На пристаништето на Псарадес, од грчката страна на Преспа, срдечни прегратки и охрабрувачки зборови.

Аплаузот и изразите на поддршка од високите гости ја навестија свеченоста на потпишувањето на спогодбата за ставање крај на 27-годишниот спор, по што шефовите на дипломатиите Димитров и Коѕијас ги ставија своите потписи на договорот. По нив, документот го потпиша и медијаторот Метју Нимиц, кој имаше причина за двојно славје. Денеска наполни 79 години.

Пред потпишувањето на договорот, претходеа обраќањата на двајцата премири. Научивме дека треба да учиме од историјата, а не да ја повторуваме. На темелите од минатото – градиме иднина, порача премиерот Зоран Заев.

Премиерот Ципрас рече дека договорот ги почитува основните принципи и вредности на двете страни. Призна и дека е љубител на балканската музика и дека со денешниот повод, повторно дошло време да се пеат среќни песни на Балканот.

- Една таква нова песна започнуваме да пишуваме овде во Преспа. Нашата цел е оваа песна на радоста да се пее многу векови и од многу идни генерации, на нашиот јазик и на вашиот јазик, во нашата земја и во вашата земја, од нашиот народ и од вашиот народ. Песна што ќе го слави мирот, рече Алексис Ципрас, премиер на Грција

Медијаторот Метју Нимиц ги пофали четворица лидери за како што посочи, мудрото лидерство и стратешката визија. За него, немало подобара роденденски подарок од денешниот.

Ми беше задоволство да соработувам со овие двајца министри, но и со сите претходно на овој долг и тежок процес разрешувајќи го овој проблем што долг период резултираше со една спогодба која е правична, чесна и спроведлива, тоа ќе биде успех не само за односите меѓу двете земји туку ќе служи и како приемр за регинот, дека два соседа ,можат да решат проблем ако се заложат за истиот, изјави Метју Нимиц, посредник во спорот за името

Додека се одвиваше потпишувањето на договорот, неколку стотици демонстранти се обидоа, но не успеаја да го пробијат полицискиот кордон и да влезат во селото. Полицијата употреби солзавец и ја разби толпата, која според грчките медиуми, со 80 автобуси претежно од Солун дошле во Преспа. Македонската и грчката делегација со глисери безбедно стигнаа во Отешево, на заедничкиот ручек.