Најбезбедни и најздрави се локалните прехранбени продукти, порачуваат експертите

Она што е проблем кога се работи за храната кај нас е што има многу производители, од мали до многу големи по обем. 

Експерти по безбедност на храна, лекари, професори, претставници на референтни институции, истражувачки центри за храна од целиот свет учествуваат во работата на мултидисциплинарниот конгрес на тема „Квалитет и безбедност на храна, здравје и нутриционизам" што по шести пат се одржува во Охрид.

На собирот се дискутираат најновите аспекти за состојбите во медицината, нутриционизмот, технологијата и во инженерството, вклучувајќи го и производството на машини за прехранбената индустрија, токму на темата за квалитет и безбедност на она што го јадеме.

Самите експерти по оваа тематика согласни дека прашањето колку е безбедна храната во нашата земја е комплексно, зависи од многу фактори…

– Она што е проблем кога се работи за храната кај нас е што има многу производители, од мали до многу големи по обем. Практично е невозможно надлежната Агенција за контрола на храната да земе примероци и да ги провери сите производи, тоа се огромни трошоци. Затоа се земаат мостри по случаен избор, некаде околку два проценти од севкупната понуда, но колку е тоа доволно за да се извлече заклучок дали храната е безбедна. Единствениот и најдобар начин потрошувачите да дознаат каква храна консумираат е сами да се информираат, и тоа не преку фејсбук, туку преку стручни лица и релевантни институции, изјави проф. Владимир Какуринов.

Тој во оваа прилика ги нагласи позитивните аспекти на консумирањето локална храна, преферирањето прехранбени производи од ова подрачје, од повеќе причини. Се работи за незагадени производи и додаде оти тие се најсоодветни на веќе создадената микрофлора во самиот организам.

– И претседателот на Светската нутриционистичка организација токму тоа го нагласи, граѓаните во Република Северна Македонија да јадат храна произведена тука, карактеристична за ова поднебје. Да се избегнуваат помодарски навики на консумирање продукти, на пример, свежа или сушена морска риба, морски плодови, кога се знае дека Македонија не излегува на море и оттаму нашата цревна флора не е навикната на таква храна, истакна Какуринов.

Џенгис Јашар, доктор по патологија кој го презентираше својот научен труд за улогата на бактериите во цревната флора во развојот на карцином на дебело црево, посочи предупредувачки статистички податоци, на зголемена појава на тој вид болест во земјата. Параметрите покажуваат зголемување на бројот на пациенти со малигни заболувања, конкретно на дебелото црево, што е последица на повеќе фактори, од нездрави животни навики, но секако и од несоодветна исхрана. Наспроти периодот од пред дваесеттина години кога годишно биле регистрирани до 150 пациенти со дијагностициран карцином на дебело црево, сега тој број достига околу 500 случаи на годишно ниво.

– Генетски модифицираната храна има свој удел во тоа, оттаму што доведува до интеракција со бактериската флора кај локалното население, препознавајќи ја како несоодветна…Ние сме поднебје што е дефинирано како автохтоно, според начинот на кој ја произведува храната, со формиран одреден микробиом во организмот кој знае како да го процесира храната. Се што е ново, модифицирано, што не припаѓа на ова поднебје, нашиот организам ќе го прими поинаку, рече тој, притоа согласувајќи се со генералната препорака на нутриционистите оти најдобра заштита од несакани последици предизвикани од употреба неавтохтони продукти е производство и консумирање храна од локално производство. 

Пристигнува Рено Каптур хибрид со автономија на струја од 50 км

Каптур хибридниот систем ќе користи бензински мотор од 90 коњски сили и електромотор.

Кога пред неколку месеци од Рено ја претставија новата генерација на Каптур, најавија и хибридна верзија. Францускиот произведувач тогаш не откри конкретни технички детали за ова возило, но сега се појавија нови информации за неговиот погонски систем.

Од „Automobile Magazine“  тврдат дека овој новитет во погонот на Каптур, ќе користи комбинација од 1.0 литарски бензински мотор од 90 коњски сили и електромотор со јачина од 70 коњски сили. Со комбинирана моќ од 160 коњски сили, хибридниот Каптур ќе биде мошне интересен за возење.

