Победниците ја пишуваат историјата? Не … губитниците ја детерминираат историјата.

Еве една моја куса анализа:

1. Вчера победи Македонија, граѓаните кои особено изминативе 2 години доживуваа сериозни општествено-интелектуални понижувања од власта, особено од македонскиот партиципиент во истата, која дозволи бескрупулозно девалвирање и девастирање на сите претходни „придобивки“, особено Охридскиот рамковен договор. Зарем некој мислеше дека Македонецот ќе премине преку фактот дека имаме директорка на Токсикологија која наводно „не знаела“ да говори Македонски, зарем никој не ги слушна „тапаните на војната“ од 2001 год. кои повторни ни заѕвонија во ушите и тоа од устата на тогашниот „борец за човекови права“ Али Ахмети, кој пред само неколку дена скандираше УЧК пред толпа граѓани кои вееја знамиња на УЧК и Албанија?

Но овие два настани беа само последните шајки во „политичкиот ковчег“ на СДСМ.

Кој од СДСМ ја дозволи оваа општествена и морална девалвација? … одговорот е јасен.
Рекети, Рашковци, Соравии, Бехтели, пасоши и лични карти, Бугари во Устав, Онкологии, Токсикологии, Бокиња, Кикиња и Фрикиња, Дуизација, Албанизација, т.н. лажни анкети, и што уште не … реално, резултатот на Пендаровски и не е лош после сите овие моменти, тој само ја плати цената на Шилегов, но овојпат сметката беше побааги долга, а додаток му беше – купонче, но без попуст за 8ми мај. Прашањето е – дали ќе успее да биде викнат „да се јави на главна каса“ за две недели. Најважно, СДСМ имаше кампањски наратив кој им беше „свилениот конец“, а тоа е ЕУ. Дополнително, поделбата на Проруски и ПроЕУ политички субјекти и граѓани им се тресна од глава на СДСМ.
Неуспехот за почеток на преговори со ЕУ никако не може да се припише на сите други граѓани на Македонија а од ПР аспект – тоа беше најлошиот изборен наратив во последните 4-5 циклуси.
Зарем некој ќе се откаже од иднината, ќе се откаже утре да се разбуди жив и здрав и помалку среќен? Зарем некој можеше да поверува во ветувањата за подобра ЕУ иднина со овој институционален административен апарат кој се гуши во скандали и криминали?

2. ВМРО-ДПМНЕ, Христијан Мицкоски и Гордана Сиљановска се најголемите победници на вчерашниот прв круг претседателски избори со неверојатни 180.000 гласови предност!
Феноменот на т.н. „колатерален ќар“ ја доведе лидерот и партијата до вчерашната еуфорична победа која е базирана на огромен број „невмровски“ гласачи и на разочарани „комуњари“, интелектуалци, неопределени и незаинтересирани граѓани кои одлучно одговорија на сите аномалии опишани во точка 1.

Старечки мудро, Мицкоски ги остави политичките опоненти да тонат во сопствената коруптивна кал изминативе неколку години, суптилно контролирајќи ги огромниот број градоначалници, со цел нивните скандали да не бидат негативен наратив за владејачката СДСМ.

Но, не може и не смее да не му се одаде почит на Христијан Мицкоски за вкалкулираното политичко „хазардерство“ и интелектуална стаменост, кој во многу важни моменти одигра „all in“ кога политичарите од сите други таботи ги фрлаа картите на масата и се откажуваа. Тивко и трпеливо ја билдаше својата позиција која опонентите се обидуваа да му ја раздрмаат со разни Сашиња, Филипчиња и уште неколку кои сè уште се околу него во партијата и од таа микро победничка позиција успеа да влезе во полуфиналето на натпреварот со сериозна предност и тоа на „гости“.

Гордана Силјановска беше поискусна за 4 години, и заедно беа одличен тандем кој успеа да го продаде наративот на „гордост“ и „наша“ Македонија.

3. ЗНАМ и Максим Димитриевски, е ова се за мене сериозните победници на вчерашните избори, „човек партија“ која успеа за само 4-5 месеци политички живот како партиски субјект, да ја декласира Левица, освојувајќи речиси двојно повеќе гласови од Ванковска, со што си отвори пат за еден нов, уникатен, досега незабележан политичар, кој во стомакот има национал-патриотизам, во устата има државништво, а во срцето има македонско вистинско левичарство.

За негова среќа, тој е во позиција сега да биде дополнителен керозин на неговите носители во сите 6 ИЕ, и доколку овие две недели успее да биде присутен насекаде во Македонија заедно со нив, може да биде свеж воздух во политичката македонска какафонија со сигурна пратеничка група.
ЗНАМ навистина може да прерасне во сериозна трета македонска опција, која доколку се постави на здрави нозе, но не само на нозете на Максим, ќе биде прагматичен политички фактор во наредните 4-5 години.

4. Левица и Ванковска се една сериозно тажна слика за неуспешен идеолошко-корпоративен „брак“.
Кавгите, навредите, заканите знасочени кон многу физички и правни субјекти од страна на Апасиев, но и навредите од страна на Ванковска, не останаа нерегистрирани од оние кои се вистински гласачи на избори … а тоа сигурно не се т.н. „Facebook херои и тинејџерски следбеници“. Големиот број на негови гафови од типот -посета и поклон на гробот на Енвер Хоџа, диктатор кој зацрни многу македонски и албански семејства, за мене смешниот чин во Собранието со фрлање листови и кршење на монитори, потоа забраната за истакнување на знамето од Кутлеш, и на крај да имаме јавни сведоштва на екс-високи членови на Левица кои биле разрешени или си дале оставка поради карактерот и темпераментот на Апасиев, кој го не го опишаа баш како позитиве...беа очекуваната причина за нивниот резултатски потоп и дебакл!

ВМРО-ДПМНЕ веќе е на 10.000 километри и лета на крилјата на вчерашниот резултат, и сега останува прашањето - дали Мицкоски и екипажот можат да освојат 61 пратеник?
Сериозно и навистина важен е и распоредот на пратеничките места кај партиите на етничките Албанци...доколку разликата е во корист на ДУИ и е помала од 4-5 пратеника, Мицкоски ќе биде релативно комотен да прави влада со Вреди ,но доколку таа разлика биде поголема, тогаш собраниската математика ќе биде со уште најмалку 2 непознати, а Мицкоски ќе биде ставен на сериозен тест.

И да, мислам дека резултатите на 8ми мај ќе го детерминираат следниот лидер на СДСМ, кој ќе има „ѓаволски“ тешка задача во наредниот период со цел во најмала рака да ја хибернира партијата дури трае нејзината преродба.