Oва се дел од резултатите на истражувањето на јавното мислење кое за МКД.мк го спроведе агенцијата Маркет вижн од 16 до 25 септември на 1.200 испитаници. Анкетата покажа дека ВМРО-ДПМНЕ и натаму е партијата со најголема доверба кај граѓаните.

Граѓаните на Македонија сметаат дека најголем проблем во државата се криминалот и корупцијата. Следува инфлацијата, растот на цените и трошоците за живот. Испитаниците одговорија дека за нив проблем се и невработеноста, ниските пензии и плати, проблемите во здравството, емиграцијата, образованието…

Споредено со резултатите од истражувањето спроведено во март 2024, перцепцијата на јавноста за корупцијата и криминалот како најважен проблем во земјата се намалува, додека во фокус останува инфлацијата, растот на цените и трошоците за живот.

На прашањето за предложената мерка од премиерот за распуштање на Судскиот совет за подобрување на правосудниот систем, позитивно одговориле 43,2 отсто од граѓаните, а за 33,4 отсто од испитаниците тоа е негативна мерка.

Најголем дел од граѓаните знаат кој е новиот лидер на СДСМ, додека 28,8% е изјасниле дека не знаат. Процентот на оние што не знаат е поголем кај испитаниците од албанска националност.

На прашањето за која партија би гласале на парламентарни избори, доколку истите би се одржале утре, најголем дел од одговорите на оние кои рекле дека ќе гласаат, речиси половина, се однесуваат на партијата ВМРО ДПМНЕ. Коалицијата Вреди исто така е во пораст споредено со парламентарните избори, ДУИ стагнира, а СДСМ е со голем пад.

Анкетирањето беше спроведено од 16 до 25 септември 2024 година со употреба на CAТI метода – телефонско анкетирање со помош на компјутер на примерок од 1.200 испитаници, односно со интервал на доверба од 95% и маргина на грешка +-3%.

Примерокот е репрезентативен на ниво на Македонија според: регион, пол, возраст и етничка припадност согласно податоците за резидентното население од пописот 2021 година.

Мехатронички решенија за управување со мали хидроелектрани, со електрични возила и со батериски системи, беа темите на кои инженерите на Фероинвест и Брако ги изложија последните достигнувања од инженерското работење на компанијата на настанот RE-MEMBER 2024, во организација на Машинскиот факултет во Скопје, со кој се одбележуваат 20 години од воведувањето на струдиската програма Мехатроника.

Инженер Војдан Андонов говореше за примената на PLC (програмабилен логички управувач) во управувањето на батериските системи за складирање на електрична енергија, што претставува последниот производ на Фероинвест, на кој компанијата работеше две години и кој претставува решение за вишокот електрична енергија произведена од фотоволтаици.

Инженер Филип Ташевски ги изнесе системите и управувањето на најновото електрично возило за чистење на Грин Машинс на Брако, моделот GM720ze, кое исто така е развивано во последните две години и е во постапка на сертификација од страна на германскиот институт ТУВ. Возилото има управување на сите четири тркала, како и други напредни решенија, и се очекува да предизвика значаен импакт на пазарите каде се бараат модерни и незагадувачки технологии.

Инженер Филип Андрески изложи стручна презентација за значењето на автоматизацијата при управување и мониторинг на малите хидроелектрани преку SCADA систем. Фероинвест е лидер во изградбата и одржување на мали хидроелектрани кај нас, а изведува проекти и за клиенти во други држави.

Фероинвест и Брако имаат континуирана стручна соработка со Машинскиот факултет во Скопје, работејќи на проекти за поддршка и развој, и на факултетот и на производните процеси во компанијата, соопштуваат од компанијата.

Претседателскиот кандидат на Републиканската партија Доналд Трамп во Висконсин го одржа еден од најострите говори против имигрантите кои илегално ја преминале американската граница и извршиле злосторства, а неговата противкандидатка, демократката Камала Харис ја нарече „ментално хендикепирана“, пренесоа американските медиуми.

Трамп, кој, како што пишува „Вашингтон Пост“, често ги доведувал во прашање менталните способности на американскиот претседател Џо Бајден, на предизборен митинг во Висконсин изјавил дека „Џо Бајден станал ментално хендикепиран, а Камала е родена таква“.

Тој ја обвини Харис, која ја посети американско-мексиканската граница во петокот, дека некои мигранти извршиле злосторства откако илегално влегле во САД, тврдејќи дека таа е одговорна за „бришењето на границата на САД“, пренесува АП.

„Ќе го ослободам Висконсин од масовна мигрантска инвазија. Ќе ја ослободиме земјата“, изјави поранешниот американски претседател.

Трамп изрази надеж дека фрустрацијата поради илегалната имиграција ќе донесе гласови во Висконсин и другите клучни држави, ги осуди луѓето што ја минуваат границата меѓу САД и Мексико како „отров за крвта на земјата“ и вети дека ќе изврши најголема можна депортација доколку биде избран.

За време на својот говор, републиканскиот претседателски кандидат беше опкружен со плакати на кои беа прикажани илегални имигранти уапсени за убиства и други насилни злосторства и транспаренти на кои пишуваше „Стоп за имигрантскиот криминал“ и „Депортирајте ги илегалците сега“.

Според официјалните податоци на американската влада, околу седум милиони мигранти биле фатени како илегално ја минуваат американско-мексиканската граница за време на администрацијата на Бајден, што е рекордно висок број што ги поттикна критиките на Трамп и републиканците против Харис и Бајден.

Сарафина Читика, портпаролка на Камала Харис, по говорот на Трамп рече дека „тој нема ништо инспиративно да му понуди на американскиот народ, само темнина“.