Продолжува СЕХА лигата со дуелот Мешков Брест - Вардар

Со натпреварот меѓу Мешков Брест и Вардар ќе продолжи натпреварувањето во СЕХА лигата.
Актуелниот шампион на ова натпреварување Вардар во период од три дена ќе одигра два дуела на гости, бидејќи по утрешниот дуел со Мешков Брест во сабота ќе гостува и кај словачкиот првак Татран Прешов.

Тренерот на Вардар Раул Гонзалез на овие натпревари според најавите нема да настапи со играчите кои имаат повреди: Вуко Борозан, Илија Абутовиќ, Владо Недановски и Иван Чупиќ, како и „златните ракометари“ од шпанската селекција Жоан Кањелас и Арпад Штербик. Се очекува нивно враќање за првиот дуел од продолжението од Лигата на шампионите на 10 февруари против Барселона на гостински терен.

- Нашето гостување во Брест ќе биде тешко, домаќинот е квалитетен тим. Очекувам добар натпревар и да ја почнеме годината со победа. Наша цел е да продолжиме со добрите резултати во сите натпреварувања. Некои играчи нема да бидат на располагање, но нивните замени ќе играат најдобро што можат, истакна Раул за официјалниот сајт на лигата.

Дуелот со Мешков Брест беше одложен и е од 12. коло, додека натпреварот со Татран Прешов е од 13. коло. Во оваа рунда вториот македонски тим во СЕХА лигата Металург во недела на домашен терен ќе игра против Војводина.

Вардар се наоѓа на првото место на табелата со 33 бодови./МИА

Фото: Вардар пристигна во Келн

Ракометарите на Вардар денеска пристигнаа во Келн каде викендов ќе ги играат натпреварите на Ф4 турнирот во Лигата на шампионите.

Вардарци кои ќе ја бранат титулата се првиот тим што пристигна во германскиот град. Доаѓањето на другите три полуфиналисти, сите се од Франција, е најавено за попладне.

За денеска планиран е и првиот тренинг, пред саботниот полуфинален меч со Монпеље.

Македонскиот шампион се надева дека ќе биде првиот тим што ќе го одбрани шампионскиот трофеј во ЛШ.

Наполи го претстави Карло Анчелоти за нов тренер

Италијанскиот фудбалски клуб Наполи го претстави Карло Анчелоти за нов тренер.

Фудбалскиот стручњак потпиша тригодишен договор вреден 6,5 милиони евра по сезона.

Претседателот на клубот Аурелио де Лаурентис пред неколку часа соопшти дека ја прекинале соработката со тренерот Маурицио Сари.

Анчелоти претходно беше тренер на Парма, Милан, Јувентус, Челзи, Реал Мадрид, ПСЖ и последно во Баерн Минхен. За него ова ќе биде прво враќање во Серија А по девет години.

Наполи заврши на второто место во Серија А  и следната сезона ќе игра во Лигата на шампионите./МИА

Леконт: Ѓоковиќ веднаш требаше да го оперира лактот

Поранешниот француски тенисер Анри Леконт изјави дека проблемот на Новак Ѓоковиќ е од ментална природа и се забележува дека не ужива на теренот. 

Според Леконт, најдобриот српски тенисер донел лоша одлука кога станува збор за неговото лечење и веднаш требало да замине на операција на лактот.

- Проблемот на Ѓоковиќ е од ментална природа. Мора да бидете решителни и да уживате во процесот на враќање. Се сомневам дека тој ужива на теренот, а треба да верува и да си докаже на себеси дека тоа е можно. Тој е одличен играч и мора повторно да освојува големи натпревари, но факт е дека не се врати на вистинскиот начин, потенцира поранешниот француски тенисер.

Според него за Ѓоковиќ не би било добро повторно да соработува со Борис Бекер.

- Најголемата грешка на Ѓоковиќ беше тоа што премногу долго ја одложуваше операцијата  на лактот, истакна Леконт.

Ѓоковиќ по тешкиот старт во 2018 година и по разочарувачките резултати, конечно на турнирот во Рим почна да игра на повисоко ниво, но се уште далеку од неговите најдобри периоди./МИА

притисни ентер