Пендаровски: Нема напредок без вклучување на младите во процесот на носење одлуки

Без создавање механизми за младинско учество во процесот на донесување на одлуки, како и нивно охрабрување за активно учество, не можеме да очекуваме напредок и просперитет и тоа е насушна потреба на секоја држава.

Тоа денеска го изјави претседателот Стево Пендаровски во обраќањето на завршната конференција во рамки на проектот „Оспособување на младината за активно учество во процесот на донесување одлуки", што го спроведе Евро-атлантскиот Совет на Македонија и Амбасадата на Бугарија во Скопје.

– Во конкретниот проект се користат искуствата од соседна Бугарија со која имаме политички, социо-економски, историски и други сличности, а која, со оглед дека е членка на Европската Унија, од порано ги има апсолвирано прашањата кои ние денес ги разговараме. Во овој контекст е значајно што бугарската амбасада и финансиски го поддржа проектот што доволно зборува за перспективите за соработка, взаемна поддршка, споделување на искуства и ресурси. Убеден сум дека тоа искуство и она што беше препознаено и потврдено како добра практика ќе добие своја имплементација и кај нас, рече Пендаровски.

Истакна дека покрај донесувањето на законската рамка што ќе овозможи учество на младите во процесот на донесување на одлуки ние како општество треба да се соочиме и со еден друг и по мое мислење, поголем проблем, а тоа е апатијата и незаинтересираност на младите за општествените случувања и политичките процеси.

– Кај голем дел од нив постои разочараност и пасивизирање. Огромен процент од младите својата иднина ја гледаат надвор од својата земја и нивните планови и визија не се поврзани со нивната татковина. Во време на глобализација и зголемена мобилност дури и побогатите земји тешко можат да ги задржат младите кои се во потрага по подобри услови за живот, работа и усовршување и имаат потреба од нови предизвици. Сепак, тоа не не ослободува од обврската да обезбедиме далеку подобри услови и перспективи за нашите млади. Овде да немаме дилема: без да се слушне нивниот глас, без нивно квалитетно учество, без успешни младински политики тоа ќе биде невозможно, рече Пендаровски.

Порача да се искористат искуствата на соседите, како и искуствата на постарите европски демократии, да понудиме стратегии, насоки и препораки, да го чуеме гласот на младите, бидејќи без нив и нивното активно учество, како што истакна Пендаровски, не можеме да се надеваме на развој и благосостојба и оти без нив, нашата земја нема иднина.

Претседателот на Евро-атлантскиот совет Исмет Рамадани рече дека овој проект е во соработка со Амбадсата на Бугарија во земјата, и во тој дух Договорот за добрососедство со Бугарија е голем чекор напред во унапредувањето на нашите односи. – Членството во НАТО е цврста гаранција за поголема слобода, демократија, правда и економски развој, рече тој.

Министерот за образование и наука Арбер Адеми истакна дека младите мора да бидат вклучени во одлуките што ги засегаат и оти е потребен континуиран фокус кон нив и нивните потреби.

Истакна дека незадоволните заминуваат, а тоа значи, како што рече Адеми, непоправлива штета за државата која губи огромен кадровски потенцијал.

Адеми рече дека образованието е еден од факторите од кои најмногу зависи капацитетот на секоја држава.

Соломон Паси, почесен претседател на Атлантски Клуб на Бугарија истакна дека кога земјава ќе биде и физички во НАТО, членството во ЕУ ќе биде многу полесна задача.

– Ќе седите на иста маса со истите луѓе, зборувате со нив за истите проблеми, не ве третираат како аспирант како некој што чука на вратата, туку ве третираат како еднаков член. Политиката е трговија со услуги. Штом сте во НАТО вие ќе почнете да тргувате со овие услуги, ќе станете дел од семејството, истакна Паси.

Се осврна на влијанието и на Кремљ на Балканот, оценувајќи дека ова влијание се зајакнува и ја убива демократијата, поддржувајќи го популизмот.

Проектот има за цел да ги мапира проблемите и предизвиците за учество на младите во Македонија, да понуди компаративен преглед за вклучувањето на младите во Бугарија, како интегрирана земја во евро-атлантските структури, и да ги адресира главните теми преку дискусии, компаративна анализа и препораки. Долгорочната цел на оваа акција е да се поттикне поголемо учество на младите во процесите на донесување одлуки преку развој на капацитети за активен ангажман на младите и преку поттикнување поголема мобилност и соработка. Покрај ова, акцијата е насочена кон зголемување на

разбирањето за НАТО и ЕУ и изградба на позитивен став за унапредување на евроатлантските вредности. /МИА

Адеми: Интеграцијата во образованието – предуслов за мултиетничко општество

Министерот за образование и наука, Арбер Адеми учествуваше на настанот за доделување признание на наставниците на средните училишта на Град Скопје, соопшти МОН.

Наставниците од средните училишта преку својата волонтерска работа, минатата година беа директно вклучени во проектот за реализација на заеднички часови меѓу учениците кои учаат на албански и македонски јазик.

