Свет

Се зголеми бројот на жртви во ураганот „Хелена“ што ја пустоши Флорида, над 20 загинати (ВИДЕО)

Бројот на жртвите на ураганот Хелена што ги погоди САД денеска се искачи на 21, додека повеќе од три милиони луѓе останаа без струја поради невремето.

Ураганот од четврта категорија синоќа го погоди регионот Биг Бенд на Флорида, а денеска ќе ослаби над Џорџија, јавува ABC News.

Ураганот сега падна на категоријата 1, со максимални ветрови од 120 километри на час, но властите рекоа дека условите се уште се опасни по живот и ги повикаа луѓето да останат во засолништа, соопшти денеска Националниот центар за урагани, а пренесе Би-би-си.

Бурата се движела на север од Флорида кон Џорџија и била на околу 160 километри од Аугуста и 65 километри од Мејкон, Џорџија и се движела со брзина од околу 48 километри на час, соопшти центарот за урагани во Мајами.

Бројни поплави се забележани низ југоисточниот дел на САД, а повеќе врнежи се очекуваат денеска додека Хелена се упатува кон Тенеси. Наредена е задолжителна евакуација на некои жители во Ешвил, во западниот дел на Северна Каролина. Покрај обилните врнежи се очекуваат и опасни одрони.

Повеќе од 1,2 милиони луѓе се без струја во Флорида, а повеќе од 800.000 корисници во Џорџија исто така се без струја. Повеќе од 500.000 жители се без струја во Јужна Каролина, а 190.000 во Северна Каролина.

Националниот центар за урагани во Мајами соопшти дека Хелена удрила на копно синоќа во близина на устието на реката Аусила во областа Биг Бенд во Мексиканскиот залив. Брзината на ветрот била 225 километри на час.

Хелена ги поттикна властите да издадат предупредувања за урагани и поплави кои се проширија во северна Џорџија и западна Северна Каролина. Гувернерите на американските сојузни држави Флорида, Џорџија, Алабама, Каролина и Вирџинија прогласија вонредна состојба во нивните држави.

Едно лице загина на Флорида кога сообраќаен знак паднал врз нивниот автомобил, а две лица загинале во јужна Џорџија. Покрај тоа, животот го загубија уште 18 лица. До 25 сантиметри дожд наврнаа во планините во Северна Каролина.

Обилните дождови почнаа да паѓаат и ветровите се засилија претходно во градот Валдоста, Џорџија, во близина на границата со Флорида.

Метеорологот Дилан Луск изјави дека Националната метеоролошка служба издала предупредување за торнадо синоќа во округот Вилер, Џорџија. Тој рече дека тоа е едно од 12-те предупредувања за торнадо за само неколку часа.

„Ова е една од најголемите бури што некогаш сме ги имале“, изјави гувернерот на Џорџија, Брајан Кемп.

Беа издадени наредби за евакуација долж брегот на Заливот во ниските области околу Талахаси, Гејнсвил, Седар Ки, Лејк Сити, Тампа и Сарасота, Флорида.

Хелена во средата предизвика поплави во делови на полуостровот Јукатан во Мексико. На западот на Куба, ураганот остави без струја повеќе од 200.000 домови и деловни објекти. Националната океанска и атмосферска администрација предвиде натпросечна сезона на урагани во Атлантикот поради рекордно високите температури на океаните.

Свет

Десетици луѓе се заробени на покрив на потопена болница во Тенеси (ВИДЕО)

Пациенти и персонал во болница во Тенеси останаа заробени на покривот на болницата откако ураганот Хелена ја поплави областа.

Спасувачките операции на Државната агенција за управување со вонредни состојби и Националната гарда во моментов се на терен во болницата Уникои во Ервин, Тенеси. Началникот на полицијата во Ервин, Реган Тилсон, изјави за локалната новинска станица WCYB дека никој не е повреден во поплавите, иако повеќе од 50 луѓе се заробени на покривот на болницата. Спасувачките тимови користат чамци за да ги спасат пациентите и персоналот бидејќи патиштата стануваат непроодни поради поплавите, пренесе Индекс.

Драматичните слики објавени на социјалните мрежи покажуваат дека болницата е речиси целосно потопена во вода.

Раководството на болницата потврди дека пациентите и персоналот морале да се евакуираат на покривот на болницата по поројните поплави од блиската река Ноличаки.

