Де Лихт се поблиску до Јувентус

Италијанскиот фудбалски шампион  Јувентус добива огромно засилување?

Капитенот на Ајакс Матијас де Лихт е се поблиску до трансфер во Торино, откако  раководството на Јуве одлучил да ја зголеми понудата.

Според „Газета дело Спорт“ , Ајакс одбил 67 милиони евра со барање за повисока понуда  вредна 75 милиони. Сега се очекува раководството на италијанскиот гигант да ја прифати бараната сума.

19- годишниот  Де Лихт која игра на позицијата стопер претходно ги договори личните услови со Јувентус и стави потпис на пет годишен договор , според кој ќе има годишна плата од 9 милиони евра, без бонуси.

До крајот на неделава би требало Ајакс и Јувентус да постигнат договор, а Де Лихт да ги изврши лекарските прегледи во Торино.

Летово еден од најголемите светски таленти ги одби понудите на Барселона и Пари Сен Жермен.

Во Велес кајак слалом на диви води „Илинден Опен 2019"

Во организација на Кајак клубот „Вила Зора" со подршка на Општина Велес денеска во водите на Вардар во Велес  се одржа  24-от по ред Кајак слалом на диви води „Илинден Опен 2019". 

Во повеќе дисциплини се натпреваруваа велешките кајакарски клубови, како и кајакари од Скопје и Демир Капија, како и гостите од Србија, ККК „Гусар" од Ниш.

Во дисциплината К-1 пионери, првото место му припадна на Стефан Рибарски од ККК „Вардар" Велес, втор патеката ја заврши Петар Радојковиќ од ККК „Гусар" Ниш Р.Србија, додека третото место го освои Арун Небиовски од ККК „Вардар" Велес.

Во дисциплина К-1/ јуниори, најбрз беше Ангелче Петрушевски, второпласиран Мартин Мазнев, а третото место го освои Ердинч Зејнелов, сите од ККК „Вардар" Велес.

Во дисциплина К-1/сениори, прв патеката ја помина Христијан Игнатов КК „Бабуна" Велес, второто место го освои Никола Димов КК „Бабуна" Велес, додека третото место му припадна на Марко Кесиќ ККК „Гусар" Ниш Р.Србија.

Во дисциплина Ц-1/јуниори, првото место го освои Ангелче Петрушевски од ККК „Вардар" Велес, втор беше Лазар Цветковиќ од ККК „Гусар" Ниш Р. Србија, додека третото место го освои Мартин Мазнев од ККК „Вардар" Велес.

Во дисциплина Ц-1/сениори, првото место го освои Бошко Нецинов од КК „Бабуна" Велес, второ место Марко Кесиќ од ККК „Гусар", Ниш Р.Србија, а трет се пласираше Александар Дамјанов од КК „Бабуна" Велес.

Во дисциплина К-1/јуниорки-жени, првопласирана беше Ангела Димова од КК „Бабуна" Велес, второто место и припадна на Олгица Мелова од ККК „Просек" Демир Капија.

Во екипен пласман беа постигнати следниве резултати:

1.ККК „Вардар" Велес

2.КК „Бабуна" Велес

3.ККК „Гусар" Ниш

4.ККК „Просек" Демир Капија

5.ККК „Гемиџии 903" Велес

6.ККК „Илинден 90" Скопје

7.КК „Вила Зора" Велес

Инаку, вчера во водите на Вардар во Велес, исто така со поддршка на Општина Велес се одржа „Велес Опен 2019./МИА

Кинијакис и Андре победници на првиот ЛЕН Куп на отворени води во Охридското Езеро

Харалампос Атанаикос Кинијакис од Грција во машка и Анжелика Андре од Португалија во женска конкуренција се победниците на првиот ЛЕН Куп на отворени води на десет километри, во Охридското Езеро.

