Како што јави Би-Би-Си, овој град кој се наоѓа во индиската држава Карнатака е познат по тоа што има слаба излезност на изборите.
Токму затоа, на општите избори, кои се одржуваат во неколку фази до почетокот на јуни, бројни компании решија да ги поттикнат гласачите да излезат на гласачките места. Така, хотелите, такси-службите и другите компании најавија бројни иницијативи за да ги поттикнат луѓето да гласаат.
Тие вклучуваат бесплатно пиво, возење со такси со попуст, па дури и бесплатни здравствени прегледи. Во некои продавници за храна, клиентите треба да го покажат прстот обоен со неизбришливо мастило како доказ дека гласале за да добијат попуст.
Општите избори ќе се одржат во Бангалор утре (петок) во втората од седумте фази на гласањето. Вчера Високиот суд на државата ѝ дозволи на хотелската асоцијација да обезбедува храна бесплатно или по намалени цени сѐ додека не се прекршат изборните правила.
„Различни хотели и ресторани ќе им обезбедат различни бенефиции на гласачите врз основа на нивната сопствена одлука“, изјави ПЦ Рао, претседател на хотелската асоцијација, за локалниот дневен весник Бангалор Мирор и продолжи:
- Додека некои од овие места ќе обезбедат бесплатно кафе, доса [палачинка од оризово брашно и леќа] и овошен сок за да ја победат неподносливата топлина, некои од местата ќе даваат попусти на храна или ќе имаат некои други примамливи понуди.
На последните општи избори во 2019 година, урбаната изборна единица Јужен Бангалор забележа најмал процент на излезност во државата Карнатака со „само“ 53,7 проценти од гласачите. Излезноста била исто така ниска во Бангалор Централ (54,3 проценти) и Бангалор Норт (54,7 проценти) во споредба со вкупната излезност на државата од 68 проценти. Повеќето компании почнале да ги охрабруваат жителите да гласаат минатата недела, но вчера ги објавиле понудите по одобрувањето од судот.
Популарниот тематски парк Wonderla им подарува билети на гласачите по намалени цени, додека пабот Deck of Brews им подарува бесплатно пиво на првите 50 клиенти кои гласаат. Апликацијата „Ridesharing Blu-Smart“, пак, нуди попуст од 50 отсто за патниците кои патуваат на 30 километри од избирачките места, додека такси-здружението „Рапидо“ им дава бесплатно возење на лицата со посебни потреби и постарите гласачи.
- Ова е нашиот начин да ја славиме демократијата и да привлечеме внимание на важноста на гласањето - вели Гопи Чанд Черукури, коосновач на синџирот ресторани „Мистер Фили“ за дневниот весник „Индиан експрес“.
Ресторанот нуди 30 отсто попуст на хамбургери и милкшејкови за првите 100 гласачи во ресторанот.