Македонија

Романија ќе ја поддржи позитивната одлука за почеток на преговори на Македонија со ЕУ

Романија за време на нејзиното Претседателство со Унијата се соочува со големи предизвици, но во Македонија наидува на една ветувачка атмосфера.

Имајќи ги предвид актуелните моменти во ЕУ, претстојните избори за нов состав на Европскиот парламент, а потоа и Европската комисија, но и прашањето за Брегзит, Романија за време на нејзиното Претседателство со Унијата се соочува со големи предизвици, но тука во Македонија наидуваме на една ветувачка атмосфера поради тоа што демократските сили во општеството, Владата и Парламентот создадоа еден поттик за одење напред во однос на реформите и надминување на одредени јазови кон европската интеграција.

Ова го порача денеска романскиот амбасадор во земјава Виорел Станила, кој пред членовите на собраниската Комисија за европски прашања ги презентираше приоритетите на романското претседателство кое почна од 1 јануари оваа година, а ќе трае до 1 јули.

Кохезија е мотото од кое ќе се води романското претседателство. Романскиот амбасадор истакна оти кохезијата ја сметаат како важна за сите најзначајни активности на коишто Унијата е посветена претстојниот период. Три приоритети има романското претседателство, тоа се активностите на Унијата во однос на земјите од Западен Балкан и политиката за проширување на Унијата, политиките за заедничка безбедност и одбрана и Брегзит.

-Ќе продолжиме со политиката што ја водеа претходните два претседавача на Унијата, Бугарија и Австрија, а исто така во однос на проширување ќе дејствуваме во координација со идните претседавачи, Финска и Хрватска, обезбедувајќи континуитет со цели коишто се дел од стратешката агенда на Унијата, рече Станила.

Романскиот амбасадор напомена дека Западен Балкан е регион којшто претставува стратешки интерес за ЕУ, а романското претседателство ќе се насочи кон отстранување на препреките и натамошно зајакнување на меѓусебната комуникација на земјите од регионот.

-Кохезијата е термин којшто не се однесува само на ЕУ, туку е нешто што е применливо и на нејзините односи со партнерите, со земјите кандидати, со државите во нејзиното опкружување, рече Станила и додаде дека овој интегративен пристап на кохезија секако ја вклучува и Македонија и целиот регион на Западен Балкан.

Додаде дека Романија ќе ја поддржи позитивната одлука за почеток на преговори на Македонија со ЕУ.

Пред членовите на Комисијата се обрати и вицепремиерот задолжен за европски прашања Бујар Османи кој му честита на Станила за почетокот на романското претседателство, нагласувајќи оти позитивно за Македонија е што во еден толку важен период за неа претседавач на ЕУ е држава која е нејзин голем пријател и поддржувач во процесот на евроинтеграциите.

-Се надевам дека романското претседателство ќе влезе во историјата на Република Македонија, односно за време на претседавањето на Романија ќе почнат преговорите на Република Македнија со ЕУ, рече Османи и истакна оти логото на кохезија под кое се води романското претседателство му оставило голем впечаток поради тоа што е како да било направено за актуелните случувања во Македонија како синоним за интеграција, што е мошне важно да се постигне во нашето општество.

Напомена дека 2018 била историска година за Република Македонија, европската перспектива за земјите од Западен Балкан беше потврдена со стратегијата за проширување што беше потврдено понатаму на Самитот во Софија, за 12 месеци беа решени билатералните прашања со Бугарија, Грција, а беше донесен и Законот за јазиците.

-Со заклучување на овие три теми кои можеби се болни и емотивни на крајот на тунелот се гледа светлината, влезот во ЕУ и НАТО, рече Османи.

Единствениот клуч за да се отвори портата на ЕУ, рече Османи, е да се продолжи по патот на реформите во сферите на безбедносно-разузнавачките служби, правосудниот систем и јавната администрација, но и борбата против корупцијата и организираниот криминал кои беа одредени како приоритетни од страна на ЕУ.

Османи рече дека за сите овие области имаме што да кажеме пред Европската унија, а напомена дека неодамна е донесен и Законот за спречување на корупција и судир на интереси.

Евроамбасадорот Самуел Жбогар пред учесниците на седницата на собраниската Комисија меѓу коишто имаше и амбасадори на други земји членки на ЕУ и регионот, претставници на невладини организации и координаторите на сите пратенички групи, истакна дека Собранието изминатите неколку месеци завршило голема работа во однос на спроведувањето на Договорот од Преспа, но и во однос на донесување дел од реформските закони меѓу кои и тој за борба против корупцијата.

Голема посветеност, според Жбогар, покажала македонската Влада за финализирање на процесот на уставни измени и натамошно спроведување на реформите и додаде дека таа иста посветеност се очекува да се задржи и во наредните неколку месеци додека трае романското претседателство со цел да се согледа и утврди видлива промена во земјата која што ќе го отвори патот кон отпочнување на преговорите.

-Пред вас има предизвикувачки период со претседателските избори што претстојат што ќе доведе до намалување на времето што е потребно за спроведување на овие реформи, практично остануваат два месеци пред да почне кампањата, што секако ќе ја попречи и работата на Собранието. Клучниот и најтешкиот резултат секако ќе биде да се постигне еден вид на преседан во владеењето на правото и судството. Во однос на тоа беа усвоени некои закони следејќи ги препораките од ЕК, од Венецијанската комисија, од ГРЕКО што е навистина добро, но промената на законите не е доволна за да се промени однесувањето, порача Жбогар.

Изрази надеж дека што е можно побрзо ќе бидат назначени членовите на новата Антикорупциска комисија и дека изборите нема да се одржат без ваква комисија.

