МЗШВ: Целокупното договорено количество на тутун од реколтата 2019 ќе биде откупенo

Претставниците на откупните претпријатија порачаа да не се создава непотребна паника кај тутунопроизводителите и дека проценката на класите ќе се врши реално.

Целокупното договорено количество на тутун ќе биде откупено, најавија откупните претпријатија на денешниот работен состанок на кој присуствуваа министерот за земјоделство и директорот на Државниот инспекторат за земјоделство и претставници од Стопанската комора на Македонија и Сојузот на здруженија на тутунари.

Претставниците на откупните претпријатија порачаа да не се создава непотребна паника кај тутунопроизводителите и дека проценката на класите ќе се врши реално.

Со цел стимулирање на квалитетот, со новиот модел за зголемени субвенции што го воведе Владата, субвенциите за прва класа тутун се 80 денари за килограм, 70 денари за втора класа и 60 денари за трета класа и дополнителните класи.

Од Министерството за земјоделство информираа дека досега се откупени над 22,4 милиони килограми тутун во вредност од близу пет милијарди денари или повеќе од 85 отсто од договореното количество е веќе откупено. Од страна на откупните претпријатија исплатени се близу 4,7 милијарди денари, а просечната откупна цена е 221,9 денари за килограм, што, како што велат од Министерството, е највисока откупна цена во последните шест години.

Откупот се очекува да заврши до крајот на следниот месец, а како што се наведува во соопштението, на состанокот било истакнато дека не се очекува да има вишок на тутун. Засилени контроли на терен најавува и Државниот инспекторат за земјоделство.

Од реколтата 2019-та вкупно се засадени 13.342 хектари тутун и склучени се 32.798 договори со девет компании. Вкупното производство на тутун од реколтата 2019-та изнесува над 26.700 тони тутун, што е за шест отсто повеќе од реколтата 2018-та. Планираната количина за откуп е 26.729 тони, а издадени се 20.933 евидентни листови. /МИА

Проектот за реконструкција на Старата прилепска чаршија е претставен пред дуќанџиите

Прилепската стара чаршија, споменик на културата, ќе се реконструира за да се зачува нејзиниот автентичен лик, но и да се уреди инфраструктурно. 

Тоа е еден од поголемите проекти на прилепската локална самоуправа. Токму затоа, градските власти се сретнаа со дуќанџиите за да ги слушнат и нивните предлози.

Прилепскиот градоначалник Илија Јованоски и одговорните на јавните претпријатија, од  претпријатието за урбанистичко и просторно планирање и од прилепски водовод, на неформалната средба со сопствениците и со закупувачите на дуќаните, го претставија идејното решение за реконструкцијата на Старата чаршија, очекувајќи мислења, предлози и идеи од дуќанџиите за изнаоѓање на најдоброто решение.

Со проектот ќе бидат опфатени улиците „Републиканска", на потегот од аптеката „Зегин" во центарот на Прилеп до раскрсницата со „Борка Талески" и дел од улицата „Херој Карпош".

Според Јованоски со реконструкцијата на Старата чаршија, постојните травертински плочи ќе бидат заменети со гранитни плочи, сите жици и кабли од кабловските оператори ќе бидат сместени во подземни инсталации, фекалната канализација ќе биде комплетно реконструирана, а ќе се изгради и нова атмосферска канализација. Согласно со идејниот проект, по завршувањето на реконструкцијата, нема да се дозволи повторно монтирање на постојните застаклени делови од кафетериите.

Освен тоа, прилепски водовод ќе направи бесплатна замена на постојната водоводна мрежа, стара преку 70 години, за зголемување на безбедноста на објектите ќе се постави видео надзор, а значително ќе се подобри и осветлувањето.

-Во зависност од временските услови, комплетната реконструкција ќе заврши за 75 до 90 дена, а за целото време на изведувањето на работите, дуќанџиите и купувачите ќе имаат пристап до дуќаните, нагласува Јованоски.

Според предлозите на  дуќанџиите, на нивно барање, договорено е реконструкцијата да почне на крајот на август или во почетокот на септември годинава. Тие побараа од градоначалникот да биде направен добар оперативен план, да инсистира градежните работи да се одвиваат ефикасно и да се запази планираниот рок на изведбата за да не им се нанесе штета во нивното функционирање.

Се бара решение преку предлози за да се реши прашањето со паркирањето на возилата и за одржувањето на хигиената во чаршијата и како да се подобри пристапноста до дуќаните.

Јованоски го прифати предлогот, со дозвола од прилепскиот „Завод и Музеј", да се реновираат и да се унифицираат фасадите на дуќаните.

Пред почетокот на работите за обновата на Старата прилепска чаршија градските власти и дуќанџиите ќе имаат средба за соодветно да се следат активностите./МИА

Димче Арсовски: Владата одлучува против ДИК во Министерството за труд и социјала

​Владата на Зоран Заев и Оливер Спасовски продолжува да го силува работењето на техничката Влада која има една и единствена намена, спроведување на миниум услови за фер и демократски избори.

Стравот кај Зоран Заев, Оливер Спасовски и Мила Царовска е очигледен гледајќи ги постапките и хаосот кој што го креираат.

Оливер Спасовски и Мила Царовска непосредно пред да ја разрешат од небулозни причини министерката Рашела Мизрахи, креираа хаос во министерството за труд и социјала.

Имено, на 14.02 во петокот министерката потпиша формални решенија и овластувања за одредени лица во рамките на кабинетот и министерството за основни потреби за функционирањето на министерството за труд и социјала.

