Изборниот процес вчера помина без инциденти, во мирна, безбедна и демократска атмосфера, оцени министерот за внатрешни работи Панче Тошковски. Информираше дека во текот на изборниот ден евидентирани биле 12 случаи на фотографирање на гласачко ливче, 2 случаи на кинење на гласачкото ливче, 6 пријави за нудење поткуп, 15 пријави за агитирање и други незначителни нерегуларности, но не се евидентирани посериозни инциденти насочени кон нарушување на регуларноста на изборниот процес.

„Без сомневање, мирните и безбедни избори се резултат на добрата соработка помеѓу полицијата, државната изборна комисија и сите други чинители кои беа вклучени во спроведувањето на овој изборен процес кој помина без пречки и поголеми инциденти. Во тој контекст сакам да изразам благодарност до полициските службеници кои со својата посветеност и професионализам придонесоа за одржување на безбедноста на избирачките места и соодветно постапуваа онаму каде што беа евидентирани изборни нерегуларности.“

И според оценката на претседателот на Државната изборна комисија, Александар Даштевски, изборите поминале во демократска атмосфера. Имало мали проблеми од техничка природа на некои избирачки места, најмногу поврзани со уредите за идентификација, но екипите на ДИК реагирале навремено.

„Помина мирно и достоинствено, немаше никакви провокации. Сепак треба да цениме дека 99 посто од работите поминаа како што треба. Ако имало недостатоци, ние тоа го менаџиравме постојано, цело време бевме концентрирани, поради тоа сметам дека помина добро денот на изборите. Имавме неколку интервенции во Куманови и во цела Македонија, каде што снемуваше батерии и кабли за се да помине во најдобар ред.“

Во текот на изборниот ден до затворањето на избирачките места, на електронската адреса на Јавното обвинителство на Македонија не пристигнала ниту една пријава за кривично дело поврзано со изборите, информира од таму..

Тошковски соопшти дека врз основа на пријавите што ги добиле, констатирани биле 6 прекршоци, а ќе бидат поднесени и 2 кривични пријави, една за кривично дело “Повреда на тајноста на гласањето“и една за „Повреда на избирачко право“.

Само еден час по затворање на гласачките кутии и првите неофицијални резултати, синоќа почна прославата на ВМРО-ДПМНЕ за победата на Гордана Силјановска Давкова во првиот круг од претседателските избори.. Со знамиња во раце, факели, зурли и тапани симпатизерите се веселеа пред седиштето на партијата, а откако беше и официјално потврдено дека предноста во гласовите е двојна пред кандидатот на СДСМ Пендаровски, им се придружија и Силјановска и лидерот на ВМРО-ДПМНЕ Мицкоски..

Целото раководство на ВМРО-ДПМНЕ беше собрано во партиската зграда за да ги проследат заеднички резултатите од гласањето.. На прес конференција Силјановска кажа дека исходот за неа бил неверојатно инспиративен, се заблагодари на гласачите и рече дека во вториот круг очекува поддршка од сите кандидати.

„Немам зборови со кои можам да ја изразам благодарноста, напати дури се срамам зарем е можно толку луѓе вака да реагираат. Не мислам дека сум посебна од многу работи, само знам дека она што ќе го ветам ќе го остварам на мој начин. Во тоа ве уверувам, од првиот ден. Ова е крајот на првиот круг, доаѓа вториот круг. Јас ќе се однесувам со должна почит кон мојот противник и очекувам таков однос од негова страна.“

Потоа, прес конференција одржа и лидерто на партијата Христијан Мицкоски, придружуван од Силјановска и носителите на изборни листи, на која оцени дека вчерашната победа е најголема од позиција на опозиција и само најава за тоа што ќе се случи на 8 мај. Кажа и дека разговарал со Травари, но без конкренти детали за евентулна соработка..

„Пред да се обратам се слушнав со албанската опозиција со господинот Арбен Таравари му честитав на резултатот и му посакав успешни парламентарни избори и идна влада во Македонија.“

Ден по прославата, од партијата велат дека продолжуваат со работа на терен, за вториот круг на 8 мај да заокружат двојна победа заедно со парламентарните избори.

„Вчера се случи почетокот на крајот на власта на СДС и ДУИ. Граѓаните дадоа жолт картон на корумпираната власт, и црвен картон на политичките партии кои донесоа понижувања, национален срам и порази. Вчера се случи политичко цунами, кое ќе финализира на осми мај со уште поголема победа за ВМРО-ДПМНЕ и испраќање на СДС и ДУИ во опозиција. “

За разлика од сегашната двојна предност, на претходните избори во 2019 година, Силјановска и Пендаровски беа речиси изедначени во првиот круг.. Тогаш таа освои околу 318.000 гласови, 4.000 помалку од Пендаровски..

