Адвокатот Васил Димишков, брат на судијката Весна Димишкова која како судија на претходна постапка му определи притвор на бизнисменот Орце Камчев во Империја, беше првиот на листата на сведоци на Боки 13 во случајот Рекет. Неговите сомнежи дека, како што рече, Камчеви сакале да го искористат за притворот, почнале кога на средба Орце му покажал слики од судски наредби потпишани од судијката Димишкова. Откако му е определен притвор на Камчев се сретнал со неговата сопруга Ана и Зоран Милевски Кичеец.
Јас сметав дека тие сакаа да ме искористат, да ме ангажираат како бранител, бидејќи во тој случај судијата на претходна постапка, мојата сестра, која постапуваше, по сила на закон ќе биде изземена од предметот. Анализирајќи ги разговорите со Камчева и Милевски, проценив дека не би требало да прифатам да бидам бранител во предметот. Кога се јави Милевски му кажав сума која за нив нема да биде прифатлива. Откако му ја кажав сумата не ме побараа.
Одбраната тврди дека обвинителството нема докази против Јовановски.
Боки 13 пак побара укинување на притворот. Вели дека Русковска лажела дека сакал да избега од земјава кога беше уапсен на пат кон Грција.
,,Мојата здравствена состојба стана шпанска серија, а во оваа држава има потешки криминалци кои шетаат слободно. Ми понудија позитивно мислење да излезам од притвор ако кажам дека Катица Јанева е виновна и дека Фросина Ременски земала пари.
Испровоцирана обвинителката Русковска му одговори - Полицијата не го најде Боки 13 во библиотека, туку на граница при обид за бегство. Затоа сум против какво било размислување да излезе од притвор.
На средба со новинарите по завршување на рочиштето судијката Васка Масевска Николовска рече дека на следното рочиште закажано за в четврток ќе одлучи дали ќе го укине притворот на Јовановски, а во пресуда ќе образложи што имало на снимките кои на барање на обвинителството јавноста не ги виде.