-Новиот состав на Антикорупциската комисија ќе биде индикатор за искреноста на Собранието, на Владата во борбата против корупцијата, рече Жбогар и нагласи дека ЕУ одблиску ќе го следи овој процес. /МИА

Регион

Герапетритис: Грција нема да го поддржи барањето на Косово за членство во Советот на Европа

Паралелно посочи дека „Грција во надворешната политика останува принципиелна“ .

Грција ќе апстинира од гласањето, односно нема да го поддржи барањето на Косово за членство во Советот на Европа од политички причини, истакна шефот на грчката дипломатија Јоргос Герапетритис во интервјуто за општинското радио од Пиреас „Канал 1“, јави дописничката на МИА од Атина.

Министерот за надворешни работи на Грција во однос на процесот за членство на Косово во Советот на Европа објасни дена постојат три нивоа од кои првите две се необврзувачки, односно мислењето на надлежната комисија на Парламентарното собрание и гласањето на пратениците од ПС, кои излегоа со позитивен став.

-Но, овие две мислења се необврзувачки. Клучен орган, орган што носи одлуки за членство на Косово во СЕ е Советот на министри што ќе одржи состанок на 16 мај и ќе одлучи суверено. Независно од позициите што беа изразени, како на ниво на извештајот на Комисијата, така и на Парламентарното собрание во кое членуваат пратеници и не станува збор за влади на земјите-членки, позицијата на Грција останува цврста и непроменета. Како што сторивме и во минатото во слични случаи, Грција ќе апстинира од ова гласање, односно нема да го поддржи барањето за членство на Косово во Советот на Европа од политички причини, истакна Герапетритис.

Објасни дека иако еден од условите беше исполнет, сепак „не се исполнети некои од основните барање, како што е формирањето на Заедницата на српските општини во Косово и според тоа не е сменета суштинската политика на Грција“.

Паралелно посочи дека „Грција во надворешната политика останува принципиелна“ и истакна дека го охрабруваат дијалогот Приштина – Белград, сакаат мирно решавање на разликите, но сè зависи од волјата на инволвираните страни.

Во вторникот, Парламентарното собрание на Советот на Европа, со 131 глас „за“ го усвои извештајот на известувачката на СЕ за Косово, Дора Бакојани за членство на Косово во организацијата, а конечната одлука за членство ќе биде донесена следниот месец по гласањето на министрите за надворешни работи на Советот. /МИА

Македонија

Кривична пријава за директор на ЈП „Стрежево" Битола за злоупотреба на службена положба

Кривична пријава за директор на ЈП „Стрежево" Битола за злоупотреба на службена положба и злоупотреба на постапка за јавен повик .

- Одделот за криминалистичка полиција по добиена наредба од ОЈО Битола, презел предистражни дејствија и по обезбедена документација и извршен увид во истата, до ОЈО Битола, во координација со СВР Битола, поднел кривична пријава против М.Г. од Битола, директор на ЈП „Стрежево" Битола, соопштија денеска од МВР.

Кривичната пријава е за кривично дело „злоупотреба на службена положба и овластување” по чл.353 од КЗ и „злоупотреба на постапката за јавен повик, доделување на договор за јавна набавка или јавно приватно партнерство” од чл.275-в од КЗ во врска со чл. 22 и против Љ.М.П. од Битола, управител на правно лице од Битола.

- Имено, М.Г. знаејќи дека правното лице во текот на 2018 имало набавено тапкач за снег - ратрак, спровел постапка за јавна набавка на ратрак за потребите на ЈП „Стрежево" Битола со точно одредени технички карактеристики на потребниот ратрак како тој што го поседувало правното лице од Битола и истиот да не е постар од 1995 година, на кој оглас како најповолен економски оператор понудувач било избрано предметното правно лице од Битола, додека Љ.М.П. на конкретниот оглас доставила понуда со невистинити податоци дека ратракот кој го нуди е произведен во 1995 година, иако знаела и била свесна дека ратракот кој го поседувала е произведен 1993 година, по што бил склучен договор со наведеното правно лице на износ од 1.875.967 денари без ДДВ иако ратракот бил купен од странство за 414.492 денари, односно истиот бил набавен од ЈП "Стрежево" Битола за 4,5 пати повисока цена од набавната и за износот од 1.875.967 денари М.Г. го оштетил јавното претпријатие, а Љ.М.П. се стекнала со противправна имотна корист, појаснуваат од МВР во соопштението.

Македонија

Бојмацалиев: Од земја што бараше помош од други, сега нудиме помош за справување со миграција

Од земја што бараше помош од други држави, сега нудиме помош за справување со миграција, истакна денеска дополнителниот заменик - министер за внатрешни работи Митко Бојмацалиев во Кавадарци.

Тој со дел од раководството на МВР оствари работна посета на Регионалниот Центар за гранични работи Југ во Кавадарци, по повод одбележување на една година од почетокот на мисијата на ФРОНТЕКС во Република Македонија, заедно работење на македонската полиција, со полицијата ја Европската Унија, ФРОНТЕКС.

- Ова е значаен договор што беше постигнат, со цел да ги одбраниме и нашите граници и границите на Европската Унија, од приливот на мигранти. Тоа успешно го правиме. Овој договор има една голема историска важност. Бидејќи Министерството за внатрешни работи со тогашниот министер Оливер Спасовски ја имаше честа да го потпише првиот договор со ЕУ на македонски јазик. Со тоа ги урнавме сите лажни вести дека јазикот е продаден, јазикот не е заштитен, рече Бојмацалиев.

Со тоа, подвлече, уште еднаш се покажува дека македонската полиција е рамо до рамо со европските полиции.

- Заедно работиме и од пред некое време, веќе имаме барање и од други полиции, со цел да вршиме обуки на нивните полицајци, како се справуваме со миграцијата, додаде Бојмацалиев.

притисни ентер