Почнаа нови ископувања на локалитетот Градиште во Младо Нагоричане

Археолозите од НУ Музеј Куманово почнаа со овогодинешните ископувања на локалитетот Градиште во Младо Нагоричане.

Тие работат на два сектори на акрополата и западната тераса на локалитетот кој се проценува дека е од хеленистичкиот период, 4 и 3 век п.н.е.

Археолозите во изминатите години при истражувањата на  локалитетот пронајдоа остатоци од луксузна архитектура, градби во чии што склоп биле вградувани јонски столбови од локално производство, од локален камен од којшто се произведени, за што доказ се пронајдените деловите од столбовите. Открени беа ѕидови премачкани со малтер со фреско-декорација, што сведочи за високото културно и цивилизациско ниво на кое што се наоѓал овој безимен град на локалитетот Градиште.

Повеќеслојното наоѓалиште археолозите го истражуваат неколку години наназад  и досега се откриени делови од градби, меѓу кои значајни се остатоците од градбата кои најверојатно припаѓале на луксузна резиденција или палата, која датира од 4 век п. н.е.Пронајдена е и богата декоративна камена пластика и капители од јонски столбови.

Локалитетот Градиште во  Младо Нагоричане за прв пат е откриен пред околу 30 години, а уште при самото прибирање на површинскиот материјал, увидено е дека станува збор за богата населба лоцирана на левиот брег на Пчиња, која егзистирала во периодот на енеолитот, железното време, раната антика и хеленизмот. /МИА

Министерството за правда го испрати барањето за екстрадиција на Никола Груевски

 Министерството за правда попладнево соопшти дека го испратило барањето за екстрадиција на поранешниот македонски премиер Никола Груевски до Министерството за правда на Унгарија.

– Барањето за екстридиција се однесува за извршување на правосилна пресуда изречена во траење од две години и за водење на четири кривични постапки кои се пред домашните судови, а укажуваме дека за него се водат и четири истраги како и една предистражна постапка за коишто надлежните органи можат да започнат и судски постапки во зависност од истрагата, се вели во сопштението.

Во барањето е образложено дека ниедно од делата за кои Никола Груевски е правосилно осуден или се водат постапки против него не е политичко или воено кривично дело, односно, овие дела не се предвидени во Европската конвенција за екстрадиција како дела за кои може да биде одбиена екстрадиција.

Од Министерството за птавда наведуваат дека правата на Никола Груевски во секој момент биле обезбедени, вклучувајќи го и правото за одбрана пред судските органи согласно Европската конвенција за заштита на човековите права и основни слободи. Никола Груевски се бранел од слобода и во ниедна постапка не му е изречена мерката притвор. Имал обезбедено повеќе бранители по сопствен избор со кои имал непречени можности за комуникација и ги користел сите права кои му се на располагање согласно Законот за кривична постапка.

Укажуат и дека судската постапка во која е донесена пресудата и другите постапки кои се водат против Груевски се мониторирани од страна на ОБСЕ чија членка е и Унгарија.

Мисијата на ОБСЕ во Скопје на 28.8.2018 година, го објави првиот преоден извештај за активностите и предметите во надлежност на СЈО и за ниту еден од мониторираните предмети не е истакната забелешка во поглед на правата на обвинетите, ниту може да се истакне било каков сомнеж дека кривичните постапки се политички мотивирани. Овој извештај е јавно достапен на интернет страницата на ОБСЕ, велат од Министерството.

Исто така, истакнато е дека Република Македонија е безбедна земја и не се наоѓа во никаков конфликт, меѓународен или внатрешен, а кој би го ставил во опасност животот и телесниот интегритет на било кој поединец.

Никола Груевски како поранешен претседателот на Владата на Република Македонија, имал лично обезбедување од шест припадници на МВР кое му следува согласно домашната легислатива. Исто така, напоменуваме дека Груевски во ниеден случај не пријавил дека неговиот живот и личен интегритет биле во опасност.

Во барањето се укажува и на ништовноста на дадените помилувања од Претседателот на Република Македонија, како и на фактот дека истите беа отповикани, како и на тоа дека Никола Груевски самиот се откажа од даденото помилување со писмо доставено до кабинетот на Претседателот на Република Македонија.

– Република Македонија бара лицето Груевски да биде екстрадирано, а имајќи ја предвид сериозноста на кривичните дела, бараме истиот да биде лишен од слобода и задржан во притвор, потсетувајќи дека за него е издадена и меѓународна потерница, се посочува во соопштението од Министерството за правда. Во прилог на барањето за екстрадиција се доставени документи од Основен Суд Скопје 1, СЈО и ЈОРМ, со укажување дека досието ќе се дополнува.