Уште поважно е дека, Каптур на купувачите ќе им понуди и задоволувачка автономија на струја. Се тврди дека вградената батерија во овој модел би имала автономија од 45 до 50 км. Во возењето само на електричен погон, брзината ќе биде ограничена на 135 км/ч.

Планирано е овој модел да пристигне на пазарот во 2020.

Автоувозниците го поддржаа новиот закон за данок на моторни возила

Електричните возила ќе бидат изземени од обврската за плаќање данок.

 За останатите категории на возила ќе биде подготвена посебна методологија за пресметка на данокот при увоз каде ќе се земе предвид и емисијата на јаглероден диоксид што ја испушта возилото.

Ова е предвидено со новиот закон за данок на моторни возила што го подготви Царинската управа, а кој вчера беше презентиран пред импортерите на моторни возила.

Во законот се предлага возилата за достава од типот „ван" и комби возилата кои спаѓаат во категоријата на товарни возила и се наменети за превоз на стоки да се изземат од плаќање на данок на моторни возила. Патничките комби возила за превоз на осум или девет патници, амбулантните возила, возилата за превоз на починати лица и кампер возила исто така се изземени од обврската за плаќање данок или е предвиден поврат на дел од платениот данок за моторни возила.

За останатите категории возила, како што денеска соопшти Царинската управа, е подготвена посебна методологија за пресметка на данокот при увоз при што ќе се зема предвид и емисијата на јаглерод диоксид што ја испушта возилото.

Начинот на пресметка ќе биде преточен во посебна уредба што ќе ја донесе Владата. Според новата методологија, еколошките возила кои се и технолошки понови добиваат бенефит во рамки на одданочувањето наспроти возилата со иста вредност, кои се технолошки постари и се со повисоки емисии на јаглерод диоксид.

Заради усогласување со препораките и праксата во повеќето земји на ЕУ, воведени се нови категории возила кои се предмет на даночење, мотоцикли и скутери со зафатнина над 50 кибни сантиметри, четирицикли или „АТВ", „пик-ап" возила.

На вчерашната средба, како што велат од Царинската управа, новиот Предлог-закон бил поддржан од увозниците на нови возила.

Според податоците на Царинската управа, минатата година биле увезени 37.000 возила. Од нив, 88 отсто биле стари употребувани возила, а речиси 90 проценти биле дизел возила.

Царинската управа најавува слични средби и со увозниците на стари возила и невладините организации кои делуваат во насока на заштита на животната средина.

Почнува штипската „Пастрамајлијада"

Со сечење на џиновската пастрамајлија вечерва почнува манифестацијата штипска „Пастрамајлијада". Манифестацијата вечерва во 20.30 часот официјално ќе ја отвори градоначалникот на Општина Штип, Благој Бочварски.

На штандовите на угостителските објекти, кои ќе бидат поставени од крстосницата Дујле до камениот мост кај населбата „8 Ноември" ќе се нуди познатиот штипски бренд – пастрамјлија. Оваа година угостителите одлучија цената да ја зголемат за 30 денари, па унифицираната цена на штандовите ќе биде 150 денари. Вечерва гостите ќе ги забавуваат групите Кентаур, Arre Brothers band, Агушеви, Нокаут и Игор Џамбазов. Додека во сабота ѕвезда на вечерта е српската пејачка Цеца, а пред неа ќе настапат Мартинијан Кириловски и Антониа Гиговска, во недела, пак, публиката ќе ја забувавуваат No end, Викторија Лоба, Тропико бенд и Данијела Мартиновиќ.

Градоначалникот Бочварски денеска истакна дека доколку граѓаните сакаат да се промени концептот на „Патрамајлијадата", своето мислење ќе го изнесат на јавната расправа, којашто ќе се случи по настанот. Забележува дека ќе го слушне мислењето на граѓаните, по што ќе се одлучува дали ќе има нов или ќе си остане истиот концепт.

Во градот викендов ќе се влегува од трите влезови, а полицијата и редарите на штипските јавни претпријатија ќе им помагаат на возачите каде ќе можат да паркираат./МИА

притисни ентер