Кофинансираните специјализанти за утре најавија протест, за Филипче нивното барање е легитимно

Група од 130 лекари на кофинансирана специјализација за утре најавија протест пред Министерството за здравство, на кој ќе го изразат своето незадоволство од условите и договорите по кои работат. 

 Како причина за протестот го наведуваат тоа што нивните специјализации не се вклопуваат во Законот за здравствена заштита.

За протестот, кој беше најавен и на Фејсбук профилот на Здружението на лекари специјализанти – ЗЛС, министерот за здравство Венко Филипче вчера изјави дека дознал ден претходно, при што напомена дека нивното барање го смета за легитимно.

Тој потенцира дека имале работна средба, а закажана е и нова за да видат што може да се направи, затоа што, како што посочи, станува збор за потреба од измена на Закон за здравствена заштита.

-Ве известуваме дека на ден понеделник, 18.11.2019 година, ќе се организира протест на кофинансираните приватни специјализанти пред просториите на Министерството за здравство поради следниве причини: Нашите кофинансирани приватни специјализации не се вклопуваат во Законот за здравствена заштита, бидејќи содржат елементи и од приватни и од државни и не се целосно дефинирани, се вели во нивната објава.

Почитувањето, односно непочитувањето на договорот од страна на Јавните здравствени установи за трансформација на работниот однос од определено на неопределено време по завршувањето на специјализацијата  се уште претставува проблем, додава ЗЛС, со тоа што млади доктори кофинансирани кои се завршени специјалисти добиваат плата во висина на една просечна плата на ниво на Република Македонија.

-И покрај тоа што земаме пониска плата од нашите колеги кои немаат никаква обврска кон државата (ниту да работат во одредена институција, ниту да враќаат енормни суми на државата), плаќаме   одреден дел од нашата партиципација за специјализација сами и годините што треба да ги одработиме за установата се исти како и државните специјализанти, финансиите што треба да ги вратиме се повисоки од тие на државните специјализанти кои се во однос 1:2, а ние кофинансираните сеуште остануваме со однос 1:5  (5 пати повисоки од износот кој што е кофинансиран) доколку би се откажале од истата, нагласува ЗЛС.

Во врска со висината на нивната плата, велат изнесува колку една просечна плата на ниво на Република Македонија, која е пониска од платата на државен специјализант во иста „ЈЗУ", кој е со иста ангажираност, исти услови, ист обврзувачки договор, како и кофинансираниот. Со тоа, како што појаснува ЗЛС кофинансираните специјализанти не се опфатени со никакво покачување на плата за лекари специјализанти предвидено со закон.

-Очигледно овој пилот проект на кофинансирана специјализација има суштински проблеми кој треба детално да се разгледаат. Бараме трансформација на работниот однос од определено во неопределено и прецизно дефинирање и усогласување на решенијата за горе наведените проблеми во најкраток можен рок, се нагласува во нивната објава на Фејсбук.

Министерот Филипче вчера истакна дека во текот на минатата недела имал состанок со кофинансираните специјализанти и нагласи дека оваа Влада е првата, која одвоила средства во 2018 година приватните специјализанти за прв пат да бидат платени за својот труд.

-Тие до тогаш работеа практично без пари. Кофинансираните специјализанти се една посебна група која што има направено посебни договори заради тоа што преку специјализацијата тие имаат направено и договор на определено работно време.

Согласно Законот, кога ја завршуваат специјализацијата, нивниот работен однос се трансформира во работен однос на неопределено работно време, истакна Филипче.

За него е сосема легитимно барањето да се направи трансформација уште за време на специјализацијата за што во овој момент не постои законска можност, а се со цел да го добијат зголемувањето на средствата. кое сега го добиваат здравствените работници.

