Зидан најдобар француски тренер за 2017 година

Тренерот на Реал Мадрид, Зинедин Зидан е прогласен за најдобар француски стратег за изминатата 2017 година, во изборот што го направи реномираниот „Франс Фудбал“.
Зидан минатата година оствари значајни резултати со Реал Мадрид, а годината ја заврши со пет освоени трофеи.
Французинот ги предводеше „Кралевите“ до шампионската титула во Шпанија, а веднаш потоа и до европска круна, односно триумфираше во Лигата на шампионите.
Новата сезона Зидан и Реал ја започнаа со триумф во Суперкупот на УЕФА одигран во Скопје, а потоа го освоија и Суперкупот на Шпанија. Годината Реал со францускиот стратег ја круниса со триумфот на Светското клупско првенство.
- Среќен сум поради наградата. Ова е круна за досегашната работа која ја направивме, не само јас туку и сите во клубот. Се надевам дека ќе се вратиме брзо на победничките патеки, изјави Зидан.
Во последно време неговиот тим игра под очекувањата, а резултат на таквата игра е заостатокот од дури 16 бодови зад лидерот Барселона во трката за титулата во Ла Лига.
Инаку за Зидан ова признание е втора индивидуална награда за изминатата 2017 година, откако Французинот беше прогласен и за најдобар тренер во изборот на ФИФА./MИА

СП 2018: Шаќири: Мојата радост беше полна со емоции

Швајцарскиот фудбалер Ѓердан Шаќири изјави дека не сака да ги коментира реакциите на радоста на неговиот победнички гол против Србија.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а стрелец на решавачкиот гол беше Шаќири во 90-та минута.

Швајцарскиот фудбалер со косовско потекло на голот и на победата се радуваше гестикулирајќи орел како симбол на албанското знаме, а многумина особено од српската страна го сфаќaат како политичка провокација.

- Не сакам да го коментирам тоа. Ја видовте мојата радост беше полна со емоции. Оваа победа е за Швајцарија и тоа е се што би рекол за темата, истакна Шаќири.

На сличен начин и неговиот соиграч Гранит Џака, кој исто така има албанско потекло, се радуваше на првиот гол кој го постигна за израмнување на Швајцарија. /МИА

СП 2018: Митровиќ: Многу наивно ги примивме головите

Српскиот фудбалер Александар Митровиќ по натпреварот со Швајцарија изјави дека многу наивно доволиле да примат два гола.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а Митровиќ во петтата минута го постига единствениот гол за српската репрезентација.

- Не знам што се случи, ги примивме головите многу наивно и многу глупаво. Наместо да го браниме резултатот...Не може да се оди како мува без глава, разочаран сум, истакна Митровиќ.

За Србија сега единствена шанса за пласман во осминафиналето е победа против Бразил.

- Треба да се бориме против Бразил и да играме за победа. И Костарика и Швајцарија покажаа дека може да се игра против нив, наведе српскиот фудбалер.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман. /МИА

СП 2018: Швајцарија ја совлада Србија

Швајцарија ја совлада Србија со 2:1 во натпревар од групата Е на Светското првенство во Русија.

Во возбудливиот натпревар со сериозни шанси на двете страни, српската репрезентација дојде до водство од 0:1 со голот на Александар Митровиќ во петта минута, резултат со кој се замина на паузата.

Во почетокот на вториот дел Гранит Џака беше прецизен и Швајцарија во 52-та минута израмни на 1:1.

Швајцарската репрезентација со голот на Џердан Шакири во 90-та минута дојде до победа од 2:1.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман./МИА

притисни ентер