Македонија

Судот во целост го објави решението со кое се казнува адвокатот Асмир Алиспајиќ

Основниот кривичен суд во Скопје во целост го објави решението со кое се казнува адвокатот Асмир Алиспајиќ за навреда на судијката Софија Лаличиќ, преку објава на својот Фејсбук профил.

Алиспајиќ коментира случувања од главна расправа одржана на 4 септември 2019 година.

Од судот наведуваат дека, во однос на делумно објавеното решение од страна на адвокатот Асмир

Алиспаjиќ и барањето на одредени медиуми за став на судот околу истото, го објавуваат во целост анонимизираното решение со цел сите заинтересирани да можат да извршат увид и да се запознаат со причините за изречената неправосилна парична казна на која адвокатот има право на жалба.

Основниот суд Скопје како првостепен кривичен суд преку судијата Софија Лаличиќ како судија Претседател на советот, на ден 05.09.2019 година, согласно чл.88 ст.7 в.в. со ст.1 од ЗКП, донесе решение со кое се казнува бранителот на обвинетиот Е. М., адвокат Асмир Алиспајиќ од Скопје со парична казна во износ од 2.000 евра, во денарска противредност од 122.990,оо денари.

Паричната казна адвокат Асмир Алиспајиќ од Скопје е должен да ја плати во рок од 30 дена по правосилноста на решението.

– ОЈО Скопје до овој суд на 11.05.2018 година поднесе обвинителен акт КО2 бр…. од 11.05.2018 година против обвинетиот Е. М. од Скопје, за кривично дело Разбојништво од чл.247 ст.4 в.в. со ст.1 в.в. со чл.22 од Кривичниот законик.

По укинување на првостепената пресуда К.бр.1161/18, во повторената постапка судот закажа главна, јавна и усна расправа на 17.07.2019 година, така што до денес беа закажани 5 главни расправи и постапката е во фаза на доказна постапка.

Постапувајќи по наведениот кривичен предмет, на закажаната главна расправа на 04.09.2016 година, но и на претходно закажаните и одржани, бранителот на обвинетиот Е. М. адвокат Асмир Алиспајиќ од С. беше повеќе пати опоменат за несоодветно однесување во текот на расправата, како усно, така и на записник, а видно од записниците за текот на главните расправи. Откако на 04.09.2019 година во 15,00 часот расправата продолжи со поставен бранител по службена должност, бидејќи избраниот бранител адвокат Алиспајиќ не се јави на продолжението на главната расправа и не достави доказ за објективна спреченост да отсуствува од истата, поради што судот му постави на обвинетиот бранител по службена должност, обвинетиот го извести судот дека му го откажува полномошното на бранителот адвокат Алиспајиќ и за свој бранител го ополномоштува адвокат Ибраим Бајрами, кој во меѓувреме пристапи во судската сала, по што на барање на новоизбраниот бранител расправата се одложи.

На ден 04.09.2019 година во 20:01 часот адвокатот Асмир Алиспајиќ на својот Фејсбук профил објавил следна содржина „SWAROVSKI СОФИЈА ЛАЛИЧИЌ ДНО ОД СУДИЈА. Под итно РАЗРЕШУВАЊЕ", со што го навреди судот, во смисла на чл.88 ст.1 од ЗКП.

Согласно чл.88 од ЗКП: „Судот ќе го казни со парична казна од 200 до 1.200 евра во денарска противвредност учесникот во постапката кој во поднесокот или усно, односно на друг начин го навреди судот или лицето кое учествува во постапката. Решението за казнување го донесува судот пред кој е дадена изјавата, а ако тоа е сторено во поднесокот, судот што треба да одлучи за поднесокот.", а согласно став 7 од истиот член: „ако според ставот 1 на овој член навредата на судот и покрај изречената парична казна се повторува, судот може да изрече парична казна и до десеткратен износ од казната од ставот 1".

