Преименување и нова поставка предлага работната група за „Музејот на македонската борба“

Преименување на Музејот на ВМРО и итна ревизија на постојниот ентериер во него – бара работната група од Министерството за култура. 

Со ова, националната установа ќе добие ново преуредување кое ќе го опфати целокупниот историски моментум кој нема да прави општествени поделби, а да не биде, како што велат, партиски музеј.

„Според наше мислење, би требало доминантно место да земаат оригинални документи и оригинални предмети, a помалку да бидат застапени восочните фигури и таканаречените уметнички слики. Направен е еден континуитет од 1893 до 1991 година во кој од вкупно тринаесет поглавја во осум се чисто историја на ВМРО, а во другите пет повторно има елементи каде што повторно на индиректен начин се зборува за дејците на ВМРО низ историјата,“ изјави Александар Литовски, претседател на комисија за утврдување на стручноста на Музејот на ВМРО.

Групата детектирала низа неправилности и прекршувања по различни основи. Според нив, во првата година биле потрошени речиси 300.000 евра, за таа сума до отворањето да стигне до 12 милиони евра. Замерки има и за статусот на Музејот како „културно наследство“, бидејќи нема документи со кои музејскиот материјал во него е категоризиран како таков.

„Изградбата на овој музеј е ставена во музејска и кинотечна дејност, тоа е веќе прекршување на Законот за буџет и злоупотреба на пари кои што се наменски. Прекршување на Законот за музеј, посебно на член 7 кој се однесува на условите за основање на музејот, меѓудругото во него стои дека треба да биде изработен елаборат кој што го нема, не постои, вели Донка Барџиева Трајковска, член на комисија за утврдување на стручност на Музејот на ВМРО.

Работната група беше формирана во март со решение од тогашниот министер Алаѓозовски. Изработениот елаборат од 31 страна ќе биде доставен до Владата. Во него ќе биде содржано и барањето  да се состави стручна комисија која ќе работи на промените кои се бараат бидејќи направените пропусти се должат на претходната комисија чиј состав бил неадекватен.

Мицотакис: Договорот од Преспа не го решава, туку го интензивира проблемот

Договорот од Преспа не го решава проблемот, туку го интензивира, не го архивира, туку го одржува, рече Кирјакос Мицотакис.

Договорот од Преспа не го решава проблемот, туку го интензивира, не го архивира, туку го одржува, рече Кирјакос Мицотакис, претседателот на најголемата грчка опозициска партија Нова демократија во обраќањето на крајот од третиот „Thessaloniki summit", јави дописничката на МИА од Атина.

Мицотакис од Солун, уште еднаш го повтори ставот дека неговата партија нема да го поддржи Договорот од Преспа, објаснувајќи зошто тие сметаат дека договорот меѓу двете земји е лош договор.

– Уште еднаш ќе кажам, Договорот од Преспа е лош договор. Нова демократија нема да гласа ниту во сегашниот парламент, ниту во следниот, доколку не биде ратификуван во овој парламент. Оние работи што сега веќе се гласаат во Скопје,  се полоши и од почетниот текст договорен меѓу господинот Ципрас и господинот Заев, како што отпосле беше принуден да признае дури и господинот Коѕијас, основниот преговарач за договорот. На кратко, Договорот од Преспа не го решава проблемот, туку го интензивира, не го архивира, туку го одржува, надополнувајќи го со дополнителни негативни завршени работи за иднината, рече Мицотакис и додаде дека „погрешните управувања од страна на владата, за жал веќе ги отруја општествата и од двете страни".

Со оглед на тоа дека говореше на самитот организиран од Федерацијата на индустрии од Северна Грција, Мицотакис се задржа и на економскиот аспект на Договорот од Преспа за кој смета дека е негативен.

