Политико ги открива петте писмени прашања до Оливер Вархелји

 Политико Европа ги доби петте прашања кои европратениците му ги испратија на кандидатот за комесар за проширување отфрлен денеска поради недоволни гаранции за независност од владата на Виктор Орбан.

Првото прашање е поврзано со азилот што му го додели Орбан на поранешниот македонски премиер, Никола Груевски.

-Дали ќе се чувствувате врзани или под влијание во вашите обврски како еврокомесар од изјавите што ги даде вашиот премиер во врска со вашата улога на 15-ти октомври во Баку и која ќе биде вашата проценка доколку било која влада на земја членка на ЕУ му додели азил на осуден поранешен премиер од земја кандидат?

За потсетување, Виктор Орбан во Баку изјави дека откако Унгарија ќе го добие портфолиото проширување тоа ќе и биде од помош на Турција, иако комесарите имаат должност да бидат целосно независни од владата што ги номинира како и од било која политичка партија.

Второто прашање до Вархелји се однесува до неговиот став за усвојување на санкции против земји каде се прекршуваат човековите права, оваа тема моментално се дебатира во Советот и Унгарија е една од земјите кои имаат резерви по ова прашање.

Европратениците бараат од Унгарецот да одговори каков извештај за напредокот ќе поднесе за земја кандидат во случај таа да "го ограничи просторот за опозицијата, речиси целосно да ги контролира медиумите, да ги тера судиите порано да се пензионираат, да ги ограничи академските слободи и да не се бори против корупцијата и организираниот криминал".

-Која ќе биде вашата препорака во извештајот за напредокот, прашуваат пратениците.

Пратениците бараат од Вархелји да се изјасни и во однос на јужното соседство на ЕУ и на миграцијата, во која тој би имал удел од аспект на надворешната политика. Вархелји треба да одговори каква поддршка планира да им обезбеди на земјите од јужното соседство и да каже дали гарантира дека ќе ја суспендира помошта во случај некоја од тие земји да ги прекршува човековите права, вклучително и правата на мигрантите и бегалците.

Конечно, петтото прашање се однесува на технички аспекти од претпристапните фондови за земјите од Западниот Балкан, како и барање од Вархелји да се изјасни колкава треба да биде стапката на оваа помош. Пратениците бараат од него да каже и што планира да преземе за да го намали влијанието на надворешните сили на западниот Балкан.

Верхелји има до понеделник напладне да поднесе задоволителни одговори на овие прашања за да добие зелено светло, во спротивно можно е да биде закажано ново сослушување./МИА.

Изложба на скулптурот Слободан Милошески во Гевгелија

 Во Гевгелија синоќа беше отворена изложба на скулптури од галериски формат насловена „Рефлексија на диферентни модулации," од авторот Слободан Милошески.

На изложбата која е поддржана од Министерството за култура, Милошески пред гевгеличани се претстави со 15 скулптури.

Критичарите на уметноста го сметаат за еден од најдобрите македонски скулптори во групата уметници кои работат во доменот на апстрактно – минималистичкиот концепт поради тоа што користи едноставни геометриски форми и индустриско импровизирани материјали за создавање дела од разни размери.

-Најважно е што неговите скулптури имаат изразен динамизам во кој дури и гледачот е вклучен да учествува во тој динамизам станувајќи вовлечен во нивниот раст, со што тие, скулптурите, се чувствуваат како длабоки човечки движења во потрага по спокојот,рече на отворањето гевгелиската уметничка Мирјана Крстева Массетти.

Авторот Слободан Милошески досега реализирал повеќе од 20 самостојни изложби и учествувал на 60 групни изложби во земјата и странство на кои добил 13 награди и признанија.Член е на ДЛУМ од 2009 година, а моментно работи како доцент на Ликовната академија при универзитетот „Гоце Делчев" во Штип. /МИА

ВМРО-ДПМНЕ: Ветениот поврат на ДДВ заврши како фијаско

Ветениот поврат на ДДВ заврши како фијаско. Наместо ветените 500 евра од поврат на ДДВ, граѓаните добиваат по 1.000 денари и тоа не сите, и тоа ќе го добијат помалку од 10% од потенцијалните корисници на оваа мерка на владата на СДСМ.

Но затоа, милиони евра завршуваат во џебовите и сметките на функционерите од власта чии фирми добиваат тендери, јавни набавки, грантови и слични повластици од народните пари.

Додека ја замајуваат јавноста со 1.000 денари од поврат на ДДВ и слични популистички мерки, кланот Заеви стана најбогатиот клан не само на Балканот туку и пошироко. Граѓаните јасно гледаат дека од ден во ден се потешко се живее обичниот човек, ама затоа цветаат бизнисите со марихуана, градежните, транспортните и многу други фирми кои ги поседуваат Заеви.

Центар за комуникации на ВМРО-ДПМНЕ

Средношколски натпревар „Лидер на струка" во Кочани

Натпреварот е со поддршка од Министерството за образование и наука и од Центарот за средно стручно образование и обука, а вклучени се и професори од високообразовните установи во државата.

Средното општинско училиште „Гошо Викентиев" е домаќин на државниот натпревар „Лидер на струка" на кој учествуваат средношколци од 15 стручни училишта кои се натпреваруваат за лидер на машинската, електротехничката и сообраќајната струка, како и за најдобри ученици во одредени стручни профили.

– Натпреварот има две компоненти, стручно-теоретски и практичен дел, што е од голема важност затоа што учениците, но и нивните наставници можат да видат до каде стигнале со своите знаења, вештини и компетенции. Ова е можност за учениците меѓусебно да се компарираат, а истовремено и компаниите да видат до кое ниво тие се обучени и осспособени, за во иднина и практично да соработуваме едни со други, истакна Зоран Јовчевски од Центарот за стручно образование и обука.

Една од целите на натпреварот е да им овозможи на учениците нивното знаење и вештини да го преточат во иновации што ќе можат подоцна да ги користат во наставниот процес, но и во практичната работа.

Истовремено, СОУ „Гошо Викентиев" ја продолжува соработката со компанијата „Амфенол" од Кочани со која почна обука на млади од 19 до 29 години за нивно вработување. Покрај донираната опрема, компанијата ја реновираше работилницата во која дел од часовите по практична настава ги изведуваат учениците, а за време на распустите ќе се врши обука на невработени лица./МИА

притисни ентер