Германски „Герешајмер" ја почнува изградбата на првата фабрика во ЈИЕ со седиште во Скопје

Германската компанија „Герешајмер" денеска во Технолошко индустриската развојна зона Бунарџик ќе ги постави темелите на новата фабрика за медицинска пластика.

Ова е прва фабрика на германската компанија во Југоисточна Европа, а земјава беше избрана како поволна бизнис дестинација во конкуренција со Србија и Романија.

На свеченоста ќе се обрати премиерот Зоран Заев, вицепремиерот задолжен за економски прашања, Кочо Анѓушев, министерот на економија Крешник Бектеши и директорот на ТИРЗ, Александар Младеновски.

Инвестицијата ќе се реализира во повеќе фази, а во план е да бидат отворени 400 нови работни места. Ова е втора инвестиција по потпишувањето на Протоколот за членство на земјава во НАТО.

Договорот беше потпишан во март годинава, а новата инвестиција тогаш ја најавија премиерот Зоран Заев и вицепремиерот за економски прашања Кочо Анѓушев.

– Договорена е огромна инвестиција, втора по потпишување на протоколот за членство во НАТО, што значи дека инвеститорите ја препознаваат земјата како стабилна и сигурна дестинација, изјави тогаш премиерот Заев.

Со производството, според првичните најави, фабриката ќе почне кон средината на следната година.

– Ќе градиме нова фабрика во Скопје како дел од нашата стратегија за проширување во Европа. Планираме значителни инвестиции во технологија и во машините. Во план е да имаме 400 вработени. А ја цениме и можноста за натамошен развој во иднина. Планираме изработка на производи во фармацевстката и медицинската индустрија. Ја избравме  Македонија како идеална локација за проширување на нашето производство. Земјата нуди добра инфраструктура, ниски трошоци и обучен персонал, како и одлична поддршка од властите, порача Дитмар Сиемсен, извршен директор на „Герешајмер" во видео пораката објавена кога беше потпишан договорот.

„Герешајмер" има 50 фабрики во 13 држави, а вкупниот промет на компанијата е 1,3 милијарди евра.

Корса исфрли цистерна од надвозник – Страшна сообраќајка во Словенија (ВИДЕО)

Попладнево во Словенија се случи страшна сообраќајна несреќа кога Опел Корса удри во цистерна , што се преврте и падна од надвозникот.

Унгарски возач (53) од камион цистерна загина денеска во сообраќајна несреќа во Словенија кога автомобил „опел корса“, управуван од 41-годишен Словенец, удри во него и го „истурка“ од надвозникот.

Камионот по ударот од  „Корсата” ја проби заштитната ограда  и падна од висина од 20 метри на патот што поминува под автопатот, пренесува Клип.си.

Несреќата се случила пред тунелот Головец на обиколницата кон Љубљана.

 Четириесет и едногодишниот Словенец , кој се судри со камионот поради неприлагодена брзина, поминал без повреди.

Одбележан Денот на ослободувањето на Скопје

Градот убав мора да продолжи да се развива во современа европска престолнина, да биде достојно место за живеење. Одбележувањето на 75-годишнината од ослободувањето на Скопје е сеќавање на минатото, но носи и моќна порака за иднината. 

Да го направиме Скопје град за сите. Го отвараме градот за граѓаните, ги вклучуваме во процесите на одлучување и создаваме модел за долгорочен развој на градот, истакна вечерва градоначалникот на Град Скопје Петре Шилегов на одбележувањето на 75-годишнината од ослободувањето на Скопје.

Тој посочи дека во неговата визија, Скопје е просперитетен и отворен град, еднаков за сите. Со инфраструктура и градби адаптирани за потребите на граѓаните, град којшто се развива внимателно ама и рамномерно, град којшто обезбедува услуги за граѓаните, што го вбројуваат во европските метрополи и паметни градови.

– Минативе две години докажавме дека се грижиме за нашето наследство од Народноослободителната борба, отворивме музеи и изложби, ги уредивме просторите и просторот околку запоставените спомен-обележја во градот, а соработка со Сојузот на борци е одлична. Длабоку сум убеден дека она што успеавме да го реализираме досега исполни барем мал дел од нашата обврска кон нашите ослободители. Чекор по чекор го враќаме Скопје на правиот пат. Патот на космополитизмот, солидарноста, хуманоста, патот на прогресот. За нас нема повеќе или помалку важни делови од градот, секој е важен, секој наш граѓанин секој наш Скопјанец е важен, нагласи Шилегов.

Градоначалникот на Град Скопје им додели награда „13 Ноември" на фотографката Ерина Богоева за изработка и издавање на монографијата со фотографии „Скопје-архитектурата како фотографска скулптура (1963-1990)", на музичкиот педагог, истражувач и публицист Александар Трајковски за значаен придонес во областа на културата,уметноста и литературата со објавувањето на книгата „Музиката во македонскиот игран филм од Фросина до Лазар", на Карате клубот Работнички – Скопје за 50 години постоење и постигнати врвни спортски резултати на домашен и меѓународен план, на Алили Бесир за освоено прво место на Европско првенство во борење за кадети, на учениците Ана Марија Атанасова за постигнати резултати во воннаставни активности и Стефан Стојковиќ за успешни постигнувања во наставните и воннаставните активности и посебен придонес за афирмација на градот Скопје во светот, Христина Спасевска за остварувања во науката, техниката и стопанството од областа Обновливи извори на енергија и енергетска ефикасност, Жикица Ѓорѓиевски за за континуирана поддршка на лицата од социјален ризик, на Дита Старова Ќереми за за посебен придонес во културата и севкупниот развој и афирмација на Град Скопје, Фросина Зафировска за значајни достигнувања во областа на музејската дејност, визуелните уметности, архитектурата и дизајнот и на Бисера Чадловска за континуирано успешно творештво во областа на музичката уметност. /МИА

Привремената претседателка на Боливија бара избори во најкус рок- Сенатот ја бојкотира

Привремената претседателка на Боливија вети денеска дека новите избори ќе бидат одржани во најкус рок и ги осуди одманичките акции на приврзаниците на свргнатиот претседател Ево Моралес , кој избега во Мексико.

Потпретседателката на Сенатот, педесет и двегодишна конзервативка Жанин Анез, стапи на претседателската позиција  откако од функцијата претседател вчера по четиринаесетгодишното владеење се повлече социјалистот Моралес.

„Бог да не благослови, да дозволи да бидеме слободни и да одржиме наскоро транспарентни избори.“, објави Анез на Твитер.

Поддржувачите на Моралес, кои имаат мнозинство во парламентот, се заканија дека ќе ја блокираат седницата на која треба да се донесе одлука за нови избори, поради што немаше кворум.

Моралес, како и потпретседателот на Боливија и претседател на Сенатот, поднесоа оставки пред три дена во знак на протест, поради што Анез стана претседател според Уставот.

Претходно, Доналд Трамп го поздрави заминувањето на Ево Моралес.

Привремениот претседател треба да ги распише претседателските избори во рок од 90 дена.

притисни ентер