– Договорот Ципрас- Заев е договор што не им служи на нашите национални интереси и во областа на економската соработка, нешто што особено ве интересира. Мојата процена е дека на крај ќе создаде повеќе проблеми од тоа што се претпоставува дека ќе реши, рече Мицотакис и ги потсети присутните на податоците од минатата година дека Грција е трет најголем снабдувач и трет по големина трговски партнер на Македонија.

Лидерот на Нова демократија ги спомена и областите во кои има трговска размена, но и „милионите пристигнувања од соседната земја".

– Сѐ ова што ни кажува? Покажува дека и покрај 25-годишното национално нерешено прашање во нашите билатерални односи, и покрај речиси 10 годишната криза во Грција, и покрај големите технички, административни проблеми на царините, нашите економски односи останаа блиски.  Како што во суштина остана пријателски и односите на двата народи, кои во суштина не беа никогаш нарушени, иако постоеше ова нерешено прашање, рече Мицотакис и изрази стравување дека можеби овие односи сега се повредени поради Договрот од Преспа.

Лидерот на најголемата грчка опозициска партија, говорејќи за регионот и земјите од Балканот рече дека Нова демократија ја поддржува европската перспектива, но само доколку се исполнат предусловите.

– Грција, јас лично и секако Нова демократија ја поддржуваме европската перспектива на Западен Балкан , но непроменлив  предуслов за успешно да се заврши овој тек е комплетна усогласеност со европското законодавство. Во ова е вклучено не само владеењето на правото, туку и правилата на добрососедски односи, но и почитувањето на правата на националните малцинства, истакна претседателот на Нова демократија.

Мицотакис порача дека 100 години по крајот на Првата светска војна никогаш не треба да се заборави дека „едно е здравиот патриотизам, а друго национализмот", бидејќи, како што рече, патриотизмот дозволува градење мостови на соработка, а национализмот води до градење ѕидови на изолација, нешто што според лидерот на Нова демократија, особено важи за регионот на Балканот.

Промоција на директна авионска линија Охрид – Виена

На охридскиот аеродром „Свети Апостол Павле" денеска попладне ќе слета првиот авион на компанијата „Визер" на новата редовна авионска линија од и кон Виена.

Покрај сезонските, тоа ќе биде третиот директен редовен авионски лет што оперира од охридскиот аеродром, заедно со веќе воспоставените кон Цирих и Базел. Директна авионска линија од Охрид има и кон Лондон, но поради слаб интерес таа е во мирување до 2 април идната година.

Предвидено е на аеродромот првите патници од Виена да ги пречекаат Алпер Ерсој, генералниот директор на „ТАВ Македонија", Љупчо Јаневски, директор на Агенција за туризам, како и градоначалниците на Охрид и на Струга Јован Стојаноски и Рамиз Мерко. /МИА

СДСМ: Обезбедуваме повеќе пари за граѓаните, раст на платите, социјална праведност

Со предлог Буџетот за 2019 година изготвен од Владата предводена од СДСМ, обезбедуваме повеќе пари за граѓаните, економски раст, повисоки плати и подобра живејачка за сите граѓани.

Платите ќе растат во сите сектори.

Во образованието, здравството, судството, полицијата, детските градинки и јавната администрација, предвидено е зголемување на платите од пет отсто, додека докторите специјалисти ќе добиваат плати зголемени за 10 отсто.

Во 2019 година се очекува забрзување на растот на Бруто домашниот производ на 3.2 отсто, кадешто позитивен придонес врз растот е предвидено да имаат домашната побарувачка, извозот и капиталните инвестиции.

Невработеноста ќе опаѓа преку пакетот активни мерки за вработување – вреден 1.1 милијарда денари, што е историски највисок износ, со што се очекува стапката на невработеност да се намали на околу 20 отсто.

Со посветена и домаќинска работа, владата предводена од СДСМ продолжува да обезбедува повеќе пари и подобар живот за граѓаните.

Остануваме посветени на спроведување на мерките што обезбедуваат повисоки плати, економски раст, мотивирани работници, професионални институции, нови инвестиции и работни места и повисок животен стандард. /МИА

притисни ентер