Со оглед да бранителот на обвинетиот адвокат Асмир Алиспајиќ од Скопје, на главната расправа во повеќе наврати покажа непочитување кон судот, па откако судот го предупреди дека е недозволиво да се однесува на тој начин, особено по дадени повеќе усни опомени од страна на Претседателот на судечкиот совет, како и повеќе писмени опомени внесени на записник да не ги коментира несоодветно процесните одлуки на судот и да не прекинува додека се диктира записникот, да не вика, да не треска со рацете на судскиот пулт, истиот по завршување на главната расправа на својот Фејсбук профил објавил навредлива содржина за судот, како горецитирано.

Навредата беше изнесена по завршување на главната расправа, но несомнено во врска со превземните дејствија во текот на истата, ако се има предвид дека коментарот е ставен на 04.09.2019 година по завршување на главната расправа, на која му беше откажано полномошното на бранителот, па ако се има предвид дека избраниот бранител се уште нема доставено полномошно за застапување на обвинетиот Е. М., до кога бранителот адвокат Алиспајиќ е должен да превзема дејствија, а во смисла на одредбата од чл.76 ст.4 од ЗКП, бранителот адвокат Алиспајиќ, несомено преку својата објава ги коментира случувањата од главната расправа критичниот ден, а очигледно и претходно, кога судот ги констатираше и одбиваше обидите на одбраната за неосновано одолговлекување на кривичната постапка.

Како навредата кон судот се повторува, ако се има предвид дека бранителот адвокат Алиспајиќ и претходно е казнет поради навреда на судот во износ од 200 евра, за што беше донесено Решение К.бр.1161/18 од 12.09.2018 година, судот одлучи овој пат висината на казната да биде одмерена повисоко од предвидената во чл.88 ст.1, што како законска можност е предвидено во ст.7 од истиот член, па ако се има предвид вордингот кој бранителот го користи при повторното навредување на судот, му одмери казна како во диспозитивот на ова Решение.

Имајќи го предвид сето наведено, судот согласно чл.88 ст.7 в.в. со ст.1 од ЗКП одлучи како во диспозитивот на решението, се наведува во образложението на судското решение/МИА

Свет

Убила 19-годишна трудница и ѝ го украла бебето од матката-осудена е на 50 години затвор (ВИДЕО)

Клариса Фигуероа (51) е осудена на половина век затвор откако убила бремена тинејџерка во Чикаго намамувајќи ја во нејзината куќа за да ѝ го украде бебето од утробата, кое потоа го претставила како свое.

Тоа е, накратко, епилогот од страшното злосторство што го потресе овој дел на САД, а се случи во 2019 година, објави Еј-Би-Си Њуз.

Марлин Очоа-Лопез (19), мајка на двегодишно момче, која била во поодмината бременост, била намамена од Клариса во нејзиниот дом со ветување дека ќе ѝ даде бесплатна облека за бебето. Страшното злосторство го извршила со помош на нејзината ќерка Дезире, која во јануари ја признала вмешаноста во убиството кога била осудена на 30 години затвор. Мајката и ќерката ја задавиле трудница со електричен кабел. Клариса, која е медицински работник, сакала да го претстави бебето како свое, а откако го извлекла од стомакот на мајката повикала брза помош. Поради повредите, бебето два месеци било на интензивна нега во болница, но и покрај сите напори на лекарите, починало.

За време на судењето, се тврдело дека Клариса Фигуероа го изгубила своето бебе пред злосторството, а потоа им кажала на членовите на семејството дека повторно е бремена. Во октомври 2018 година, таа ѝ кажала на својата ќерка дека ѝ треба помош да убие трудница и да го украде бебето од нејзината утроба.

Ракел Уриостеки, мајката на убиената трудница, по изрекувањето на пресудата видно се потресе:

- Губењето на ќерка ми е нешто што никогаш нема да го прежалам.

Откако украденото бебе било сместено во болница, Клариса Фигуероа и нејзиниот партнер Пјотр Бобак тврделе дека бебето е нивно, па дури започнале и хуманитарна кампања за собирање помош за негово лекување. Пјотр подоцна на судењето признал дека помогнал да се отстранат трагите по убиството на бремената тинејџерка.