Водејќи се од непринципиелноста на СДСМ која што ја гледаме изминатиов период и правните начела кои што ги почитуваме како политичка партија, веднаш по ваквите потпишувања од страна на министерката Мизрахи, истите решенија и овластувања ги пративме до ДИК да се произнесат дали овие решенија и акти кои што се потпишани од министерката се од интерес на организација на изборите и се потребни врзан потпис од страна на заменик министер и техничкиот министер или не се потребни.

ДИК согласно закон во рок од 24 часа должна е да одговори, донесе едногласни одлуки дека овие акти кои што ги потпишала министерката Мизрахи не се предмет од интерес за организација на изборите и за истите се произнесе дека не е потребен потпис од заменик министер на СДСМ, што значи дека треба да се почитува само едниот потпис кој што го ставила на актите министерката Мизрахи.

Знаејќи го сето ова, СДСМ на седница на Влада, која беше свикана еден ден потоа откако се произнесе со одлука на ДИК, на 15.02 во саботата, Оливер Спасовски и Мила Царовска ги поништија сите овие прераспределувања и овластувања и со тоа извршија противзаконско дело. Не почитувајќи ја одлуката на ДИК.

Очигледни се тенденциите и стравот на СДСМ, каде што наместо да обезбедат миниум услови за фер избори во техничката влада, не обезбедуваат ниту минимум услови за работа на оваа техничка Влада.

СДСМ свесно оди против одлуките на ДИК и се става над сите во државата. Затоа и сме прогласени за хибриден режим.

Еден ден за сето ова сите инволвирани ќе одговараат.

Изјава за медиуми на Димче Арсовски, портпарол на ВМРО-ДПМНЕ

Истражување: Македонските граѓани уредно ги сервисираат плаќањата за комуналии и услуги кон банките и осигурителни компании

Од вкупно издадените сметки, на извршување доаѓаат не цели 2 отсто од плаќањата за услуги од банките, осигурителни компании и комуналии.

Македонските граѓани уредно си ги сервисираат плаќањата и уредно одговараат на своите обврски за комуналии и услугите кон банките и осигурителни компании, истакна  Весна Деловска, извршител од Скопје, на денешната презентација на истражувањето „Европски навики за плаќање" направено од страна на компанијата „EOS Матрих Македонија".

Таа додаде дека од вкупно издадените сметки, на извршување доаѓаат не цели 2 отсто од плаќањата за услуги од банките, осигурителни компании и комуналии.

– Одговорно тврдам дека рамо до рамо сме со европските земји за навиките за плаќање. Од вкупната отвореност на банките, осигурителни компании и пружатели на комунални услуги, има само не цели 2 отсто кои доаѓаат на извршување. Постои една група социјално ранлива категорија на социјално загрозени семејства. Минатата недела веќе стапија на сила измени на Законот за извршување, со кои веќе се даде едно олеснување во делот на начинот на наплата на тие долгови, рече Деловска и додаде дека од досегашното извршување, лимитирано на една третина од приходот од платата или пензијата на луѓето веќе се донесоа измени, извршувањето ќе се движи на една петина од платата или пензијата.

Потсети дека пред два дена стапил на сила уште еден Закон за отпис на камати и репрограмирање на долгови, и додаде дека резултатите од овој закон ќе ги видиме веројатно за три до четири месеци, бидејќи самите доверители добиле законски рок од три месеци во кои треба нормално да стапат во контакт со должниците, да склучат спогодби и да се договорат за начинот на отплата на тие стари и заостанати долгови.

Катерина Бошковска, генерален директор на компанијата „EOS Матрих Македонија" на денешното обраќање појасни дека проблемите со неплаќање на обврските во европските држави се разликуваат по степенот на морална одговорност, начинот на кој што се пристапува во решавање на проблемот, и правната рамка како потребна сигурност за едно рамноправно решавање на проблемите на двете договорени страни во должничко доверителните односи.

Целта на денешната презентација, како што појасни, е да се направат споредбите, на она што се случува кај нас, и она што е навика во Европа, притоа потенцира дека проблеми со неплаќање на обврските постојат не само кај нас, постојат во европските држави.

-Од нашето истражување резултатите говорат дека Западна Европа и е многу подобра во постапките во процесот на наплатата на своите обврски, од нашите испитаници кај физички лица, се смета дека некаде околу 84 отсто навремено одговараат на своите обврски додека кај правните лица тој процент е 79, додаде таа.

Новина оваа година, како што информира Бошковска, е применета на вештачката интелигенција во процесот на наплатата на побарувањето и тоа за нас како држава истакна дека е особено значајно затоа што ние сакаме да ги следиме новите европски текови.

-Јасно е дека сите ние во напорите да наплатиме мораме да се трудиме да бидеме и социјално одговорни, да ги заштитуваме интересите на нашите клиенти, а од друга страна да сме во линија со регулативата , да ги следиме трендовите на дигитализација и со создавање на една дигиталона стратегија суштински да го редефинираме начинот на кој го водиме својот бизнис, што подразбира целосна дигитална трансформација на применетите бизнис модели и приспособување на стратегиите на бизнисот кон новите услоги, додаде Бошковска.

Истражувањето „Европски платежни навики" компанијата „EOS Матрих Македонија" го спроведе со испитувања на преку 3.400 компании во Европа и споредено со 17 европски земји. /МИА

притисни ентер