Претседател на проруска партија на Бугарија обвинет за шпионажа

Бугарското обвинителство го обвини за шпионажа Николај Малинов , претседател на Националното движење на русофили , изјави на брифинг главниот обвинител , Сотир Цацаров.

Малинов бил пуштен од притвор со кауција од 50 000 лева и му е забрането да ја напушта земјата.

Обвинителот исто така изјави дека бугарската Национална агенција за безбедност му забранила на поранешниот началник на РИС, Леонид Решетников влез во Бугарија наредните 10 години.

Чакаров рече дека обвинителите собрале докази дека Малинов наводно се ставал во служба на две странски организации со седиште во Руската Федерација: Здружение на двоглави орли и Рускиот институт за стратешки студии (РИС), јавува бугарската БТА.

Според заменик-јавниот обвинител Иван Гешев, Малинов работел во корист на двете организации скоро девет години, а во текот на изминатите три години се сретнал со тогашниот директор на РИС, Леонид Решетников и рускиот бизнисмен Константин Малофејев.

Истрагата спроведена последните денови откри бројни документи кои покажуваат дека Малинов добил пари за да обезбеди информации за политичката состојба во Бугарија и на Балканот, да организира релевантни настани и да формира политичка партија за да се бори за промена на геополитичките интереси на Бугарија.

При претресот, истражителите пронашле меморандум, напишан од Малинов на руски јазик, во кој се опишува потребата за геостратегиска преориентирање на Бугарија кон Русија и дека треба да се преземат мерки за да се постигне тоа.

За две години преку грантови отворени 2,5 илјади микробизниси, над 90 отсто од нив се се уште активни

Две и пол илјади микро бизниси биле отворени во изминатите две години преку оперативните мерки за вработување. 

Од нив, 93 отсто што биле отворени во 2017 се активни, а се уште работат и 99 отсто микро бизниси отворени во 2018 активни. Со оперативните мерки во изминатите две години се постигнати околу 60 илјади нови вработувања. Поради добрите резултати за оваа намена за годинава се издвоени 1,4 милијарди денари.

-Ова покажува дека навистина оваа инвестиција за самовработување, отворање на микробизниси им дава шанса на младите луѓе од една страна да се самовработат, да станат активни на пазар на труд, но понатаму развивајќи го својот бизнис да станат и вработувачи и да вработат други млади лица или други невработени лица, изјави денеска вицепремиерката за економски прашања Мила Царовска која беше во посета на бизнис отворен со грант за самовработување.

Со оперативните мерки за вработување, додаде таа, во изминатиот период се вложени финансиски средства што даваат резултати, а искористеноста од страна на Агенцијата за вработување на финансиските средства изнесувала повеќе од 97 проценти.

-За 2020 година издвоени се 1,3 милијарди денари од Буџетот и уште од прилика 100 милиони од нашите партнери што постојано ги поддржуваат овие мерки за вработување, тоа се УНДП, УНОПС и останати партнери коишто навистина сметаат дека вработувањата во нашата држава се приоритет, истака Царовска додавајќи дека со сите мерки за вработување што директно инвестираат во преквалификација, доквалификација намален е процентот на невработеност од 22,1 на рекорден 17,1 процент.

На ваков начин, додаде Царовска, постигнати се околку 59.000 вработувања за само две и пол години.

Дополнителната заменик министерка за труд и социјална политика Санела Шкријељ рече дека оперативниот план со активни мерки за вработување има три главни фокуси, едниот фокус на млади до 29 години, вториот за еднаква застапеност на жени и мажи во однос на искористеноста на средствата и третиот на рамномерната регионална застапеност.

-Она што нас не радува изминатите две години е што гледаме дека мерките се навистина добро таргетирани во однос на искористеноста и потребите на младите и жените затоа што доколку зборуваме за реализација на мерките во 2019 година ќе видиме дека половина од вкупното учество во сите активни мерки за вработување се токму младите девојки и жени и тоа нас особено не радува имајќи ја предвид високата економска неактивност на жените во нашата држава, рече таа.

Таа појасни дека и за мерката субвенционирање и за сите останати мерки главен критериум е минимум 30 проценти учество на млади жени. -Реализацијата покажува дека половина од тие што ги користат мерките се млади жени што нас не охрабрува и упатува дека треба да продолжиме во овој правец. Во моментот е отворен повикот грантови за самовработување за 2020 година и само би ја искористила приликата да ги повикам и охрабрам сите млади девојки и жени да го следат овој пример и да аплицираат за оваа мерка, рече Шкријељ.

