Тенис

Надал можеби за последен пат ќе учествува на престижниот Лејвер Куп

Шпанскиот тенисер Рафаел Надал потврди дека годинава ќе учествува на престижниот Лејвер куп во Берлин и дека ќе биде дел од „Тим Европа“ од 20 до 22 септември.

Надал во тимот ќе биде заедно со Карлос Алкараз, Данило Медведев и Александар Зверев, а интересно е што капитен на овој тим ќе биде легендарниот Бјорн Борг.

Шпанецот веќе навести дека 2024 година може да му биде последна во кариерата, а на теренот се врати минатата недела во Барселона.

Ова ќе биде четврти пат Надал да учествува на престижниот Лејвер куп, откако претходно настапи во 2017 година во Прага, две години подоцна во Женева, како и на збогувањето на Роџер Федерер со тенисот во 2022 година во Лондон.

- Многу сум среќен што ќе го играм Лејвер купот во Берлин за Тим Европа. Имам некои посебни спомени од ова натпреварување, вклучувајќи ги и емоциите од пред две години кога последен пат играв со Роџер во Лондон. Во овој момент од мојата кариера, навистина сакам да ја искористам секоја можност што ќе ми се укаже. Играњето во тим е секогаш неверојатно искуство и уживам во тоа, поинаку е и се надевам дека во Берлин ќе му помогнам на Тим Европа повторно да го освои Лејвер купот - изјави Надал.

Борг е среќен и што Надал ќе игра за „Тим Европа“ на Лејвер купот.

- Рафа е вистинска легенда на нашиот спорт, вистински шампион во секоја смисла на зборот. Ова е мојата последна година како капитен. Тоа што оваа година е во Тим Европа беше моја цел и среќен сум што ја прифати мојата покана и што ќе биде во Берлин - изјави Борг.

Македонија

Истражителка на ОЈО Скопје за компјутерски криминал со меѓународно признание од ИЛЕА

Меѓународната академија за спроведување на законот (ИЛЕА) во Будумпешта додели признание за работата и постигнувањата на Марина Пешовска, истражителка за компјутерски криминал од Истражниот центар на Основното јавно обвинителство Скопје.

Пешовска беше избрана како финалист во категоријата “оперативен успех” поради успешна примена на вештините за дигитална форензика во борбата против локалниот и транснационалниот сајбер-криминал.

Успехот на Истражниот центар го истакна и Амбасадата на САД во Скопје. “Американската амбасада е горд партнер на Основното јавно обвинителство Скопје во неговата борба против компјутерскиот криминал и промоцијата на одговорноста”, објави Амбасадата на САД во Скопје за признанието од ИЛЕА.

Пешовска е еден од 17-те истражители во Истражниот центар на ОЈО Скопје.

Истражниот центар е своевидно јадро на обвинителството и бројот на предмети во кои постапувале истражителите за една година е практично речиси удвоен – од 150 предмети во 2022 на над 280 предмети во текот на 2023 година. Истражителите самостојно преземаат голем број различни дејствија – прибирање документација, барања до институции, учествуваат при претреси и лишување од слобода на лица, а се ангажирани и во дејствија на меѓународна соработка со истражни органи од други земји.

Најголем дел од опремата за Истражниот центар на ОЈО Скопје е донација од Амбасадата на САД, соопштија од Обвинителството.

Свет

Данска ќе им дозволи абортус на малолетни девојчиња без согласност од родителите

Данската влада денеска соопшти дека жените во оваа скандинавска земја ќе имаат право да изберат да ја прекинат бременоста до крајот на 18-та недела од бременоста.

Досега границата за абортус во Данска беше 12 недели.

Данската министерка за внатрешни работи и здравство, Софи Лоде, рече дека „нема медицински докази за сегашната граница, а исто така нема ништо што сугерира дека ќе има значително повеќе абортуси или дека тие ќе бидат извршени многу подоцна ако ја подигнеме границата“.

Измената на законот треба да стапи на сила кон средината на 2025 година. Дополнително, на девојчињата на возраст од 15 до 17 години им се дава слобода да абортираат без родителска согласност или одобрение од специјалистичка комисија.

Данска беше една од првите западноевропски земји што на жените им даде право на абортус по сопствен избор.

Од 1973 година, бремените жени кои живеат во Данска можат да абортираат до крајот на 12-та недела без потреба да наведат причина и без надоместок на трошоците.

И после тоа, абортуси се можни под одредени услови, но потребно е одобрение од комисијата за абортус.

Технологија

Германска компанија лансира во вселената ракета на парафински погон (ВИДЕО)

Германската компанија HyImpulse денеска успешно лансираше ракета напојувана со парафински восок која ќе може да носи комерцијални сателити.

„Ја покажуваме силата на Германија како вселенска нација и го прошируваме пристапот на Европа до вселената“, објави шефот на компанијата Марио Кобалд.

Дванаесет метри долгата и 2,5 тони тешка ракета наречена SR75 беше лансирана околу 5 часот по европско време од Куниба, Австралија.

Може да носи помали сателити со тежина до 250 килограми до височина до 250 километри, а може да работи на парафински восок или течен кислород.

Парафинскиот восок се користи како поевтино и побезбедно алтернативно ракетно гориво. HyImpulse тврди дека заштедиле до 50 проценти.

Германската компанија со околу 65 вработени објави дека веќе добила преднарачки за лансирање на сателити во вредност од над 100 милиони евра.

HyImpulse сака да го прошири својот бизнис бидејќи расте побарувачката за транспорт на комерцијални сателити, па до 2032 година сака да оствари приходи од 700 милиони евра.

притисни ентер