Пендаровски: Високата корупција е закана за држава

 Неспорно е дека постојано вршиме прилагодување на домашното право со правото на ЕУ што е наша стратешка цел.

 Но, она што е моја лична дилема, а верувам и на најголемиот дел од нашите граѓани е дали државните институции суштински или само формално ги имаат усвоено и ги следат европските вредности и принципи во оваа област, рече претседателот Стево Пендаровски во обраќањето на денешниот Регионален форум за борба против корупција на тема „Исполнување на ветувањето за проширување на ЕУ: 30 години добро управување и антикорупциски реформи во Централна и Источна Европа".

Претседателот Пендаровски повика на соработка меѓу институциите, невладиниот и приватниот сектор затоа што, подвлече, тоа е еден од успешните начини во справувањето со корупцијата, а транспарентноста и отчетноста се темели на доброто управување и владеење на правото.

– Долги години се занимавам со прашањата од областа на безбедноста и слободно можам да кажам дека во изминатите 10 до 15 години во нашата држава високата корупција прерасна во една од најголемите безбедносни закани за иднината на земјата. Тука морам да го издвојам т.н. случај „Рекет" кој дискредитираше голем дел од нашите напори и надежи за справување со криминалот и високата корупција. Лично не очекував дека носители на толку важни и одговорни функции толку ќе потфрлат во даден момент. Овој случај останува да биде лакмус за правната држава, а со тоа и тест за отпорноста од политички влијанија на клучните институции, истакна Пендаровски.

Според него, искрената борба за правна држава подразбира да се истражуваат криминалите на претходната, но и криминалите на актуелната власт, а истовремено е многу значајно да не се дозволи преку намерно застарување на предметите да се случи таканаречена скриена амнестија на сторителите на дела поврзани со високата корупција.

-Сметам дека е добро што се овозможи да постои континуитет и што предметите од поранешното СЈО беа преземени од редовното Обвинителство. Не постои земја членка на ЕУ која не ни укажува дека мора до крај да го истражиме тој огромен скандал во кој имаше милиони снимки кои мораат да имаат разрешница, во спротивно не може да очекуваме да не третираат како сериозна држава, потенцира Пендаровски. Тој очекува во наредниот период тоа да биде најтешката задача  со која системски и сериозно ќе се зафатиме откако ќе почнеме да преговараме со ЕУ.

Шефот на државата смета дека за ефикасна борба против високата корупција потребен ни е нов закон за  Јавно обвинителство кој ќе ги задоволува највисоките европски стандарди, наместо, како што рече, преку непринципиелни политички договарања зад сцена да ја компромитираме борбата со високата корупција.

Пендаровски се осврна на принципите на Конвенцијата на ОН за борба против корупцијата која укажува на тежината на проблемите и заканата што таа ја претставува за стабилноста и безбедноста, за демократските и за моралните вредности.

– Нам ни е неопходно системско справување со корупцијата и воспоставување нов вредносен систем за што е предуслов јасно изразената волја на релевантните политички фактори во државата, истакна претседателот Пендаровски  и повтори дека неопходните реформи во сферата на владеење на правото и правната држава не треба да ги правиме за да ги задоволиме критериумите за членство во ЕУ, туку за да ја вратиме довербата на граѓаните во институциите и во сопствената држава.

Маж е убиен пред училиште во Белград – затворени излезите од градот

Вечерва околу 19 часот, во Белград со истрел во главата е убиен 41-годишниот Марко В. пред неговата сопруга и двете деца.

Според Телеграф.рс, непознат маж му се приближил пред Основното училиште „Борислав Пекиќ“ во населбата Бежаниска коса и го застрелал во главата. Сопругата и двете деца биле со него во моментот на егзекуцијата.

„Истрагата е во тек на местото на настанот, а полицијата интензивно го бара сторителот на ова дело. За да се изврши пребарување, сите излези од Белград се блокирани и извршена е зголемена контрола врз лицата и возилата“, соопшти белградската полиција.

М. В. е Црногорец роден во Котор. Со години работел како морнар на прекуокеански бродови, пренесува Телеграф.

Зеленски ја одби оставката на украинскиот премиер

Претседателот на Украина , Володимир Зеленски утрово ја отфрли оставката од неговиот премиер Олексиј Гончарук и рече дека сака да му даде втора шанса на функцијата.

„Решив да ви дадам втора шанса на вас и на вашата влада“, рече Зеленски на состанокот со премиерот Гончарук, покажува видео објавено од претседателството.

Гончарук поднесе оставка откако беше заслужен за критиките на сметка на претседателот Зеленски во првата политичка криза на младиот претседател.

Според социјалните мрежи , Гончарук го опишал знаењето на претседателот за економијата како примитивно. Зеленски беше актер до изборот на претседател во април.

Претседателот не ги спомена тие изјави, но го замоли премиерот да ја подобри соработката со парламентот и да ги рационализира платите на високите владини функционери.

Плаќањето високи бонуси на службените лица последниве месеци предизвика скандал во земјата.

„Таквите плати не можат да бидат платени во Украина со актуелната состојба на нашата економија“, рече Зеленски.

Украина е една од најсиромашните земји во Европа.

Јапонскиот суд забрани работа на нуклеарна електрана

Јапонскиот Висок суд денеска му нареди на операторот на нуклеарната централа на островот Шикоку да го затвори реакторот заради загриженост за безбедноста во сеизмички активната област.

Високиот суд во Хирошима и  забрани на компанијата за електрична енергија „Шикоку“ да го користи реакторот на југозападниот остров Иката. Ова е втора наредба против употребата на реакторот бр. 3 во таа електрана.

Со тоа високиот суд ја поништи пресудата на понискиот суд.

Претседателот на судот Казутаке Мори во пресудата рече дека не може да ја исклучи можноста за активен дефект во близина на нуклеарната централа. Компанијата за електрична енергија „Шикоку“ не ја испитала доволно можноста за ризик  во радиус од два километри од електроцентралата, додаде Мори.

Судијата, исто така, посочи на грешка на Агенцијата за нуклеарна енергија (MRA) во процесот на издавање дозвола за продолжување со работа на електраната.

Електраната беше исклучена од дистрибутивната мрежа поради инспекција и требаше да биде вклучена во април. Компанијата одлучи да ги затвори останатите два реактори во електраната.

Тројца жители на соседната префектура Јамагучи поднесоа жалба во март минатата година на одлука на локалниот суд кој го одобри продолжувањето на работењето на третиот реактор.

Денешната пресуда на високиот суд е тежок удар за Владата на премиерот Шинзо Абе, која сакаше да ги реактивира реакторите. Исто така, ја поништи одлуката на NRA да продолжи со работа спорниот реактор.

НРА е основана по најсериозниот нуклеарен инцидент во историјата на Јапонија, тројното топење на електраната „Фукушима Даичи“ во 2011 година, откако ја погоди цунами.

Компанијата „Шикоку“ најави жалба против одлуката на високиот суд.

Од 33 нуклеарни реактори во Јапонија, во моментов работат само шест.

притисни ентер