Директорката на Агенцијата за вработување Билјан Јовановска рече дека институцијата со која раководи е подготвена за реализација на Оперативниот план 2020 година. Информира дека во моментов се активни мерките практиканство и самовработување, и најави дека од оваа недела ќе стартуваат и останатите мерки.

-Ние сме тука на сите заинтересирани да им дадеме максимална поддршка за 2020 година да ги контактираме и да им кажеме кои се можностите, што може во оваа година и во иднина да ги искористат од страна на државата, рече Јовановска.

Таа истакна дека има голем интерес за мерката за самовработување и оти за само една недела имаме над 1.200 апликации.

-Иако имаме предвидено 1.364 самовработувања првично ние тука не застануваме. Исто како и во изминатата година доколку имаме голем интерес, а факт е дека има голем интерес, од Буџетот ќе се обезбедат дополнителни средства за оваа мерка и доколку има поголем интерес од предвидениот опфат истите ќе бидат реализирани и поддржани, рече Јовановска. 

„Само Вистина“ вечерва со Тони Науновски и Агим Јонуз

Во вечерашната „Само Вистина“ ќе дебатираат Тони Науновски и Агим Јонуз.

Почитувани гледачи, на власта или на опозицијата, чија „мелодија“ ќе биде поверодостојна, да ги убеди граѓаните да се „прошетаат“  до избирачките места, вечерва во „Само Вистина“ копјата ќе ги кршат Тони Науновски и Агим Јонуз.

Законот за ЈО се донесе, вистината за „Рекет“ се чини ќе ја чека новата влада, но опозициските „бомби“ побрзаа. Дали власта го доби својот „камен“ по глава или некој „лепи, сече и монтира“ од Будимпешта?

Пасоши нема, нема ниту одговорност, а кој ќе го плати „цехот“ од недостаток на документи на граѓаните?

„Една држава“ или „едно општество“ за сите, каков ќе биде  предизборниот кетеринг?

ВМРО-ДПМНЕ или СДСМ, кој има поголем коалициски потенцијал, а кој знае подобро да се „пазари“ со  „политичките невести“ од албанскиот блок?

Науновски побара поранешниот премиер да се уапси за велепредавство, Јонуз е на став дека сите ги добиле желбите на „хартија“, недостасува само имплементација.

Мини шенген, полни очи или полни раце, што ќе ги наполни празните стомаци на граѓаните?

Пресуди или политички договори, како со македонски менталитет да излеземе од магичниот круг на неправдата?

Партиите со предизборни калкулации, граѓаните со неисполнети ветувања, а кој вечерва ќе ја зборува вистината и за тоа какво ќе биде македонското пролетно „реално шоу“, на местото каде се говори само и „Само Вистина“ со Тони Науновски и Агим Јонуз, каде ако не, на Канал 5 Телевизија.

Горивата поскапуваат за половина до еден денар по литар

 Бензините од ноќеска на полноќ поскапуваат за еден денар по литар, а цената на дизелот се зголемува за половина денар, одлучи денеска Регулаторната комисија за енергетика (РКЕ).

Со одлуката на РКЕ се врши зголемување на малопродажните цени на нафтените деривати во прoсек за 1,46 отсто.

Новата малопродажна цена на бензинот ЕУРОСУПЕР БС-95 ќе изнесува 67 денари за литар, а ЕУРОСУПЕР БС-98 ќе се продава за 69 денари. Малопродажната цена на ЕУРОДИЗЕЛ (Д-Е V) ќе биде 58,5 денари за литар, додека цената на Екстра лесното масло за домаќинство (ЕЛ-1) се зголемува за еден денар по литар и ќе изнесува 47,5 денари.

Со одлуката на РКЕ за 0,425 денари за килограм се зголемува и малопродажната цена на мазутот М-1 НС и ќе чини 33,565 денари.

Како причина за промена на малопрадажните цени на нафтените деривати од РКЕ ги посочуваат за 0,8 отсто повисокиот курс на доларот во однос на денарот во изминатите седум дена и зголемувањето на референтните цени на дизелот и на бензините за 1,41, односно за 2,68 отсто.

притисни ентер