На боиштата на Блискиот исток се борат 15 македонски државјани

До пред неколку години се бореле на страната на ИСИС, денес живеат нормален живот во земјава – безбедносните служби имаат информации дека на слобода се 57 повратници од Сирија.

Нив државата не може да ги гони, бидејќи учеството во странски војни е казниво дури по измените на законот во  2014-та година, а тие заминале и се вратиле претходно. Сепак, безбедносните органи уверуваат дека редовно ги следат нивните активности, и според сегашните проценки нема индиции за можно терористичко загрозување на безбедноста.

По измените на законот, интересот на македонските државјани за војување во Сирија драстично се намалил, но сепак некои се одлучувале да заминат.. Вообичаената рута е легално да стигнат до Турција, а потоа преку диви премини да стигнат до градот Џараблус, првата станица на сирискиот фронт. 

Дел од овие, односно 23 лица, се вратиле во земјава и се уапсени во акциите Келија. Тројца македонски џихадисти има и во турските затвори.

За последниот случај, кога во вторникот од Сирија беа донесени 7-мина, од МВР појаснуваат дека станува збор за џихадисти за кои знаеле и ги барале, а за 5 мина од нив имало и судска потерница. Потврдуваат дека тие биле  заробени од страна на Сириските демократски сили, кои се борат и против ИСИС и против режимот на Асад, а потоа предадени на Меѓународната коалиција предводена од САД. Во земјава биле донесени со авион на држава ченка на Коалицијата, а веднаш по стапнувањето на македонска територија биле уапсени.

Со ова Македонија стана првата европска земја што прифатила свои државјани, борци на ИСИС, заробени во Сирија. Македонските безбедносни служби процениле дека тоа е подобро за безбедноста на државата, отколку да останат таму.

Канал 5 вчера објави ексклузивни сведоштва на двајца од нив, снимени во затвор од сириската агенција АНХА.

Според информациите на МВР, во Сирија се уште има 15 активни борци на ИСИС од Македонија. Покрај нив, има и 9 жени, а некои од нив имаат и деца таму. Вкупно, од почетокот на војната, 156 македонски државјани војувале на боиштата во Сирија, а 35 загинале. За некои од нив има потврда, за некои не.

Собранието ги донесе реформските закони од сферата на безбедноста

Со консензус и поддршка од власта и опозицијата Собранието ги донесе клучните реформските закони во безбедносната сфера. 

На местото на  досегашната Управа за безбедност и контраразузнавање ја ќе се формира  агенција за национална безбедност која нема да биде во составот на МВР.

И покрај согласноста дека  тајната полиција во изминатиот период била јадрото ан сите проблеми и политички кризи,  клучната дилема за дел од пратениците е  дали станува збор сепак за суштинска реформа, забелешки за трансферот на дел од вработените на УБК како и учеството на пратеници во селекцијата на вработените

Министерот Спасовски потенцираше дека е особено горд што за прв пат се дава шанса за сериозен надзор над службите и дека со законот се дава силна можност да се штитат правата и слободите на граѓаните.

Со двотретинско мнозинство беше донесен и законот за координација на безбедносно разузнавачката агенција ,,со пакетот закони од безбедносната сфера се очекува да се стави крај на концентрацијата на моќ на тајната полиција и да се создаде ефикасна и департизирана служба во интерес на државата и граѓаните.

Општина Охрид: Забелешките на УНЕСКО ја одразуваат фактичката состојба

Забелешките што се наведени во извештајот на УНЕСКО ја покажуваат фактичката состојба на охридскиот регион, оценуваат од општина Охрид.

Во соопштението велат дека состојбата е детектирана уште во мониторинг мисијата на УНЕСКО во април 2017 година.

-Општина Охрид, во текот на изминатите две години ги зеде во предвид сите препораки во однос на ова прашање и во рамки на своите законски надлежности сериозно се посвети на исполнување на барањата на УНЕСКО.

Во тек е постапката за донесување на планот за управување со природното и културното наследство на охридскиот регион, а во понеделник на 27-ми мај ќе се одржи информативна сесија за нацрт-извештајот за стратегиската оцена на влијанието на животната средина од спроведувањето на овој план. Исто така во владина процедура е и носење на нов закон за управување со светското природно и културно наследство во охридскиот регион –велат од општината.

Вселенскиот патријарх Вартоломеј во официјална посета на Грција

Вселенскиот патријарх Вартоломеј денеска ја почна дводневната посета на Грција, при што попладнево во Атина ќе се сретне со поглаварот на Грчката православна црква, архиепископот Јеронимос.

– Посетата означува вртење нова страница помеѓу Вартоломеј и атинскиот архиепископ, Јеронимос, бидејќи нивните односи во изминатиот период беа заладени, пишува „Катимерини”.

Патријархот Вартоломеј утре ќе замине за областа Дилеси, каде што во присуство на архиепископот Јеронимос и претседателот на Грција, Прокопис Павлопулос грчкиот претседател, свечено ќе биде отворен Центарот за геронтологија, грижа и поддршка „Свети Порфири” на атинската архиепископија, што е изграден на црковен имот на површина од 27 хектари со капацитет од 64 места.

притисни ентер