-Ние договоривме дека ќе направиме неколку работни средби во рамки на Министерството со правната служба во рамки на нашата соработка со Фондот за здравствено осигурување и веројатно со пратениците со цел да се види каква е можноста тој Закон во тој дел да се промени. Закажавме уште една средба за тогаш кога ќе ги имаме информациите во текот на следната недела за да видиме што и како можеме да направиме во однос на динамиката за тоа што следува во Собранието, истакна Филипче./МИА

Влада: Двотретинско мнозинство за Законот за одбрана, наместо лицитација со ратификацијата

Двотретинско мнозинство очекуваат од Владата за Законот за одбрана, кој е ставен утре на седница на Собранието. 

Извори од Владата велат дека наместо да се лицитра со датумот за ратификација на Протоколот за членство во НАТО, сега е момент партиите да гласаат за Законот.

Единствен аргумент на ВМРО-ДПМНЕ, нагласуваат од Владата, во моментов е дека нема да дадат поддршка затоа што на законот стоело името Република С. Македонија и додаваат дека истото име стои и на ратификацијата, која треба да помине во Собранието.

Неодговорно е брифираат од Владата, на последниот чекор пред НАТО да се тера партиска политика.

Шпанија би требало до крајот на јануари да го ратификува Протоколот за членство на Македонија во НАТО, според ветувањата и прогнозите кои му ги дал шпанскиот премиер Педро Санчез на неговиот македонски колега Зоран Заев на средбата на маргините на Самитот на НАТО во Лондон.

Санчез изразил надеж дека сите процедури во Шпанија околу формирање на Владата и комлетирање на Парламентот со сите негови работни тела би завршило до почетокот на следниот месец, а ратификацијата би се случила на крајот на истиот месец.

Во врска со тоа дали постои план Б, доколку Шпанија не го ратификува протоколот дотогаш, а нашето Собрание се распушти на 11 февруари поради изборите најавени за 12 април, од Владата брифираат дека може да разбоработат варијанта, според која ќе дадат предлог за условно ратификување, односно да се донесе одлука во Парламентот и таа да биде објавена во Службен весник, откако Протоколот ќе се ратификува во Шпанија.

-Постои таква пркса, но не би сакале да ја применуваме и тоа е право на Владата, таа е предлагач, велат извори од Владата и додаваат дека ова прашање не треба да се потлизира од опзоцијата, која нема право да дава таков предлог.

Со нашето членство во НАТО, појаснуваат од Владата, ние и формални и фактички ќе бидеме инкорпорирани во воените структури на Алијансата.

Големи се придобивките за земјата по влезот во НАТО, земјата ќе има политички прашања, понекогаш тешки политички прашања, но тие нема да бидат егзистенцијални. Сепак, одговорноста е на нас самите, додаваат владини избвори, бидејќи не постои „НАТО, кој може да те спаси од твојата глупост".

Не сите земји-членки исто го искористиле членството, некои се рекалсирале и мислеле дека со влезот ја завршиле својата работа, но, како што велат од Владата, земјата ќе продолжи да работи во насока на она што го ветила.

Акцент меѓу другото ќе биде ставен на модернизација на Армијата, пред се опремување на лесната пешадија, бидејќи таа ни е главниот капацитет, со кој ќе се декларираме во НАТО.

Во однос на ветувањата од Велс, два отсто од Буџетот да одвојуваме за НАТО и 20 отсто од целокупниот буџет во земјата да оди за одбраната – првото според плановите ќе се реализира до 2024 година, а второто веќе следната година.

За следната година е планирано и пополнување на НАТО структурите со наши луѓе. Мисијата во НАТО ќе брои околу 20 луѓе од одбрана и десет до 15 од МНР и други институции.

Од Владата очекуваат догодина 80 отсто од одбранбената мисија да биде пополнета, а во рамки на НАТО командата како структура Северна Македонија ќе има околу 20 позиции.

Земјата веќе придонесува во НАТО операциите, а тие бројки со членството ќе се зголемуваат.