Кинијакис кружната патека долга десет километри ја исплива за време од 1:47:04:05 часа, пред второпласираниот Даниел Шекељи од Унгарија (1:47:08:03) и Јувал Сафра од Израел кој како трет ја заврши трката со време 1:47:09:01 часа.

Во женска конкуренција најдобра на десетте километри беше Анжелика Андре од Португалија која патеката ја исплива за 1:55:46:86 часа, пред второпласираната Џиневра Тедеучи од Италија (1:55:47:07) и Ангела Мауер од Германија која целната линија ја мина како трета за време од 1:57:20 часа.

Трката во Охрид е четврта од серијата пет што се пливаат во рамки на квалификациите за олимписката дисциплина пливање на десет километри, заедно со оние во Израел, Франција, Шпанија и Данска.

Согласно пропозициите на ЛЕН, најдобрите тројца пливачи на денешната трка ќе делат награден фонд од 10.000 евра, односно за парични награди од по 2500, 1.500 и 1.000 евра за тројцата најдобри во двете категории. Инаку, шестемина најдобропласирани натпреварувачи, по тројца во машка и во женска конкуренција на петте трки во рамки на ЛЕН купот, обезбедуваат учество во претквалификациската трка за учество на наредните Олимписки игри. 

Во водите на Охридското Езеро ќе се плива десеткилометарска трка во рамки на Европскиот ЛЕН куп

Дваесет маратонци во машка и седум во женска категорија од девет европски држави ќе учествуваат на првата трка на десет километри во водите на Охридското Езеро, што ќе се одржи утре во организација на Лигата на европските нации (LEN).

Како што беше истакнато на денешната прес-конференција, за првпат од осамостојувањето во Охридското Езеро ќе се плива трка на десет километри, во рамки на серијата од пет трки што се квалификации за олимписката дисциплина пливање на десет километри. Република Северна Македонија од оваа, па наредните пет години ќе биде дел од петте квалификациски трки што се одржуваат уште во Израел, Франција, Шпанија и Данска.

– Без трка рангирана како официјална олимписка дисциплина не можеме да зборуваме дека сме дел од официјалното светско пливање. Од оваа година сме официјално дел од европскиот куп, во конкуренција на 53 држави во Европската пливачка федерација, истакна Александар Маленко, претседател на Пливачката федерација на Северна Македонија.

Според Хадар Бендрор од Европската ЛЕН федерација, исполнети се предусловите за одлично организирана трка.

– Задоволни сме од листата пријавени пливачи, имаме одлични натпреварувачи, очекуваме извонредна трка. Покрај убавината на езерото и чистата вода, мора да ја посочиме и одличната организација на настанот, благодарение на ентузијазмот на домашниот партнер, рече таа изразувајќи уверување на успешна натамошна соработка.

За квалитетот на утрешниот, според календарот претпоследен пливачки куп во Охрид, најдобро зборува податокот дека ќе пливаат четворица маратонци во машка и двајца во женска конкуренција кои беа меѓу дваесетте учесници на трката на десет километри на неодамна одржаното Светско пливачко првенство во Гуанжу.

– Драго ми е што за прв пат нашата држава ќе има тројца учесници во олимписка дисциплина на официјален европски ЛЕН куп, и тоа Евгениј Поп Ацев, Александар Илиевски и Давор Петровски, рече Маленко.

На стартот на пливачката трка во Охрид утре точно на пладне ќе ја видиме и Ангела Маурер, прогласена за кралица на далечинско пливање на отворени води, учесник на две олимпијади, двократен европски и светски шампион.

Согласно пропозициите на ЛЕН, за најдобрите тројца пливачи на утрешната трка во двете категории обезбедени се парични награди од по 2.500, 1.500 и 1.000 евра.

Инаку, шестемина најдобропласирани натпреварувачи, по тројца во машка и во женска конкуренција на петте трки во рамки на ЛЕН купот, обезбедуваат учество во претквалификациската трка за учество на наредните Олимписки игри./МИА

притисни ентер