Потребни состојки:, 200 гр. брашно, 2 јајца, 1 лажичка маслиново масло, 200 гр. печурки, неколку лажици доматен сос, малку сончогледово масло, 100 гр. фета сирење, малку пармезан, 1 филџан вода, магдонос, бибер, сол и зачин од сув зеленчук по вкус.
Постапка:
По подлабок сад со брашно се додаваат 2 јајца и 1 лажичка маслиново масло и се замесува тесто.
Откако тестото добро ќе се измеси се остава да отстои една вечер.
Се посипува со брашно и со сукало се формира подебела кора.
Добиената кора се посипува со брашно и се става во специјална рачна направа за тенчење кори.
Најнапред се поминува на поголема дебелина, а потоа на помала, за да не се распука кората.
Откако ќе се истенчи кората се прават кругови со помош на калап.
Во тава со загреано масло се пропржуваат сечкани печурки.
При крај се зачинуваат со бибер, сол и зачин од сув зеленчук по вкус.
Се додава сечкан магдонос, се намалува температурата на шпоретот и се додава дробено фета сирење.
Состојките се пропржуваат уште неколку минути.
Со добиената смеса се полнат круговите од тесто и се формираат равиоли во форма на цветови или друга форма.
Во тенџере се става 1 филџан вода да зоврие.
Во тава со масло се ставаат равиолите малку да се пропржат.
Откако ќе се пропржат се става зовриената вода и тавата се покрива со капак.
Равиолите крчкаат околу 7 минути и потоа се ставаат во чинија со загреан доматен сос и се посипуваат со пармезан.