Во Сјеница, каде состојбата е сеуште алармантна, едно лице почина од замрзнување.
Вонредна состојба поради проблемите предизвикани од снежните врнежи денес била прогласена во општините Пожега, Сјеница и во Црна трева.
Врнежите од снег низ цела Србија, го зафатија и Ниш, каде улиците цел ден беа расчистувани од натрупаниот снег.
Според командантот на штабот за зимски услови на Ниш, Стојан Спасиќ, десет екипи вечерва ги чистат приоритетните улици.
Снегот достигна околу 40 сантиметри на територијата на општина Ивањица, а во селата со голема надморска височина, поради невремето и ветерот, се создаваат наноси , кои ги прават одредени правци целосно непроодни, пренесуваат медиумите.
Прогласена е вонредна состојба во општина Сјеница, а заменик-градоначалникот на таа општина, Војо Трмчиќ, вели дека автопатот Нови Пазар - Сјеница е сè уште непрооден поради големите снежни врнежи.
Во селото Зарожје кај Бајина Башта спасувачките екипи интервенирале во вадење на возила од наноси на снег додека пет деца биле евакуирани во Игњеваца од Мокра Гора, соопшти српското МВР.
Во Варда кај Косјериќ осум лица биле евакуирани на безбедни места , а пет затрупани возила се ослободени од снегот.
Мажот Р.Ш. (66), чие безживотно тело било пронајдено во завеан автомобил на подрачјето на селото Бранџице кај Сјеница, починал од замрзнување, изјави денес докторот Мехмед Башиќ.
„ Автомобилот бил паркиран покрај патот и возачот отишол да побара помош додека Р.Ш останал во автомобилот од каде не можел да излезе заради неговата здравствена состојба. Така, тој се замрзнал “, изјавил за Танјуг д-р Башиќ, кој бил на самото место.