Наскоро ќе проработи новиот објект на Ургентниот центар во Куманово

 Новиот објект на Ургентниот центар во Куманово наскоро ќе биде пуштен во употреба и во него ќе бидат сместени итната хируршка амбуланта, ортопедска, анестезиолошка амбуланта, компјутерска томографија и ЕХО дијагностика.

 Новиот објект на Ургентниот центар во Куманово, изграден со поддршка од Министерството за здравство и Проектната единица за обнова и реконструкција, наскоро ќе биде пуштен во употреба и во него ќе бидат сместени итната хируршка амбуланта, ортопедска, анестезиолошка амбуланта, компјутерска томографија и ЕХО дијагностика.

Началник на Одделот за хирургија, .д-р Методија Димковски, кој во оваа болница има 39-годишно работно искуство, изјави дека претходно биле сместени во подрумски простории, често поплавувани, без природно светло, а со новиот хируршки центар добиен е повеќе од 90 отсто поголем простор.

-Хируршкото одделение е секогаш најударно и едно од најактивните одделенија каде најчесто доаѓаат итни случаи, изјави д-р Димковски, кој посочува дека сега услугата ќе биде на едно место, ќе се обезбеди подобар пристап за пациентите, и тие нема да се препраќаат до рендген дијагностика. Нагласи и дека пациентите подобро ќе се опсервираат односно ќе им се врши динамична опсервација, нешто што досега го не постоело во болницата.

– Првпат се отвораат и во исто време активно ќе работат пет хируршки сали. Паралелно на условите за третман на пациенти, се унапредуваат и вештините на докторите односно наши колеги од клиниките од разни специјалности континуирано доаѓаат во нашата болница и на тој начин се реализира континуирана едукација. Општата болница Куманово покрива околу 200.000 жители од овој град и околината, истакна д-р Димковски.

Главната сестра на Опшата болница Куманово, Валентина Стојимировиќ, посочи дека со новиот објект ќе се добие и подобар пристап до здравствена услуга.

– По 32-годишно работно искуство во оваа болница, можам да констатирам дека сега значително се подобрени условите во однос на престојот, хигиената, како и храната на болните. Заеднички и посветено со целиот кадар секојдневно се обидуваме да придонесеме за што подобри услови за пациентите. Секако, новиот објект придонесува за поквалитетна нега на пациентите од нашиот град, вели Стојимировиќ.

Паралелно со оваа крупна инвестиција, со сопствени средства на болницата во тек се активности за унапредување на квалитетот на здравствените услуги во повеќе оддели, меѓу кои: реновиран простор во клиничка и биохемиска лабораторија, отворен е нов шалтер, на инфективниот оддел во тек е поставување изолација и варосување на собите и болничките ходници, комплетно е обновена салата за состаноци и архивата, реновирани се дел од собите на акушерското одделение, како и просториите за службата за обезбедување, а обновени се и камерите за видеонадзор во болницата. Во Општата болница Куманово е отворен и функционира нов центар за згрижување жртви од сексуално насилство. Во претстојниот период се предвидени и нови инвестиции. 

Почна откупот на тутунот во битолскиот дел на Пелагонија

 Подрачната единица на Министерството за земјоделство, шумарство и водостопанство со седиште во Битола информира дека почна откупот на тутунот од годинашната реколта.

Според раководителот на Подрачната единица, Методија Илиевски, откупот се врши на 17 откупни места, а се очекува да бидат преземени 3.364 тони тутун. Склучени се 3.408 договори и издадени се 2.475 евидентни листови.

-Откуп се врши на пунктови во населените места Горно Оризари, Могила, Добромири, Дедебалци, Добрушево, Ивањевци, Трновци, Беранци, Лисолај, Драгожани, Лопатица, а откупот го вршат претпријатија кои имаат склучено договор и имаат поставено пунктови во овој регион, односно Сокотаб, Алијанс Уан, Пашоски ДООЕЛ, Секе ДООЕЛ Прилеп, Тутунски комбинат ДООЕЛ Прилеп и Миссириан ДООЕЛ Струмица, посочи Илиевски.

Формирана е, додаде, и второстепена комисија која има обврска, доколку има потреба, да изврши дополнителна проценка на предадените количини на тутун. 

притисни ентер