Страшното злосторство било неоткриено неколку недели, иако Џовани Лопез, сопругот на убиената, уредно ја пријавил за исчезната, но немал помош од надлежните да ја пронајдат. Полицијата реагирала дури по анонимна пријава во која било наведено дека е видена како исчезнатата влегува во куќата на Клариса Фигуероа. На 07.05.2019 година полицијата извршила претрес. Автомобилот на жртвата бил пронајден во близина на куќата на убиецот, а набрзо била наредена и ДНК анализа на бебето. Откако дошле резултатите од ДНК, полицијата ги уапсила мајката убиец, нејзината ќерка и нејзиното момче. Телото на жртвата било пронајдено закопано во дворот.

- Казната што ја доби никогаш нема да биде доволна и мојот син никогаш повеќе нема да ја прегрне мајка си. Изгубив дел од семејството и тоа секогаш ќе ме следи – низ солзи изјавил сопругот Џовани Лопез.


Живот

Нуркачи снимија како изгледа силен земјотрес под вода: Сега имам уште еден страв (ВИДЕО)

Страшно искуство е да се почувствува силен земјотрес, а група нуркачи го доживеале под вода додека јачината била 7,2 степени според Рихтеровата скала.

Видеото се рашири на социјалните мрежи, а корисниците пишуваат дека откако го погледнале, се наежиле и откриле нов страв.

На видеото се гледаат неколку нуркачи како пливаат меѓу коралниот гребен и уживаат во живописната глетка. Но, сè се менува кога ќе започне земјотресот. Прашина и нечистотија од морското дно се креваат и изгледаат како морничава магла.

So this is what an earthquake looks like underwater
byu/Literally_black1984 ininterestingasfuck

Се гледаат и нуркачи како се држат до коралите додека водата се движи побрзо и побрзо. „Да, мора да е кошмар“, „Изгледа страшно“, „Морничаво“, се само дел од коментарите.

Свет

Ужас во Англија: 80- годишен човек е запален во двор, соседите слушнале крици (ВИДЕО)

Две лица се уапсени откако полицијата пронашла изгорено тело на маж во задната градина на домот на едно „многу повлечено“ семејство, како што ги опишале соседите во Бредфорд.

Соседите во тивка уличка во Бредфорд пријавиле дека слушнале врисоци пред да видат како чад се издига зад куќата. Според извештаите, жртвата била 80-годишен маж кој живеел во куќата со помлада жена и нејзиниот син, објави Сан.

Многумина во соседството биле убедени дека човекот починал, затоа што не го виделе од пандемијата на коронавирус.

„Од градината доаѓаше чад, но не можевме да влеземе бидејќи портата беше затворена. Се обидовме насилно да ја отвориме портата и можевме да видиме крв и осакатено тело. Не можев да верувам, беше како нешто од хорор филм“, рекол соседот Мухамед.

„Семејството буквално никогаш не излегуваше надвор, тие се многу повлечени. Ова се случи целосно од ведро небо и сите се многу шокирани од тоа“, рече друг сосед кој сакал да остане анонимен.

Полицијата денеска соопшти дека го идентификувала телото на возрасен маж, но дека се уште се обидуваат официјално да го идентификуваат мажот и да им влезат во трага на неговите најблиски.

„Според информациите достапни во овој момент, ова го третираме како истрага за убиство. Мојот тим работи на утврдување на околностите кои довеле до смртта на човекот. Имаме две лица во притвор и не бараме никој друг во врска со овој инцидент, што се случи во тивка станбена улица, разбирам дека овој инцидент предизвика загриженост во пошироката заедница и има многу шпекулации за тоа што се случило и кој бил инволвиран.“

На местото на настанот се испратени пожарникарски екипи, полиција и брза помош, а соседите велат дека досега не виделе толку големо присуство на итните служби.

Противпожарната и спасувачка служба во Западен Јоркшир соопштија дека екипите го изгаснале пожарот на имотот.

„Ова беше многу шокантен инцидент за многу тивка и мирна заедница“, рече локалниот лабуристички советник Сајмон Канингам.

притисни ентер