Фернандез, кој вчера положи заклетва, ги изненади студентите кога се појави на Правниот факултет на Универзитетот во Буенос Аирес каде што работел пред претседателската кампања.
Со бројно обезбедување во ходниците на факултетот, Фернандез (60) се возеше со автомобил од претседателската палата.
Во костум со вратоврска, тој седеше трпеливо на стол додека студентите неколку часа го пишуваа завршниот испит.
Кога заврши, тие заедно позираа за семејна фотографија.
"Тој повеќе не е кандидат, туку претседател. Ова е историски ден, вакво нешто никогаш повеќе нема да се случи во мојот живот", изјави студентката Татјана Пасанини.
Фернандез, кој до неодамна беше релативно непознат во земјата, работеше нормално на факултетот во текот на целата кампања.
Во септември, тој отиде да држи предавања во Мадрид, исполнувајќи го ветувањето што го даде пред да почне со кампањата.
Тој ги испрашуваше студентите до октомври кога на изборите го победи конзервативецот Маурисио Макри.
Краткото враќање кај студентите се случува во пресрет на клучен период за неговата влада, која треба да ја извлече Аргентина од тешката финансиска криза и долгот што треба да го репрограмира од сопствениците на обврзници и Меѓународниот монетарен фонд.
Фернандез, кој беше поддржан од помладите гласачи, се обидува да покаже дека е еден од „обичните“ луѓе, па на социјалните мрежи објави фотографија на која свири гитара или како го носи своето куче на избирачкото место.
Левичарскиот перонист се возеше на својата инаугурација со сопствениот автомобил, мавтајќи низ прозорецот пред толпата што го пречека долж улиците на Буенос Аирес.