Единаесет пациенти биле во болницата кога почнала евакуацијата, но додека болницата испратила брза помош, „поплавата се случила толку брзо што возилата на брзата помош не можеле безбедно да се приближат до болницата“.

Водата околу болницата и силните ветрови во областа го отежнуваат влезот на чамци и хеликоптери во областа, се вели во соопштението.

„Ситуацијата во болницата е многу опасна и операцијата за спасување ќе биде многу ризична“, се вели во соопштението.

Свет

Силни дождови ја „потопија“ Британија, издадени над 180 предупредувања за поплави

Британската метеоролошка служба издаде повеќе од 180 предупредувања за обилни врнежи и поплави низ целата земја, а во тек е операција за спасување на возачите заглавени на поплавениот автопат М5, објавија денеска британските медиуми.

Како што јави Скај њуз, поплавен е и стадионот на локален фудбалски клуб, кој апелира за помош за санирање на последиците од невремето.

Дождот, кој паѓа со денови, најтешко ги погоди северните и централните делови на Англија и Велс, предизвикувајќи голем прекин на сообраќајот во Милтон Кејнс, Оксфордшир, Кембриџшир, Лестершир и Западен Мидлендс.

Нов жолт аларм е издаден поради силните ветрови кои се очекуваат во југозападна Англија и во Велс во недела.

Метеорологот Грег Духурст предупреди дека иако се очекува постепено намалување на врнежите, сепак постои ризик од локални поплави и излевање на реките, бидејќи тлото во многу делови од земјата е заситено од дождот што падна во последните неколку недели.

Невремето предизвика и бројни проблеми во патниот и железничкиот сообраќај.

Свет

Израел срамни со земја цел кварт во Бејрут, не успеаја да го убијат лидерот на Хезболах (ВИДЕО)

Израел изврши серија огромни напади врз Бејрут, при што неговата војска соопшти дека го погодила централниот штаб на милитантната група Хезболах.

Нападот ги затресе прозорците низ либанската престолнина и испрати густи облаци од чад што се издигнаа во воздухот, објави Скај Њуз.

Лидерот на Хезболах, Хасан Насралах бил целта на нападот и израелската војска истражувала дали тој бил погоден, објавија три големи израелски ТВ канали.

Извор близок до Хезболах изјави за Ројтерс дека Насрала се уште е жив, а иранската новинска агенција Тасним исто така објави дека тој е на безбедно.

Либанското Министерство за здравство соопшти дека најмалку двајца загинале, а 76 се ранети во нападите. Се вели дека бројките се прелиминарни.

Израелската војска тврди дека извршила „прецизен удар“ врз штабот на Хезболах, кој, како што рече, бил „вграден под станбени згради во срцето на Дахиех во Бејрут“.

Тоа беше најсилниот напад изведен од Израел во Бејрут за време на неговиот речиси едногодишен конфликт со Хезболах, кој започна кога групата поддржана од Иран почна да стрела ракети кон Израел речиси веднаш по нападот на Хамас од Газа на 7 октомври.

Израел ги нападна јужните предградија на Бејрут контролирани од Хезболах, познати како Дахиех, четири пати во текот на минатата недела - убивајќи најмалку тројца високи команданти на Хезболах.

Портпаролот на израелската војска Даниел Хагари рече дека централниот команден центар е вграден длабоко во цивилните области.

Четири згради во Дахиех се претворени во урнатини, јави телевизијата Ал-Манар на Хезболах.

Иранската амбасада во Бејрут ги опиша нападите како „опасна ескалација што ја менува играта“, нарекувајќи ги „злосторство“ кое заслужува „соодветна казна“.

Нападите дојдоа веднаш откако израелскиот премиер Бенјамин Нетанјаху вети дека ќе ги продолжи нападите на Израел врз борците поддржани од Иран во Либан за време на говорот на Генералното собрание на Обединетите нации.

„Сѐ додека Хезболах го избира патот на војната, Израел нема избор, а Израел има целосно право да ја отстрани оваа закана и безбедно да ги врати нашите граѓани во нивните домови“, рече тој.

„Израел ја толерира оваа неподнослива ситуација речиси една година. Па, дојдов овде денес да кажам доста е.“

Конфликтот меѓу Израел и Хезболах драматично ескалира оваа недела, при што во израелските воздушни напади загинаа повеќе од 700 луѓе во Либан, што ги зголеми стравувањата од сеопфатна војна меѓу двете страни.

Десетици илјади беа принудени да ги напуштат своите домови од двете страни на границата.

притисни ентер