Канада, Мексико и САД ќе го организираат СП 2026

Светската фудбалска федерација на денешниот Конгрес во Москва одлучи Мундијалот во 2026 година заеднички да го организираат Канада, Мексико и САД.

На гласањето беа присутни 203 од вкупно 210 делегати со право на глас. Од нив 134 гласаа за трите земји, додека 65 за Мароко.

За африканската држава ова е четврто губење на „домаќинството“ на СП, по поразот во финалното гласање.

Светското фудбалско првенство во 2026 година е првото на кое ќе учествуваат 48 земји, 16 повеќе од претстојното во Русија. /МИА

Интер почна преговори за продолжување на соработката со Икарди

Интер работи на нов договор за напаѓачот Мауро Икарди, објавија италијанските медиуми. 

Според „Кориере дело Спорт“ во моментот клубот преговара со сопругата на играчот Ванда Нара, кој е негов агент. Сегашниот договор истекува во 2021 година. Договорот предвидува откупна клаузула од 110 милиони долари.

Клубот сака да го продолжи договорот до 2023 година и да го зголеми износот за евентуален предвремен прекин на соработката на 130 милиони евра.

Во исто време, двете страни се уште не се имаат согласено за платата на фудбалерот. Интер нуди 6,5 милиони евра годишно, а Ванда Нара верува дека нејзиниот сопруг треба да добива 8 милиони по сезона.

Во тековната сезона, 25-годишниот Аргентинец играше четири натпревари за Интер. Има постигнато еден гол и една асистенција. 

Црвенковска вклучена во стручниот штаб на Вардар

 Поранешната македонска репрезентативка Билјана Црвенковска е нов член на стручниот штаб на РК вардар.

Таа ќе работи со тимот покрај главниот тренер Роберто Гарсија Парондо и тренерот на голманите Дејан Периќ.

Црвенковска досега беше на местото заменик директор во клубот каде работеше по завршувањето на професионалната кариера во 2014 година.

- Среќна сум за шансата што ја добивам и навистина се чувствувам почестена што ќе бидам дел од стручниот штаб на Вардар, односно помошник на тренерот Роберто Парондо. Ова е ново искуство и голем предизвик за мене. Ќе дадам се од себе максимално да му помогнам на стручниот штаб и на целиот тим. Знам како функционира тимот, се познаваме добро и очекувам соработка каква што и досега имав, изјави Црвенковска за клупскиот сајт на „црвено-црните“.

Вардар е првиот и единствен машки клуб во Македонија што ќе има женски тренер во стручниот штаб. 

Македонија за две места го подобри пласманот на ФИФА

 Македонската фудбалска репрезентација бележи скок од две позиции на ФИФА ранг-листата објавена денеска. „Црвено-жолтите“ со 1.344 бода се наоѓаат на 68. место.

Од противниците на Македонија во групата од Лигата на нации најдобро котира Ерменија (100. место), Лихтенштајн е 178-ми, а Гибралтар се наоѓа на 198. место.

На врвот се наоѓаат Белгија и Франција, а по нив во ТОП 10 се: Бразил, Хрватска, Уругвај, Англија, Португалија, Швајцарија, Шпанија и Данска.

Следното рангирање Светската фудбалска федерација ќе го изврши на 25 октомври.

притисни ентер