитуваат ликот и делото на народниот херој. Потврда за ова беа литературните читања од

Ученици од реонското училиште „Владо Тасевски", пак, преку читање стихотворби и раскази потсетија на вредностите за кои се залагал народниот херој: борбеност, слобода, и правда.

Во знак на сеќавање, делегации од сите институции и организации, положија цвеќе пред спомен обележјето на Кузман Јосифовски – Питу.

Спасовски – Дефа: Земјата напредува, фокус кон имплементација на реформите за ефикасни резултати

Заеднички е ставот дека во системот на одлучување е потребно поедноставување на процедурите и функционирање на носителите на работни позиции на база на добри проценки за компетенциите на ангажираните кадри.

Државата напредува, било оценето на денешната средба на претседателот на Владата, Оливер Спасовски со Валтер Дефа, посебен советник за економија на премиерот, назначен директно од германската канцеларка Ангела Меркел, при што се поздравени направените реформи и определбата за видливи промени во делот на имплементацијата.

На состанокот, како што соопшти владиниот Сектор за односи со јавноста, било изразено и задоволство за определбата на премиерот, на Кабинетот на премиерот и на Владата за воспоставувањето Централна единица за мониторинг во Канцеларијата на претседателот на Владата, со цел поефикасна испорака на резултати во делот на клучните економски реформи. Најавена е активна помош и поддршка од страна на германскиот советник и неговиот тим.

Констатирана била и заедничката важност од ефикасно воспоставен мерит систем, со фер шанси за сите.

– Заеднички е ставот дека во системот на одлучување е потребно поедноставување на процедурите и функционирање на носителите на работни позиции на база на добри проценки за компетенциите на ангажираните кадри, како и преземање одговорност за носењето брзи и квалитетни одлуки, стои во соопштението.

Премиерот Спасовски изразил благодарност за големата помош и поддршка од германскиот советник Дефа, како и од Германија во процесот на евроатлантските интеграции и во делот на економските политики, значајни за квалитетот на живот на луѓето.

– Имаме напредок во сите области и во економијата, но силно сме определени кон примена на праксите што даваат брзи и квалитетни резултати. Покажавме континуитет на реформските процеси. Во периодот што претстои се фокусираме на значителни, позитивни, видливи промени во делот на имплементацијата на законите, усвоени по европски стандарди. Тоа носи резултати во квалитетот на испорака на услугите од институциите кон граѓаните и во квалитетот на живот на граѓаните, рекол премиерот Спасовски.

На состанокот е договорено да продолжи продуктивната соработка со германскиот советник Дефа и неговиот тим и во делот на иновациските политики и паметната специјализација, како области на модерното време, атрактивни за работа за младите луѓе, а преку коишто е возможна ефикасна имплементација на реформите во сите области значајни за граѓаните. 

притисни ентер