Тој се очекува наскоро да биде повикан на распит во ОЈО, по вчерашното обраќање за случувањата во ИВЗ, каде даде скандалозна изјава во која тој посака смрт за судијката која ја донела одлуката за негова смена од функцијата. Пораката на Реџепи наиде и на аплауз кај дел од присутните.
Од обвинителството велат дека ја следат ситуацијата и дека вчерашниот случај ќе го спојат во предметот кој ОЈО веќе го има отворено против Реџепи.
Обвинителството ги следи случувањата и во рамките на претходно отворениот предмет за говор на омраза ќе биде додаден и овој предмет. Лицето ќе биде повикано во Обвинителството во врска со вчерашната дадена изјава.-Основно јавно обвинителство.
Реџепи заработи кривична пријава за говор на омраза пред неколку недели при поставување на камен темелник на џамија во скопското село Арнакија. Во таа прилика тој упати навредливи зборови за македонскиот народ, кој потоа се обиде да ги релативизира правдајќи се дека всушност мислел на локалните жители во селото.
За случувањата во ИВЗ се огласија и од Алијансата за Албанците, од таму велат дека се загрижени бидејќи според нив повредена е автономијата на верската заедница, а зад целата ситуација велат дека гледаат политичка позадина. Сепак, според нив, Реџепи самиот потврдил дека подолго време бил инструментализиран од политиката и како таков не заслужува да ја врши и понатаму неговата должност.