Фетел доминираше во претпоследниот тест пред стартот на сезоната во Формула 1

Себастијан Фетел и Ферари упатија порака кон конкуренцијата со рекордно брзиот круг што Германецот го забележа во денешниот четврти ден од втората серија предсезонски тестови на шпанската патека „Каталонија“ крај Барселона.
Со хипермеките гуми на „Пирели“, четирикратниот светски шампион заврти најбрз круг уште пред паузата за ручек, за 1:17.182 минути, со што го остави својот најблизок конкурент на повеќе од секунда заостанување.

Фетел, исто така, беше недостижен и во однос на поминатите тест километри, откако забележа огромна серија кругови (188) без никакви технички проблеми. Само Макс Верстатин му конкурираше на Себ по овој показател со 187 круга. Холандскиот пилот на Ред Бул, сепак не покажа брзина денеска и остана претпоследен на 12-тата позиција.

Изненадувачки, возачот на Хас, Магнус Ериксон беше втор. Пласманот зад Фетел беше пополнет од пилоти на помалите тимови, откако Луис Хамилтон остана едвај деветти и дури клубскиот колега во Мерцедес - Валтери Ботас беше побрз од Британецот со осмо време.

Првите десет ги комплетираа Роберт Кубица како резервен пилот на Вилијамс. Полјакот денес извози 73 круга.

Стофел Вандорн го израдува тимот на Мекларен со цели 151 круга, што е вистинско достигнување за британскиот тим, кој повтоорно се соочува со технички проблеми за време на тестовите пред почетокот на сезоната./МИА

СП 2018: Белгија убедливо ја совлада Панама

Белгија убедливо ја совлада Панама со 3:0 во првиот натпревар од групата Г на Светското првенство во Русија.

Белгиската репрезентација доминираше на теренот во текот на целиот натпревар и без поголеми проблеми дојде до победа.

Првиот гол во 47 минута го постигна Дрис Мертенс, а потоа Ромелу Лукаку прво во 68 минута зголеми на 2:0, а седум минути подоцна беше прецизен за конечни 3:0.

Во вториот натпревар од оваа група во Волгоград ќе се соочат Англија и Тунис. /МИА

СП 2018: Јеро: Имаме целосна доверба во Де Геа

Селекторот на шпанската репрезентација Фернандо Јеро изјави дека голманот Давид де Геа е смирен и сталожен по натпреварот со Португалија, во кој направи неколку грешки и прими три гола од португалскиот фудбалер Кристијано Роналдо.

Соседското дерби меѓу Шпанија и Португалија заврши со реми 3:3.

- Забележав дека Давид е смирен и сталожен. Во него сите имаме целосна доверба. Тимот имаше еден слободен ден и морам да кажам дека играчите се поопуштени, истакна Јеро.

Шпанија следниот натпревар го игра на 20 јуни против Иран. /МИА

СП 2018: Шведска со пенал ја совлада Јужна Кореја

Шведска со гол од пенал на натпреварот против Јужна Кореја стигна до минимална победа од 1:0 во групата Ф на Светското првенство во Русија.

Натпреварот во Нижи Новогород изобилуваше со прекршоци. Јужна Кореја покажа подобра игра во почетокот, контролирајќи го поседот на топката. Меѓутоа, најсериозната шанса во првиот дел ја имаше Шведска преку Маркус Берг, но голманот на Јужна Кореја Чо Хјун-Ву имаше уште одлична интервенција.

Швеѓаните во второто полувреме доминираа на терен. Во 61-та минута Ким Мин-Ву го фаулираше Виктор Клаесон, а судијата Агиљар по прегледување на снимката од ВАР системот досуди пенал за Шведска.

Капитенот Андреас Гранквист го реализираше пеналот за водство на Шведска од 1:0.

Во оваа група Шведска и Мексико водат со по три бода, а Германија и Јужна Кореја се без бодови. /МИА

притисни ентер