Регион

Десетици повредени во антимигрантските протести на грчките острови (ВИДЕО)

Повеќе од 60 лица се повредени во судирите меѓу полицијата и демонстрантите кои се противат на изградбата на нови кампови за мигранти на островите Лезбос и Хиос во Грција.

На три места каде што треба да се градат нови кампови во Лезбос, демонстрантите фрлаа со камења кон полицијата. Неколку полицајци беа повредени и на Хиос. Грчкиот премиер Киријакос Мицотакис повика на смирување на тензиите и најави дека ќе се состане со регионалните и локалните власти за да разговараат за појавата на кризата.

Имено, властите во Атина решија да изградат нови центри кои треба да ги заменат пренатрупаните кампови на островите Лезбос, Самос, Хиос, Лерос и Кос. Покрај тоа, владата планира да го намали бројот на мигранти од 42.000 на 20.000.

Но, локалното население остро се спротивставува на изградбата на нови центри. Од вторникот започнаа протестите, блокирање на патиштата во Лезбос кои водат кон места каде ќе се градат новите центри.

Покрај тоа, на протестот им се придружи и регионалниот гувернер Костас Муцурис и градоначалникот на Лезбос, Таксиархис Верос.

Во вчерашните протести во Лезбос, во кои учествуваа повеќе од 1.000 лица, беа повредени 43 полицајци и 10 демонстранти. Околу 2000 луѓе излегоа на улиците во Хиос. Подоцна нападнале хотел во кој биле сместени полицајци и повредени се осуммина од нив. Околу 50 полицајци и десет демонстранти се повредени во средата вечерта.

Димитра Калогеропулу, шеф на грчкиот меѓународен комитет за спасување, рече дека овие тензии не треба да изненадуваат никого. Таа додаде дека „ова не е добро за никого затоа што локалната заедница смета дека нивните острови станале огромни затвори, додека барателите на азил се принудени да живеат во опасни услови“.

Инаку, на грчките острови моментално има над 42.000 мигранти во преполните кампови. На пример, во кампот за бегалци Морија на Лезбос во моментов има 19,000 луѓе, иако е направен да смести околу 3.000 луѓе. Ситуацијата е слична и на другите острови.

Свет

Избрани 12 поротници за судењето против Трамп

Меѓу 12-те поротници има седум мажи и пет жени, според Си-Би-Ес Њуз. 

Судот во Њујорк назначи 12 поротници кои ќе ја донесат конечната пресуда во врска со обвинението против поранешниот американски претседател Доналд Трамп за наводно фалсификување деловни документи во случајот со тајни плаќања на порно актерката Сторми Даниелс, пред судот во Менхетен.

Меѓу 12-те поротници има седум мажи и пет жени, според Си-Би-Ес Њуз. Изборот на поротата ќе продолжи денеска, бидејќи до почетокот на судењето треба да се изберат уште шест резервни поротници.

„Имаме порота“, рече судијата Хуан Мерчан откако новите поротници се заколнаа дека ќе носат одлуки „праведно и непристрасно“.

Мерчан посочи дека судот е на добар пат да го започне судењето со воведни зборови од понеделник, 22 април.

Обвинението поднесено од обвинителот Алвин Брег го обвинува Трамп за фалсификување деловни извештаи со цел да се прикрие исплатата за порноѕвездата Сторми Даниелс непосредно пред изборите во 2016 година. Обвинителството најави дека ќе се фокусира на финсиските средства што Трамп му го дал на својот поранешен соработник Мајкл Коен, кој тврди и дал 130.000 долари на Даниелс, со цел да ја замолчат за нејзината наводна афера со Трамп. Според Обвинителството, тоа бил обид за незаконско влијание врз изборите во 2016 година. Ваквите исплати во САД не се нелегални, но според обвинителите Трамп направил кривично дело со неправилното евидентирање на надоместокот за Коен како правни трошоци. Трамп е обвинет за вкупно 34 кривични дела за фалсификување деловни книги од прв степен. /МИА

Македонија

Тошковски: Расчистена кражбата на сеф од маркет Рептил во Црниче

Министерот за внатрешни работи во техничката влада Панче Тошковски, на Фејсбук објави дека е расчистена кражбата на сеф од маркет во Црниче.

„Расчистена кражбата на сеф од маркет Рептил во Црниче.

Во врска со тешка кражба во маркет Рептил извршена на 1 април 2024 година во населба Црниче, Секторот за внатрешни работи Скопје презема оперативно-тактички мерки и истражни дејствија и ги лиши од слобода лицата В.З и В.Т од Скопје.

На ден 18.04.2024 од страна на инспектори од ОКР Кисела Вода заедно со полициски службеници од ЕИП и ПС Ѓорче Петров врз основа на издадена судска наредба од Основен Кривичен Суд Скопје изврши претреси на дом и други простории кај двете лица.

Истиот ден од страна на ЕВР Кисела Вода поднесена е кривична пријава за кривично дело “Тешка кражба” предвидено и казниво по член 236 од КЗ, а од страна на судија на претходна постапка за едното лице определена е мерка притвор“, стои во објавата на Тошковски.

Свет

Украина тврди дека соборила руски бомбардер Ту-22М3

Командата на украинските воздухопловни сили соопшти дека собориле руски бомбардер Ту-22М3.

Во соопштението се наведува дека руската армија во текот на ноќта ја нападнала територијата на Украина со 22 типа проектили и 14 беспилотни летала од типот „Шахед“.

Наведено е дека украинските сили уништиле две крстосувачки ракети Х-101/Х-555, 14 беспилотни летала, 11 наведувани ракети Х-59/Х-69 и две крстосувачки ракети Х-22.

„Ракетните единици за противвоздушна одбрана на Военото воздухопловство, во соработка со Главната управа за разузнавачки работи на Министерството за одбрана на Украина, по првпат соборија стратешки бомбардер со долг дострел од типот Ту-22М3, носач на крстосувачки ракети Kh-22, кои руските терористи ги користеа за да ги нападнат мирните украински градови“, пишува во соопштението.

Руското Министерство за одбрана соопшти дека воениот бомбардер од типот „Ту-22М3“ се урнал во Ставрополската област поради техничка неисправност, а пилотите се катапултирале. Тројца од четворицата пилоти се пронајдени, додека по четвртиот се трага, наведува руското Министерство. /МИА

притисни ентер