Кандидатката за пратеник во ИЕ 1 во Собранието на Македонија на претстојните парламентарни избори, од редовите на Движењето ЗНАМ – За наша Македонија, проф. Д-р Катерина Тодоровска, денеска одржа прес конференција, на која се задржа на тоа зошто Движењето се определило во своите основни документи да ги стави Илинден и АСНОМ.

Таа рече дека современата македонска држава е формирана благодарение на вековната борба на македонскиот народ и останатите жители, за самостојна држава, каде би биле свои на своето. Тодоровска објасни дека во историјата постојат формално, пишано, и неформално, непишано, право, како што го толкуваат историчарите.

„Создавањето на државите, без исклучок, во историјата се одвивало врз основа на стекнато право коешто ние го третираме како непишаното право.

Тоа значи дека еден народ може да се повика на историско право за создавање на нова и опстојување на новата држава само врз основа на два принципа. Првиот е принципот на континуитет, т.е. доколку некој народ во минатото имал сопствена држава со сите законски и правно регулирани перформанси. Вториот е принципот на крвта, т.е. колку крв е пролеана за таа територија, за тој народ“. Тодоровска рече дека ние како Македонци не можеме да се повикуваме по првиот принцип, бидејќи сме немале некоја царска лоза помогната од странски династии како што е тоа случајот во создавањето на државите на нашите соседи, а што се однесува до вториот, принципот на крвта, Илинденското востание и АСНОМ се најголемите и најкрвави показатели за потребата на македонското население да биде самостојно и е подготвено да се жртвува за својот сон - своја држава. За тоа, како што рече таа, сведочи и фактот што ниту една од странските држави не се потрудила ниту да помогне, ниту да ја смири состојбата кога цели села во крушевско по Илинден, заедно со жителите биле пеплосувани. Тодоровска додае дека Крушевската република и нејзниот Манифест се одраз и израз на најдемократска политичка творба во почетокот на 20. век. Следната жртва на македонскиот народ се годините од народно-ослободителната војна 1941-1944 година, која била крунисана со АСНОМ и неговите одлуки.

Благодарение на АСНОМ биле донесени шесте најважни документи за формирање на македонската државна единица, меѓу кои и Решението за прогласување на АСНОМ за Врховно Законодавно и Извршно Народно претставничко тело, како и Прогласот на Првото заседание на АСНОМ до македонскиот народ и до целото население кое живеело во македонската држава.

„Документите за историјата на македонската држава од 12 век наваму, а со тоа и најзначајните документи од Илинден и АСНОМ се чуваат во Државниот архив. За жал таа бесценета документација денес е сместена во несоодветни услови, нешто што ќе бара итна реакција на новата власт за нејзино враќање во наменската зграда. Сите ние што знаеме дека историјата е учителка на животот, но и патоказ за иднината, знаеме и колкава е важноста на бесценетата документација која говори за македонското минато во креирањето на иднината на македонската драва.

Затоа како совесни чувари на македонското минато, ние имаме обврска да ги зачуваме, покрај другите, и документите од овие два грамадни историски столбови на македонската историја, Илинден и АСНОМ“, рече Тодоровска и додаде дека Програмата “Проглас за достоинствена Македонија” на Движењето ЗНАМ – За наша Македонија се залага за обезбедување на патот од минатото кон иднината, вложувајќи се максимум за Македонија, преку максимум заштита на историските корени и националните интереси на македонската драва.

Запрашана зошто сега се покренува ова прашање кога со уставните измени при промената на името делумно се редефинираше прогласот од АСНОМ, кои се позициите и што се бара, Тодоровска одговори:

„Едно е да се редефинира, друго е историја. Иторијата не трпи редефинирање, не трпи туширање. Најмалку пак трпи произволност. Она што е многу битно сега е да си ја заштитиме нашата документација. Да ги заштитиме сите темелни документи коишто ги имаме. Доколку се отвора Уставот треба да се говори многу искрено и многу отворено за сите прашања и сите грешки коишто се направени. Она што досега нам, како на историчари, најмногу ни пречи е ставот на партиите коишто имаат едно чувство дека се непогрешливи. Непогрешливоста не постои секој од нас може да згреши, но секој од нас треба да си ја признае грешката, да си ја исправи грешката и на крајот ние сме сите менливи и минливи, но Македонија мора да постои“, потенцира Тодоровска.