Оценувајќи ја интеграцијата во образованието како многу важен фактор во напорите за градење мултиетничко општество и мулчтиетничка држава, министерот Адеми рече дека за неколку години, МОН ги поддржува училиштата и логистички и финансиски да организираат активности што промовираат соработка меѓу младите луѓе од различни етнички заедници. „Преку ваквите активности, а особено заедничките часови во редовната настава, кај учениците се губи стравот од непознатото и се намалуваат предрасудите. Тоа е основен предуслов за младите да се среќаваат почесто, да учат, да работат заедно и да креираат пријателства„ рече министерот Адеми.

При креирањето на образовните политики и практики, додаде министерот, неретко институциите се соочуваат со ситуации во коишто треба да се донесат храбри, но вистински одлуки. Токму таква, според Адеми, беше и оваа одлука, односно активност за одржување на заеднички часови во редовната настава со ученици кои учат на различни наставни јазици, којашто се направи внимателно и заедно со сите чинители, за ефектот да биде најдобар.

„Знаеме дека промените не се случуваат лесно и дека за успех потребни се мотивација, упорност и истрајност. Но, нашата иднина зависи од заложбата за позитивни промени кај сегашните и идните генерации„. Токму затоа, како што изјави министеот МОН со сите свои капачитети е фокусирана кон инвестирањето во квалитетно образование и кон негување на хармонични односи кои се темелат на почитување на сите различностите,се наведува во соопштението на Министерствтото за образование.

Демократите објавија обвинение против Трамп

Американските демократи денес објавија формално обвинение против претседателот Доналд Трамп, во кое го обвинуваат за злоупотреба на службената должност и опструирање на Конгресот, поради што побараа негово повлекување.

Претставничкиот дом треба да гласа за наводите во текот на следната недела.

Тој дом со демократско мнозинство скоро сигурно ќе гласа за повлекување на републиканскиот претседател, отворајќи го патот за судењето во Сенатот, контролиран од републиканците, што веројатно ќе започне во јануари.

Претседателот на Комитетот на судски дом, Џеролд Надлер, изјави пред новинарите дека Трамп се заканил на Уставот на Соединетите држави, му наштетил на интегритетот на претседателските избори во 2020 година и ја загрози националната безбедност.

„Никој, дури ни претседателот не е над законот“, рече Надлер.

Да потсетиме, на 24 септември демократите покренаа истрага за тврдењата дека Трамп извршил притисок врз Украина да започне истрага за нивниот демократски кандидат за претседател на изборите во 2020 година, поранешниот потпретседател Џо Бајденж.

Демократите го обвинуваат Трамп дека ги злоупотребил своите овластувања негирајќи ја воената помош на Украина и понудил можна средба во Белата куќа со украинскиот претседател Володимир Зеленски за да објави дека започнува истрага за Бајден.

Републиканците ги обвинуваат демократите дека сакаат да ги стават под сомнение резултатите од изборите во 2016 година со „лов на вештерки“ против Трамп, кој ги отфрла сите обвинувања.

Трамп во Сенатот веројатно нема да биде прогласен за виновен затоа што Домот го контролира неговата партија.

Густ чад го прекри Сиднеј – Пожарите и натаму беснеат (ВИДЕО)

Густ чад од големите шумски пожари се надви деенска над Сиднеј и навлегол во згради така што се слушнаа насекаде аларми за чад, а заради лошата видливост, запрен е сообраќајот.

На оддалеченост од шеесет километри огнот уништува области на сува и запалива вегетација северозападно од Сиднеј, најголемиот град во Австралија и шири опасен чад низ Источниот брег и над Тихиот океан, при што пожарите достигнуваат до Нов Зеланд, покажуваат сателитските снимки.

„Овој чад е без преседан и овие услови се опасни по здравјето на луѓето“, изјави Ричард Бром, претставник на владата на Нов Јужен Велс, задолжен за здравјето и животната средина.

Бром рече дека многу луѓе можат да имаат симптоми на иритација на мукозните мембрани на грлото, носот и очите, а оние кои се изложени на ризик се лицата со здравствени проблеми, малите деца и постарите лица. Индексот за квалитет на воздухот во Сиднеј денеска беше 11 пати поголем од прагот што се смета за опасен во делови од градот, покажуваат податоците на владата.

Повеќе од две недели, шумските пожари го покриваат Сиднеј со чад и пепел, каде живеат повеќе од 5 милиони луѓе.

Поради маглата, небото е портокалово во текот на денот, видливоста е намалена и многу луѓе носат маски.

Иако не е издадена официјална наредба за евакуација, многу жители на погодените области одлучија да ги напуштат своите домови, изјави за Ројтерс градоначалникот на Хоксбери, Бери Калверт.

Повеќе од стотина пожари се активни во источните австралиски држави - Нов Јужен Велс, Викторија и Квинсленд, многу од нив уште од ноември.

Најмалку четири лица загинаа во пожарите, а повеќе од 680 куќи се уништени, а запалената област е со големина од еден милион хектари.

Фериботите во Сиднеј не работат заради намалена видливост.

притисни ентер