Канал 5: Вонредни вести од иднината, февруари 2022, протести на улиците на Скопје!

Собранието е пред најважната одлука за нашата земја, а огромна маса протестира на скопските улици. Ова се вонредните вести на Канал 5 за 9ти Февруари 2022 год.
 

Денес е 9ти Февруари 2022 год, проследете ги вонредните вести на Канал 5 !

За утре , 10ти Февруари 2022 год. е закажана итна собраниска седница, на која прва и единствена  точка ќе биде гласање за „кладилница ливче или компјутер“.

За оние кои можеби не се сеќаваат, станува збор за седница која започна во  Октомври 2019 год , и се уште трае расправата  меѓу пратениците за дилемата дали Катица Јанева своерачно го напишала дописот до Јовески во 2019 год. на ливче од кладилница, или пак дописот бил отпечатен на компјутер и донесен однадвор во затворот во Шутка.

Народните претставници утре ќе мораат конечно да гласаат, и доколку со трипетинско мнозинство изгласаат дека Јанева своерачно го напишала дописот на ливче од кладилница, се отвара конечна можност Јовески да замине во пензија.

За жал, оваа сериозна кривично-правна дилема од 2019 год. предизвика огромен финансиски и безбедносен проблем кој датира од моментот кога Јанева го испрати дописот до Јовески во далечната 2019 год. Оттогаш, секојдневно, роднини и пријатели на еден несреќник протестираат на скопските улици, а до денес  ниту пратениците ниту пак Владата на Македонија не знаат како да се справат со овие проблеми.

Како што информиравме, Јанева наводно го напишала дописот на ливче од кладилницата „Црвен картон“ , ливче кое било во сопственост на друг притвореник, кој на „првата “ страна на ливчето испишал 18 натпревари сите со коефициент преку 3.00, за кој очекувал , доколку ги погоди сите натпревари, да добие фантастични 3 милијарди евра.

Семејството и пријателите на овој осомничен несреќник се веќе трета година на улица, барајќи правда за ливчето и обвинувајќи дека некој од Владата уште во 2019 год го уплатил тоа ливче со  тие 18 натпревари, што се смета за директна причина за растот на БДП во првиот квартал на 2020 година за неверојатни 9,5 %!

Владата на Македонија изминативе 3 години упорно ги негираше овие обвинувања за злоупотреба на среќата на еден притвореник , тврдејќи дека растот на БДПто е резултат на одличниот интернет бизнис за продажба кој Владата го започнала со именувањето на екс министерката за Финансии од таа 2019 год.

Како и да е, утре очекуваме конечна завршница на оваа сага поврзана со дописот на Јанева до Јовески, како и можно завршување на протестите кои траат веќе 3 години.

( текстот е козерија/фикција )

Да се почитуваат препораките за заштита од коронавирусот, се чека лабораторискиот резултат за возачот на комбето

Граѓаните треба да ги почитуваат препораките за заштита од коронавирусот, а тие кои имаат симптоми да се јават на телефонските броеви на здравствени служби. 

Дел од препораките опфаќаат задолжително и често миење на рацете со сапун и вода и тогаш кога не се видливо нечисти или да се користи чистач за раце што содржи алкохол, а при кашлање или кивање да се заштитат устата и носот со марамче или со дланката. По употребата марамчињата да се фрлаат во затворени канти, а при кашлање или кивање, како и при грижа за болни, задолжително да се мијат рацете…

Засега единствена заразена со коронавирус е веќе хоспитализираната пациентка на Клиниката за инфективни болести во Скопје, која со комбе допатува од Милано во државава. Таа се чувствува добро, и според лекарите, како што информираше министерот за здравство Венко Филипче, веќе влегува во фаза на оздравување.

Во соба за изолација во Општата болница во Струмица од вчера е возачот на комбето со кое допатува од Италија заразената, а кој сам пријавил дека има симптоми на кашлица и болки во градите.

– Земени се материјали за анализа и тие во следните часови ќе бидат изработени во лабораторија во Скопје, по што ќе ја информираме јавноста. Тој бил сам дома, немал контакти ниту со семејството и сам ја контактираше нашата служба. Кога ќе стигнат резултатите ќе одлучиме каде ќе се лекува. Доколку резултатот е негативен ќе продолжи да се лекува во Инфективното одделение таму, не во изолација, а доколку е позитивен ќе се префрли во Инфективната клиника во Скопје, истакна Филипче.

Единаесет лица од кои две деца кои биле во контакт со пациентката која е на Инфективната клиника, се во домашна изолација. Извршени беа тестирања за коронавирус на неколку луѓе, вратени од Италија, чии резултати беа негативни.

