Главниот протест се одвива на улиците на Мадрид за време на конференцијата на ООН за климатски промени ЦОП 25, што се одржува во градот од 2 до 13 декември.
Протестот под слоганот „Соочете се со климатската криза, светот се буди“ започна во Мадрид во 18 часот на станицата Аточа. На собирот му се придружи и младата шведска активистка Грета Тунберг и шпанскиот актер Хавиер Бардем.
Тунберг, кој ги започна протестите против климатските промени на глобално ниво во 2018 година, пристигна со ноќниот воз во Мадрид и прво одржа прес-конференција пред најавениот настан. 16-годишната активистка присуствуваше на Самитот на ООН во Њујорк, каде пристигна со брод и се врати во Европа со катамаран за да избегне користење на авион, а со тоа прати порака за емисијата на штетни гасови од авионите.
По денешниот марш, застапниците за животна средина организираат самит за социјална клима што започнува утре и трае до 13 декември, последниот ден на COP25.
Околу 200 потписнички на Парискиот договор, кои ветија дека ќе го ограничат затоплувањето на планетата до 2 Целзиусови степени, или дури 1,5 степени Целзиусови во однос на прединдустрискиот период, се обидуваат да постават уште поамбициозни цели во Мадрид.
Планетата сега е потопла за околу еден степен Целзиусов во споредба со пред-индустриското време. Меѓутоа, доколку температурите продолжат да растат со сегашното темпо, како резултат на емисиите на стакленички гасови, прагот од 1,5 степени поставен со Парискиот договор би се достигнал меѓу 2030 и 2052 година, велат експертите за клима на ООН.
Според извештајот на ООН, емисиите на СО2 се зголемиле во просек за 1,5 проценти годишно во последните десет години и нема индиции за застој.