Утре е крајниот рок до кога трговците и добавувачите треба да склучат нови договори за снабдување на производите на кои рабатот и дополнителните трошоци ќе бидат ограничен на 10%. Со овој закон ќе бидат опфатени 2.500 производи на кои профитната маржа не смее да им биде поголема од 10 отсто.
Со законот, покрај ограничен рабат, трговците нема да смеат да наплаќаат дополнителни трошоци за маркетинг, репрезентација, како и за истакување одреден производ на полица. Во пракса, тоа ќе значи дека маркетите ќе треба да стават нови цени на сите продукти од листата.
За министерот за економија Бесар Дурмиши станува збор за долгорочна мерка, која треба да стави ред во хаосот со цените, а првичните ефекти граѓаните ќе ги забележат кон крајот на октомври.
„Сакам да потенцирам дека овој закон не ја регулира трговската маржа, туку ги забранува дополнителните трошоци (надоместоци) кои добавувачите морале да ги плаќаат за нивните производи да се продаваат од купувачите. Со примена на овој закон очекуваме резултати на долг рок и намалување на цените на овие производи на листата од најмногу 10%, односно првите резултати со намалени цени ги очекуваме до крајот на октомври кога очекуваме дека ќе се потрошат залихите од претходните договори и ќе почнат да се продаваат производите согласно новите договори. - Бесар Дурмиши- министер за економија
Контролата за примена на овој Закон ја врши Комисијата за заштита од конкуренција. Највисоките казни достигнуваат до 20.000 евра за голем трговец и од 350 до 500 евра за одговорното лице во правниот субјект.
-Во координација Комисијата за заштита од конкуренција во наредните три месеци, односно до крајот на годината за да излеземе во пресрет на сите засегнати страни, доколку се утврди дека при склучување на новите договори не се испочитувани одредбите на Законот ќе има опомени, односно нема да се преоѓа веднаш на казнување. Односно во следниот период од 3 месеци односно до крај на 2024 година, ќе се соработува со компаниите за да утврди дали се правилно склучени договорите односно дали се опфатени соодветно одредбите од законот. Од 2025 година ќе се вршат редовни контроли од Комисијата за заштита на конкуренцијата.- Бесар Дурмиши- министер за економија
Законот беше доносен на 20 март во соработка со сите засегнати страни, трговците, производителите и дистрибитерите. Нема да има одложување на неговата примена. трговците и добавувачите имаа рок од шест месеци да ги усогласат договорите, односно да склучат нови договори, не подоцна од 27 септември.