Македонија

ССМ ги повикува работниците на протест по повод Меѓународниот ден на трудот 1 Мај

Сојузот на синдикатите на Македонија организира протест по повод Меѓународниот ден на трудот 1 мај.

Претседателот на ССМ Слободан Трендафилов во отворено писмо до јавноста посочува дека работничкото движење во Македонија е исправено пред сериозен предизвик поради, како што наведува, односот на креаторите на политиките кои покажаа дека водат грижа исклучиво за себе и за своите интереси, а не водат грижа за работниците, работничките права и работничките интереси.

- Денеска, работниците во Македонија се соочуваат со се поголем притисок за нивната егзистенција поради високите трошоци за живот и ниските плати. Синдикатите покажаа дека можат напорно да работат во интерес на нивните членови и во интерес на работниците. Синдикатите покажаа дека секој сам може да постигне резултат, но имаме можност сплотени да покажеме одлучност во работничката борба, онака како што вашите и нашите членови очекуваат и онака како што работниците очекуваат од нас, наведува тој во писмото повикувајќи го членството на протест.

Трендафилов посочува дека на 1 мај работниците имаат можност и шанса да покажат дека се незадоволни и дека сите тие кои претендираат да ја водат државата треба да го слушнат гласот на работниците.

-Имаме можност да го покажеме нашето, работничкото незадоволство и заедно да излеземе на голем работнички протест на 1 Мај, особено поради можноста, пораките, нашите и работничките барања да ги упатиме на неколку денови пред парламентарните избори до сите тие кои претендираат да ја водат Државата. Како Претседател на Сојузот на синдикатите на Македонија ве замолувам да покажеме одлучност во борбата, борбата која е заедничка, за подобро утре и за подобри работнички права, наведува Трендафилов.

На протестот очекува на ССМ да му се придружат и членови на други синдикати и граѓани.

На Меѓународниот ден на трудот - 1 Мај, протестот ќе започне во 11 часот од пред Работничкиот дом до Собрание - Стопанска комора - Влада.

Регион

Радев: Многу наскоро ќе стане јасно дали Република Македонија сака да оди во Европа

- Многу брзо ќе стане јасно дали таа земја сака да оди кон Европа. Мојот став во однос на Република Македонија секогаш бил отворен и конзистентен, како што беше со претседателите Ѓоѓе Иванов и Стево Пендаровски, така ќе биде и со Гордана Силјановска.

Бугарскиот претседател Румен Радев денеска изјави дека наскоро ќе стане јасно дали новиот претседател и партијата што победи со значителна разлика на изборите во Република Македонија ќе работат за европската перспектива на земјата или ќе одат во друга насока.

Како што пренесе БТА, тој ова го изјави откако заедно со бугарската потпретседателка Илијана Јотова положија цвеќе пред споменикот на Непознатиот воин по повод 9 мај.

- Многу брзо ќе стане јасно дали таа земја сака да оди кон Европа. Мојот став во однос на Република Македонија секогаш бил отворен и конзистентен, како што беше со претседателите Ѓоѓе Иванов и Стево Пендаровски, така ќе биде и со Гордана Силјановска, изјави Радев.

Бугарскиот претседател рече дека отсекогаш ја поддржувал европската интеграција на Република Македонија, „но со почитување на принципите на добрососедство и особено Копенхашките критериуми за членство“. Според него, тоа значи „промена на Уставот и почитување на правата на македонските Бугари“.

- Откажување од јазикот на омразата што беснееше во оваа изборна кампања, ревизија на учебниците, почитување и заштита на бугарското културно и историско наследство на Бугарите во земјата, ја пренесува БТА изјавата на Радев.

Фудбал

Винисиус: Сплотеноста е клучот за успехот на Реал

Бразилскиот напаѓач на Реал Мадрид, Винисиус, по синоќешниот пласман во финалето во Лигата на шампиони оцени дека успесите на Кралскиот клуб на европската сцена се должат на кохезијата и посветеноста на фудбалерите и навивачите.

Реал се пласираше во финалето на „Вембли“ по драматичен пресврт на реванш полуфиналниот натпревар против Баерн, елиминирајќи го германскиот гигант со два гола во самата завршница (2-1) на дуелот на „Сантијаго Бернабеу“.

„Кога играме дома, имаме чувство дека ништо не е невозможно. Тоа се должи на сплотеноста на нашата група и тоа ја прави разликата со другите тимови“, изјави Винисиус по натпреварот.

„Горд сум на сите. Горд сум што имам можност да играм на овој стадион и да доживеам вакви ноќи. Ова е Реал Мадрид – не се откажуваме против никого. Секогаш напаѓаме сè повеќе и повеќе трофеи. Нашите навивачи се исти како нас. Горд сум што го носам овој дрес“, рече Винисиус.

Реал со 14 европски титули е рекордер, а шанса да ја освои 15 титула ќе има на 1 јуни на „Вембли“ во Лондон во финалето во кое за противник ќе ја има Борусија Дортмунд.