Борисов: Два пати мисли пред да кажеш

Минатото и напластеното разногласие во толкувањето на  историските настани, повторно докажуваат дека како Дамоклов меч се надвиснуваат над односите што ги градат земјите сега.

Последен мегдан за тоа беа прославите на годишнината од илинденското востание.

Ниту лани-потпишаниот македонско-бугарски договор за добрососедство и пријателство изгледа не е доволен гарант за одредени кругови во двете земји, дека намерата и на едните и на другите била- еднаш засекогаш да се престане да се робува на минатото. 

Па така одново почнаа да се бараат точки и запирки во изјавите на политичарите и воскреснаа сомневањата дали и колку искрени биле заложбите за градење на добрососедски и со ништо неоптоварени односи и сето тоа поради тврдењата дали е само македонско и дали е само бугарско Илинденското востание а тешко се прифаќа дека е на сите.

Во последниот случај по неколкудневно затишје денеска се огласија премиерите на двете земји. Борисов отиде дотаму индиректно да порача дека кога ќе дојде време за ЕУ, ќе се потсетат на овој момент. Моментот кога во последното телевизиско интервју премиерот Заев илинденското го карактеризира за македонско востание. 

Заев денеска возврати со статус на фејзбук-критичарите во Македонија и во бугарија да немаат дилема пријателството и соработката се искрени.

„Драги пријатели и браќа од Бугарија, верувајте, искрено градиме пријателство кое неколку децении наназад беше изгубено. Тоа беше загуба за двете земји. Ние повторно го најдовме нашиот пријател и брат. Да не дозволиме да се враќаме назад. Тоа ни е обврска пред нашите деца. Некогаш можеби не сме доволно внимателни ние политичарите, некогаш правиме и грешки, но ве уверувам дека тоа е само невнимание, затоа што искрено сакаме соработка и пријателство како што тоа го потпишавме во договорот за добрососедство и пријателство“ - напиша претпладнево премиерот Заев на фејсбук, истовремено потсетувајќи на заложбата на Борисов и на министерката Захариева да се добие датум за старт на преговорите за членство со Европската унија и покана од НАТО.

„Никогаш нема да го заборавиме тоа пријателство кое е докажано на дело“, напиша Заев со повик да не се правиме слепи и глуви.  

,,Илинденското востание е херојски и трагичен венец на бугарското револуционерно движење за слобода и национално обединување.со решителност и жртва, без надеж за помош однадвор, Бугарите од Македонија и Тракија станаа во очајна, но достојна битка за правда. Бунтовниците го испишаа големото кредо на нашата национална револуција – “слобода или смрт”. Илинден нè потсетува дека слободата и историската вистина мора да се ценат и ревносно да се бранат“ - напиша пак бугарскиот претседател Румен Радев на својот ФБ профил , само неколку часа по заедничката македонско-бугарска прослава на годишнината од Илинденско востание во Благоевград.

Инаку , како што обврзува договорот за добрососедство, веќе е формирана македонско бугарска мешовита комисија од историчари кои би требало да ги разрешат дилемите од минатото. Ќе бидат ли поуспешни од политичарите?

Анѓушев: Платите растат како резултат на растот на економијата

Вицепремиерот  Кочо Анѓушев денеска истакна дека растот на економијата е резултат на растот на индустриското производство, градежништвото, земјоделството и трговијата и дека тоа сето тоа делува и на природен раст на платите.

-Државниот завод за статистика денес објави дека бруто просечата плата во јули 2019 година во однос на истиот месец лани пораснала за 5,5 отсто, додека просечната нето плата е зголемена за 4,3 отсто, а просечната нето плата веќе изнесува над 25 илјади денари. Растот на платите не е возможен без раст на индустријата, нагласи Анѓушев одговарајќи на новинарски прашање денеска на официјализирање на компанијата „Либерти Скопје".

