10 годишното дете во стабилна состојба

10 годишното дете кое вчера околу 19 часот беше удрено од возило во движење на улицата “Борис Сарафов” во скопската населба Ѓорче Петров е во стабилна здравствена состојба, но има скршеница на главата и тежок потрес на мозокот информираат од Клиниката за неврохирургија.

Од таму велат дека детето е свесно и контактибилно, и дека нема потреба од оперативен зафат врз него.

Оваа трагедија предизвика лавина реакции од граѓаните. Жителите на Ѓорче Петров револтирани, велат дека низ улиците се вози многу брзо, бараат зголемено полициско обезбедување и поставување на повеќе семафори.

Вчера по несреќата жителите на населбата во знак на револт поради брзото возење на улиците, пред основното училиште “Мирче Ацев” ги превртеа контејнерите и го блокираа сообраќајот. Протести се најавени и за денеска, во попладневните часови.

Обвинувања до локалните власти за несреќата пристигнаа и од политичката партија ВМРО ДПМНЕ.

Од Град Скопје и општина Ѓорче Петров соопштија дека на критичното место ќе биде поставен семафор. Преку соопштение градоначалникот Александар Наумоски изрази жалење за незгодата. Повика на совесност кај возачите кои сообраќаат по таа улица, но и на разумност кај родителите и смирување на тензиите поврзани со овој настан.



Сончево и топло до крајот на неделава со температури до 27 степени

Следува период на сончево и топло време со пораст на температурата кон викендот.

Утринските температури ќе бидат постојано над нулата, а поголемо наоблачување со услови за појава на дожд се очекува на почетокот на следната недела и ќе биде проследено со умерено спуштање на температурата, соопшти УХМР.

Минималните утрински температури ќе бидат во интервал од 4 до 12, а максималните дневни ќе достигнат до 27 степени.

Струмичката болница обезбеди модерна ендоскопска и лапароскопска опрема за хируршки зафати

Струмичката болница обезбеди и започна со работа со нова модерна ендоскопска и лапароскопска опрема за потребите на одделот хирургија, информираа од оваа здравствена установа.

Како што соопштија оттаму, со лапароскопска хирургија се овозможува полесен третман на пациентите со минимални инвазивни третмани, помал губиток на крв, помал ризик од инфекции, полесно заздравување и пократок престој на пациентите во болница за разлика од отворените хирушки интервенции.

-Тимот на хирурзи, хирурзи на абдоминална хирургија, во болницата веќе подолго време работат лапароскопски операции, а во наредниот период ќе се работи на проширување на експертизата, доедукација на лекарите во лапароскопска хирургија, како и во гинекологија за проширување на видот на оперативните третмани кои досега се работеа во нашата болница со класични отворени хирушки методи, велат од ЈЗУ „Општа болница Струмица“.

Инаку, лани се направени вкупно 1.400 операции, од кои околу 300 лапароскопски хирушки интервенции.

Видео: Мечка трчала низ улиците на град во Словачка, меѓу повредените има и девојче

Мечка трчала низ улиците на град во Словачка, меѓу повредените има и девојче. Видеото е од 17 март, а кафеавата мечка е убиена во синоќа во локалната шума.

Словачкиот министер за животна средина Томаш Тараба изјави дека е убиена кафената мечка која повреди пет лица во еден словачки град.

На социјалните мрежи се шири снимка од мечка која на 17 март трча низ улиците на еден словачки град.

На тамошните градски власти им беа потребни десет дена за да ја пронајдат мечката, која беше убиена во локалната шума во вторникот.

Според Тараба, владата на Словачка користела дронови за да ја пронајде мечката, пренесе Би-Би-Си. Се проценува дека мечката има три години и тежи околу 70 килограми. Повредени се пет лица, меѓу кои и десетгодишно девојче, а двајца со рани и гребаници се пренесени во болница.

притисни ентер