Македонските кошаркарски надежи на силни турнири во Белград и Истанбул

Како дел од програмата која Македонската кошаркарска федерација (МКФ) ја спроведува во младите категории е претстојниот настап на две младински селекции на силни меѓународни турнири во Белград и Истанбул.
Репрезентативците на селекциите до 15 и до 16 години  во текот на овие четири дена ќе одиграат пријателски натпревари со нивните врсници од четири кошаркарски клуба во српската престолнина Белград.

Противници на македонските надежи ќе бидат екипите на Црвена звезда, Партизан, Мега Лекс и Земун.

Кошаркарите од двете национални селекции кои во изминатите седум дена се подготвуваа во Скопје, по завршување на турнирот во Белград, на 15 јануари ќе заминат за Истанбул, каде ќе продолжат со активностите играјќи уште неколку пријателски натпревари.

На турнирот во Истанбул, кој е дел од проектот на ФИБА насловен како „Заедно до 16-години“, црвено-жолтите ќе одиграат против Анадолу Ефес, Галатасарај, Дарушафака и најверојатно Фенербахче, топ четирите екипи во овие годишни возрасти во Турција, од кои впрочем потекнуваат и сите репрезентативци на оваа земја./МИА

СП 2018: Шаќири: Мојата радост беше полна со емоции

Швајцарскиот фудбалер Ѓердан Шаќири изјави дека не сака да ги коментира реакциите на радоста на неговиот победнички гол против Србија.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а стрелец на решавачкиот гол беше Шаќири во 90-та минута.

Швајцарскиот фудбалер со косовско потекло на голот и на победата се радуваше гестикулирајќи орел како симбол на албанското знаме, а многумина особено од српската страна го сфаќaат како политичка провокација.

- Не сакам да го коментирам тоа. Ја видовте мојата радост беше полна со емоции. Оваа победа е за Швајцарија и тоа е се што би рекол за темата, истакна Шаќири.

На сличен начин и неговиот соиграч Гранит Џака, кој исто така има албанско потекло, се радуваше на првиот гол кој го постигна за израмнување на Швајцарија. /МИА

СП 2018: Митровиќ: Многу наивно ги примивме головите

Српскиот фудбалер Александар Митровиќ по натпреварот со Швајцарија изјави дека многу наивно доволиле да примат два гола.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а Митровиќ во петтата минута го постига единствениот гол за српската репрезентација.

- Не знам што се случи, ги примивме головите многу наивно и многу глупаво. Наместо да го браниме резултатот...Не може да се оди како мува без глава, разочаран сум, истакна Митровиќ.

За Србија сега единствена шанса за пласман во осминафиналето е победа против Бразил.

- Треба да се бориме против Бразил и да играме за победа. И Костарика и Швајцарија покажаа дека може да се игра против нив, наведе српскиот фудбалер.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман. /МИА

СП 2018: Швајцарија ја совлада Србија

Швајцарија ја совлада Србија со 2:1 во натпревар од групата Е на Светското првенство во Русија.

Во возбудливиот натпревар со сериозни шанси на двете страни, српската репрезентација дојде до водство од 0:1 со голот на Александар Митровиќ во петта минута, резултат со кој се замина на паузата.

Во почетокот на вториот дел Гранит Џака беше прецизен и Швајцарија во 52-та минута израмни на 1:1.

Швајцарската репрезентација со голот на Џердан Шакири во 90-та минута дојде до победа од 2:1.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман./МИА

притисни ентер