Министерот Филипче смирува дека нема простор за паника, будно се следи ситуацијата од страна на експертите епидемиолози од Комисијата за заразни болести. – Во секој момент сме спремни одлуката да се надгради, да се воведе нешто друго доколку треба и на истиот начин и за викедот ќе продолжиме да ја информираме јавноста за се што се случува, рече Филипче.

Останува во сила препораката компаниите и институциите да не им дозволуваат на оние вработени кои периодов биле во Италија, да доаѓаат на работа бидејќи тие прво мора да минат 14 дена во домашна изолација – период колку што трае инкубацијата на вирусот, како и препораката да не се патува во земјите каде има епидемија, без некоја поголема потреба.

Владата вчера препорача откажување на поголемите јавни собири, спортски настани и забавни и културно-уметнички манифестации до 6 март со цел превенција на ширење на коронавирусот.

Препораката на Владата се однесува на поголемите јавни собири кои се планирани во овој период, како што се Струмичкиот карневал, Карневалот „Прочка" во Прилеп" и сите слични. Владата им препорачува на организаторите на спортските настани, натпреварите во утврдениот период до 6 март да се играат без публика. Истата препорака на Влада се однесува и на сите други поголеми забавни и културно-уметнички манифестации, соопшти владината прес-служба.

Владата препорача сите организатори на други јавни настани своите одлуки да ги донесуваат врз основа на консултација и мислење на Комисијата за заразни болести, а ги задолжи Пазарната инспекција и Агенцијата за лекови и медицински средства да направат увид и контрола на залихите на заштитните средства за заштита од пренесувањето на вирусот во аптеките и доколку утврди неосновано зголемување на цените да преземе мерки соодветно за законските прописи и овластувања.

Владата го задолжи МВР до наредната седница да достави информација како се спроведуваат мерките што ги одреди Кризниот штаб. Еден од заклучоците на владината седница е и одлуката да се воспостави соработка со Црвениот крст и да се повикаат нивните волонтери да асистираат на граничните премини во анкетите на лицата што влегуваат во земјата во соработка со припадниците на граничната полиција.

Коронавирусот првпат се појави во Вухан, Кина, на 12 декември 2019 година. По брзото ширење на болеста, големиот број жртви и заразени, Светската здравствена организација на 30 јануари прогласи „меѓународна вонредна состојба".

Болеста се пренесува преку респираторните патишта (кивање и кашлање), но и преку допир со нечисти раце. Лекувањето е симптоматски, во зависност од манифестациите на болеста. Клиничката слика варира од лесна настинка до потешка форма, во зависност од зафаќањето на белите дробови. Ризик за најлош исход има кај постари, хроинично болни луѓе или лица со претходни заболувања на белите дробови. Околу 80 проценти од 80.000 заболени во светот се целосно излекувани, кај 15 отсто има некои компликации, а кај пет проценти има сериозни компликации. Смртноста е близу два процента./МИА

Одложен најавениот прекин за реемитување на домашни и странски ТВ канали

Констатирано е дека постојат можности да се дојде до заедничко решение во скоро време.

Премиерот Оливер Спасовски, придружуван од министерот за информатичко општество и администрација, Дамјан Манчевски, се сретна со претставници на сите оператори обединети во Здружението на информатичко-комуникациски технологии, при што е постигната согласност да се одложи најавениот прекин на реемитување на домашните и странските телевизиски канали.

Како што наведуваат во соопштението од владината прес служба, ова е постигнато со оглед на можностите што се гледаат за скорешно изнаоѓање решение.

-На средбата е разговарано за сите аспекти на и што произлегуваат од измените на Законот за аудио и аудивизулени и медиумски услуги, стои во соопштението.

Констатирано е дека постојат можности да се дојде до заедничко решение во скоро време, како и свестност од сите страни за решавање на прашањето, согласно интересот на државата и на граѓаните.

Прекинот на реемитувањето на сите домашни и странски ТВ канали беше најавен за 2 март на полноќ, со исклучок наканалите на јавниот сервис МТВ1, МТВ2 и собранискиот канал./МИА

Сончево со мала облачност, температурата до 14 степени

Времето ќе биде сончево со мала до умерена локална облачност. 

Претпладне вдолж Повардарието ќе дува умерен до засилен ветер од северозападен правец, информира Управата за хидрометеоролошки работи.

Утринската температура ќе се движи од минус 9 степени до 4 степени, а дневната од 2 до 14 степени.

Во Скопје и околината времето ќе биде сончево со мала облачност. Утринската температура ќе достигне до нула степени, а дневната до 11 степени. /МИА

притисни ентер