Земјата има декларирано лесна пешадиска борбена група, која брои околу илјада луѓе, кои треба да бидат соодветно опремени, извежбани, обучени, да бидат на располагање. Од Владата очекуваат таа борбена група целосно да биде подготвена околу 2024/25 година. 

СДСМ: Детски додаток добиваат над 27.000 деца, а 8.600 образовен додаток

Имплементирањето на мерките предвидени во Изборната програма од 2016-та година и бенефитите што ги добиваат најранливите категории на граѓани и граѓанки покажува дека навистина сме на прав пат!

Со реформата во социјалната заштита воспоставивме систем за социјална заштита на семејствата што живеат во сиромаштија и воведовме начин за извлекување од сиромаштијата. Го олеснивме пристапот до детскиот додаток, но и ја зголемивме сумата што по овој основ ја добива едно семејство.

Воведовме и нови додатоци за поддршка на деца од семејства кои се во системот на социјална заштита и деца од домаќинства со ниски примања.

Од воспоставувањето на оваа реформа во мај 2019та година, детскиот додаток им се исплаќа на 27.130 деца, а образовниот на 8.678 деца, што е за три и пол пати повеќе од претходно.

До крајот на реформата очекуваме околу 70.000 деца да примаат детски и образовен додаток, што ќе биде за 20 пати повеќе од претходно. Сето ова го правиме за да ја намалиме детската сиромаштија и да им го вратиме достоинствениот живот на луѓето, преку поддршка при вработување и нивно вклучување на пазарот на труд.

Веќе за 2020та година предвидени се 600 милиони денари за исплата на детски додаток, а 672 милиони денари за образовен додаток.Почитувани,Грижата за нашите сограѓани и сограѓанки кои живеат во сиромаштија е приоритет на Владата предводена од Социјалдемократскиот сојуз на Македонија.

Градиме општество кое отвора еднакви шанси за сите.На прав пат сме!

Прес конференција на СДСМ, Мерсиха Смаиловиќ, членка на Комисијата за труд и социјална политика на СДСМ

Вечерва во „Само вистина“ гости ќе бидат Исмет Рамадани и дипломатот Ристо Никовски

Дами и господа! Претстои жешка зима пред малите екрани, партиите ги подгреваат страстите, додека нови бомби долеваат масло во огнот. 

Дали 12 април ќе остане во заден план, ќе успеат ли сигналите за евентуален датум за преговори во март да ги истуркаат митинзите од врвот на партиските агенди, одговори бараме од политичкиот аналитичар Исмет Рамадани и дипломатот Ристо Никовски во вечерашната „Само вистина“.

Успеа ли двојазичноста да ја доведе до колапс владината коалиција или ќе се одржи во живот, претставувајќи розева слика сред магливото и сиво предизборие? Води ли патот до Брисел преку Венеција, колку препораките ќе влијаат на меѓуетничките односи и дали ќе се претворат во ветувања пред „своите“?

Во пресрет на техничката Влада, првите луѓе од власта и опозицијата се се’ почесто меѓу обичните граѓани, кои пак очекуваат правда за нивниот табор. Проветрувањето на судиите ставено на стенд-бај, за обвинителите полни раце работа, а Боки Тредичи и сињора Катица фатени во сопствената мамка. Кој го има клучот за вистински реформи во судството или пак ќе остане Македонецот заложник на политичките хајки?

НАТО ни посака добредојде, но имаме ли дипломатски капацитети да ја истуркаме работата со ЕУ? Кој ќе ни помогне и имаме ли ветер во грб од меѓународната заедница, колку се добронамерни соседите, создава ли некој застој или да очекуваме повторно да ни се спушти рампата пред нос. Дали можниот нов неуспех ќе влијае врз симпатиите кон власта, која вложи најмногу напори токму за датум, но остана само со горчлива кнедла, вечерва во „Само вистина“ дебатираме со Исмет Рамадани и Ристо Никовски.

притисни ентер