-Се радувам што растот на бруто домашниот производ, кој во последните квартали е особено позитивен, е базиран на работата на реалниот сектор. Сите економски параметри се компатибилни, речиси со ист процент растат платите, индустриското производство, како и приходите во буџетот и тоа е една логична целина , истакна Анѓушев./МИА

Продолжуваат распитите за случајот „Рекет”, Агапи Дика и Зоран Азманов повикани во обвинителството

Со засилено темпо во Обвинителството за организиран криминал и корупција продолжува истрагата за случајот Рекет.

Претседателката на собранието на Меѓународниот сојуз на Боки 13, Агапи Дика два и пол часа сведочеше пред обвинителката Вилма Русковска. Се обиде да ги избегне новирските прашања излегувајќи од спореден излез на зградата на Апелација каде што се наоѓа канцеларијата на Русковска. Запрашана околу тоа на кои околности давала исказ рече дека истрагата ќе покаже, но и кратко рече дека не знае каде завршиле парите кои бизнисмените ги уплаќале на Меѓународниот Сојуз.

Работниот ден Русковска сепак го почна со продавачка во салон за мебел каде Бојан Јовановски купувал. А последен исказ даваше бизнисменот Зоран Азманов. Потврди дека Јовановски му се заканувал со објавување на документи од СЈО и Финансиската полиција. Рекет го нарече несреќен случај во кој Боки 13 искористувајќи ја моќта на медиумот се обидел да изнуди пари.

Засега Јовановски, Зоран Милески Кичеец и поранешната специјална обвинителка Катица Јанева се осомничени во случајот Рекет. Јанева точно еден месец е во притвор, но во притворското одделение во Шуто Оризари ќе остане и во следните 30 дена откако судот денеска и го отфрли барањето да и се определат поблаги мерки а како гаранција понуди имот, барање за кое негативно мислење даде и обвинителката Вилма Русковска.

Царовска и Адеми на работен состанок со донаторската заедница за секторот – образование, вработување и социјална политика

Министерот за образование и наука Арбер Адеми и министерката за труд и социјална политика Мила Царовска денеска присуствуваа на работниот состанок со меѓународните донатори за секторот образование, вработување и социјална политика.

Изразувајќи благодарност до присутните од Донаторската заедница и до Делегацијата на ЕУ, Адеми напомена дека координативниот состанок има важноста и значењето во исполнувањето на стратешките цели и определби на националните политики кон интеграција на земјата во Европската Унија.

– Важно е да го продолжиме и зајакнеме партиципативниот процес и координацијата на активностите во рамките на Стручното образование и обука како и спроведување и следење на секторските политики со фокус на остварување на резултати, а со цел обезбедување на долгорочен ефект и усогласени реформи во секторот, рече Адеми.

Министерството за образование и наука, истакна министерот, изминатиот период работеше на носењето добри и корисни политики преку спроведување на сеопфатна анализа од страна на ОЕЦД, за која веќе имаме и извештај но и јасен показател во која насока ќе се движат реформите.

– При тоа се донесоа и повеќе значајни закони како: Законот за високо образование, Законот за основно образование и Законот за наставниците и стручните соработници во основно и средно, а во фаза сме и на креирање на работна група која ќе започне со разработка на пакет законите во делот на средното и средното стручно образование, потенцираше Адеми пред присутните.

Царовска истакна дека изминатиот период Министерството за труд и социјална политика работело на повеќе процеси и реформи. Дел од нив се завршени, дел продолжуваат да се спроведуваат.

-Со социјалната реформа работиме на намалување на детска сиромаштија. Процесот на деинституционализација успешно се спроведува. Досега бројот на деца во институции е намален за 75 проценти, а до крајот на годината очекуваме да нема деца во домовите, рече Царовска.

Потсети дека се отворила и програмата со Светска банка за развој на социјални услуги на локално ниво.

-Успешно се спроведува реформата за стабилизација на пензискиот фонд. Работиме на квалификување на младите лица за што се предвидени активни мерки во Оперативниот план. Ова се само дел од процесите и реформите на МТСП, рече Царовска. /МИА

притисни ентер