Фудбал

Анчелоти: Нашата радост е воздржана затоа што претстои најважниот натпревар во сезоната

- Реал Мадрид ја освои рекордната 36-та шампионска титула во шпанската Ла Лига на четири кола пред крајот.

Ова се случи по успехот на „белиот балет“ со 3:0 над Кадиз, по што следеше победа од 4:2 за Жирона над Барселона Така, резултатот од каталонското дерби го круниса тимот од главниот град.

Но, без да го изневери својот стил, италијанскиот тренер на новите шампиони, Карло Анчелоти, претпочита да остане смирен. Затоа што, според него, претстојат уште поважни натпревари.

-Очигледно е воздржана радост бидејќи најважниот натпревар во сезоната е исто така многу блиску. И покрај тоа што го очекуваме Баерн, мора да бидеме среќни. Ова е заслужена титула во секој поглед и имавме фантастична поддршка од навивачите. Би сакале да славиме со сите навивачи, но тие разбираат затоа што во среда имаме многу важен предизвик. Сакаме добро да се подготвиме за да ги задоволиме навивачите и заедно ќе ја славиме титулата во сабота. Сега е важно да славиме воздржано, бидејќи целта во среда е многу важна, рече Анчелоти.

Запрашан што би издвоил во однос на тимот за освојувањето на трофејот, тој рече: „Пред се, посветеноста на сите. Беше лесно да се управува со овој тим бидејќи има многу посветеност и малку его. Сите си помагаат и се пријатели и надвор од теренот. Можам да кажам дека тоа беше фантастична кампања, бидејќи сите беа посветени на она што го правиме, не можам да ги изоставам ниту навивачите, бидејќи тие беа таму за нас цело време“.

Во однос на тоа кој беше клучниот момент за освојување на шампионатот, Анчелоти смета дека голот на Џуд Белингем против Барселона им дал предност.

-Имавме многу континуитет од првиот до последниот натпревар, додаде Италијанецот.

Свет

Словачкиот суд му одреди притвор на атентаторот на премиерот Фицо

Цинтула го погоди премиерот со четири од пет куршуми кога тој им пријде на приврзаниците по владината седница во Хандлова, во централна Словачка, за да се поздрави со нив.

Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај во градот Хандлова со пет истрели го застрела премиерот Роберт Фицо и тешко го рани во стомакот.

Обвинителот побара притвор за осомничениот да не избега или да го повтори делото, а по сослушувањето судот не се согласи со писмените гаранции на Цинтула, ниту со предлогот тој да се брани додека е на слобода под надзор.

Цинтула го погоди премиерот со четири од пет куршуми кога тој им пријде на приврзаниците по владината седница во Хандлова, во централна Словачка, за да се поздрави со нив.

Цинтула веднаш бил уапсен. Од полицијата до медиумите протече видео на кое тој вели дека пукал во премиерот затоа што не му се допаѓаат политиките на неговата влада поради промените во судството, обидот за контрола на јавниот сервис РТВ и прекинот на помошта за Украина.

Но, адвокатите предупредија дека признавањето на вината е спорно бидејќи веднаш по атентатот и апсењето бил сослушан во шок, без присуство на адвокат.

Министерот за внатрешни работи Матуш Шутај Ешток рече дека напаѓачот немал соучесници, дека е очигледно дека нападот врз премиерот е политички мотивиран и дека Цинтула најмалку еднаш присуствувал на демонстрациите против Владата во градот Долна Крупа. /МИА

Македонија

Едно лице почина, а друго се бори за живот по повреди добиени во лифт во угостителски објект

Едно лице почина, а друго се бори за живот во Клиничката болница- Штип од повреди добиени во несреќа, што според првичните информации се случила во лифт во угостителски објект во Штип.

Надлежните од СВР Штип потврдуваат за трагедијата, која се случила попладнево во угостителски објект во Штип.

Повеќе детали околу несреќата засега нема, но од СВР Штип велат дека во тек е увид од страна на полицијата, јавен обвинител од ОЈО Штип, а на терен се и државни инспектори.

Според првичните информации починатото лице и неговиот колега извршувале работна задача во моментот на несреќата.

Свет

Најмалку 68 луѓе го загубија животот во поплавите во западен Авганистан

Најмалку 68 луѓе го загубија животот во поплавите што ги зафатија планинските области во западен Авганистан по невообичаено обилните сезонски дождови, соопштија денеска властите.

Во најтешко погодената провинција Гор на западот од земјата 50 луѓе го загубија животот и имаше голема материјална штета, а уништени се илјадници хектари обработливо земјиште, објави портпаролот на гувернерот на провинцијата.

Во северната провинција Фаријаб беше соопштено дека животот го загубиле 18 лица, двајца се повредени, имало и значителна материјална штета и се удавиле над 300 говеда.

Главниот портпарол на талибанската влада изрази жалење за „загубата на сограѓаните Авганистанци“ и ги повика „одговорните власти... да ја дадат сета потребна поддршка за ублажување на страдањата“, а „добронамерните донатори“ и хуманитарни организации да помогнат.

Светската програма за храна на ОН на социјалната мрежа Икс објави дека провинцијата Гор во која има 2.500 семејства е најтешко погодена. Тимовите на Светската програма за храна на ОН се на терен за да распоредат помош, се додава во соопштението.

Минатата недела организацијата соопшти дека екстремно во обилните дождови во Авганистан животот го загубиле повеќе од 300 луѓе и се уништени илјадници куќи, главно во северната провинција Баглан.

Преживеаните останаа без куќи, земја и извори на егзистенција. Поголемиот дел од Баглан е „недостапен за камиони“, соопшти Светската програма за храна на ОН, додавајќи дека прибегнува кон секоја алтернатива за да им достави храна на преживеаните