Научниците успеале да трансформираат клетки на рак , кои настанале со епителна – мезенхимална транзиција во масни клетки и на тој начин спречиле настанување на метастази . Експериментот бил успешно изведен врз лабораториски глувци. Студијата од работата на научниците е објавена во магазинот ”Cancer Cell”.
Во неа се наведува дека малигните клетки може бргу да реагираат и да се прилагодуваат кон промена на условите на околината , така што може под одредени услови , да преминат во сосема друг вид клетки.
Главниот автор на студијата , професорот по биохемија на Универзитетот во Базел, Герхард Кристофори вели дека клетките на рак не само што преку ЕМТ се претвориле во масни клетки , туку и сосема престанале да се репродуцираат. Тоа значи дека масните клетки не може да се претворат во клетки на рак.
Процесот на епителна – мезенхимална транзиција (ЕМТ) е клучен за време на феталниот развој на плодот , бидејќи овозможува клетките на површинскиот епителен слој да се претвораат во мезенхимални матични клетки , кои потоа се диференцираат и од нив се создаваат различни ткива и органи.
Но , малигните клетки се способни за обратен процес за да настанат метастази од примарниот тумор.
Откако американската Агенција за храна и лекови веќе ги одобри двата лека , користени во претклинилката студија , научниците се надеваат дека ќе биде можна и нивна клиничка употреба.