Македонските кошаркари подготвени да му се реваншираат на Косово

Кошаркарската репрезентација на Македонија е пред голем испит. Црвено-жолтите ќе мораат да забележат победа најмалку во вечерашниот дуел против Косово, а најверојатно и против Естонија.
По двата порази од Косово на гости и Естонија на домашен терен кошаркарската репрезентација на Македонија е пред тешка задача во претквалификациите за Светското првенство што следната година ќе се одржи во Кина.

Избраниците на селекторот Давитков немаат друга опција освен да остварат победи во дуелите против Косово утре и против Естонија закажан за 16 август и тоа со најмалку 5 поени разлика.

Доколку сакаме сами да решаваме за нашата судбина, црвено-жолтите само со две победи сигурно ќе ги минат претквалификациите. Само на тој начин нема да стравуваме од исходот од последниот меч во Ц групата во кој Косово на домашен терен ќе игра против Естонија.

Македонските кошаркари имаа доволно време по мечот со Естонците да ги корегираат слабостите кои се провлекуваа во првите два меча, и конечно да ја прикажат играта која сите ја очекуваат, а која ќе биде доволна да се израдуваме на првата победа.

Дуелот Македонија – Косово ќе се игра вечерва во СЦ „Борис Трајковски“ со почеток од 20:30 часот.

Како што завчера објави Македонската кошаркарска федерација (МКФ) за овој натпревар со Косово, нема да бидат пуштени во продажба билети и тоа од безбедносни причини, па истиот ќе може да го следат само оние кои претходно имаа обезбедено блок карти за двата претквалификациски натпревари. /МИА

СП 2018: Златната топка за Лука Модриќ

Капитенот на Хрватска Лука Модриќ е прогласен за најдобар играч на Мундијалот во Русија. Тој ја доби престижната награда „Златна топка“.

Признанието за најдобар млад играч е за Килијан  Мбапе од победничката француска селекција.

Голманот на Белгија, Тибо Куртоа е прогласен за најдобар чувар на мрежата.

Франција во финалето на СП 2018 ја победи Хрватска со 4:2 и по втор пат стана Светски шампион.

Франција нов светски шампион

Репрезентацијата на Франција е нов светски фудбалски шампион, откако денес во финалето на Мундијалот во Русија ја победи Хрватска со 4:2.

Головите за Франција ги постигнаа Марио Манџукиќ (автогол 18.минута), Антоан Гризман (пенал 38.), Пол Погба (59) и Килијан Мбапе (65).

За Хрватска погоди Иван Перишиќ (28) и Марио Манџукиќ (69).

„Триколорите“ на овој начин го повторија успехот од 1998 година кога на свој терен се искачија на светскиот фудбалски трон, додека Хрватите со пласманот во финалето го надминаа 3.место освоено на истото СП пред две децении.

Мундијалот во Русија се играше од 14 јуни до денеска. Следното Светско првенство ќе се игра во Катар во 2022 година./МИА

Ѓоковиќ по четврти пат го освои Вимблдон

Најдобриот српски тенисер Новак Ѓоковиќ победи по четврти пат го освои Грен слемот Вимблдон, откако попладнево во финалето го совлада Кевин Андерсон со 3-0, по сетови 6:2, 6:2, 7:6 (7: 3).

До шестата победа во седмиот меѓусебен дуел Ѓоковиќ дојде со импресивна игра, особено во првите два сета, така што тој имаше мали проблеми само во финишот на третиот сет.

За Србинот ова беше 13. титула на Гренд слем турнирите и вкупно 69 во кариерата.

Наградниот фонд на Вимблдон изнесува 34 милиони фунти. /МИА

притисни ентер