Ќе се подобрува системот за сметководствени податоци на земјоделските стопанства

Прецизни податоци за рентабилноста на фармите, производствените трошоци и остварените приходи, треба да овозможи проектот за надградување на системот ФАДН што денеска го презентираа Министерството за земјоделство, шумарство и водостопанство (МЗШВ) и Делегацијата на Европската унија.

ФАДН е мрежа на сметководствени податоци од земјоделските стопанства која со новиот проект во претстојните 18 месеци ќе се унапреди според новата регулатива на ЕУ. Практично ќе се подобри, како што беше речено на презентацијата, користењето на ФАДН податоците за потребите на националната земјоделска политика.

Проектот вреден 800.000 евра, е финансиран од Националната програма ИПА 2013, а ќе го се спроведува МЗШВ во партнерство со италијанското Министерство за земјоделство, прехрана и шумарство, Италијанскиот национален совет за земјоделско истражување и анализа на аграрната економија и полскиот Институт за земјоделска економија и храна.

- ФАДН е единствена база за економско-финансиски податоци од земјоделските стопанства во земјава. Нејзиниото подобрување ќе значи можност за креирање ефикасни земјоделски политики, следење на трендовите и промени во аграрниот сектор во насока на поголеми приходи од што придобивка ќе имаат земјоделците, истакна министерот за земјоделство Љупчо Николовски.

Според него, ФАДН е централен инструмент за следење на економскиот развој на земјоделството и земјоделските стопанства во земјите членки на Европската унија и затоа, едно од барањата во процесот на прилагодување на институциите кон ЕУ е воспоставувањето ваква национална мрежа за прибирање сметководствени податоци од земјоделски стопанства.

Никола Бертолини од Делегацијата на ЕУ најави промени на европските аграрни политики поради Брегзит. Како што рече, овој процес ќе влијае врз буџетот, а тоа ќе значи дека со помалку средства земјите мора да бидат поефикасни.

Амбасадорите на Италија и Полска, Карло Ромео и Јацек Мултановски, изразија задоволство што нивните земји ќе можат да ги пренесат ЕУ-искуствата во Македонија.
За македонскиот ФАДН, прибирањето сметководствени податоци почна во 2010 година со репрезентативен примерок од 300.000 земјоделски стопанства. Лани, репрезентативниот број се зголеми на 700.000, класифицирани по економска големина и тип на  производство. 

Дезинсекција на подрачјето на општина Демир Хисар

 Екипи на ЈЗУ Центар за јавно здравје-Битола денес и утре на подрачјето на општина Демир Хисар ќе вршат превентивна систематска дезинсекција.

Од ЈЗУ Центар за јавно здравје-Битола информираат дека акцијата се врши согласно Законот за заштита на населението од заразни болести и препораките на Министерството за здравство, а врз основа на одлуката на Советот на општина Демир Хисар за спроведување на превентивна систематска дезинсекција на територијата на тамошната локална самоуправа.

Запрашувањето со цел уништување на комарците ќе се врши во периодот од 19 до 2 часот по полноќ, со апаратура за УЛВ ладно запрашување поставена на пикап-возило. Со оглед на тоа дека активностите ќе се изведуваат во вечерните часови, на возилото со апаратурата за дезинсекција ќе му предходи  друго возило означено со ротационо светло.

Со дезинсекцијата ќе бидат опфатени зелените површини во општината, подрачјата по течението на реките и водотоците, застојни води и подрачјата околу каналниот систем на територијата на општина Демир Хисар, урбани населби и локалитети предвидени во планот и програмата.

Пред Собранието изутринава мирно, сообрачајот нормализирана

Пред Собранието на Македонија изутринава е мирно по синоќешните насилни протести во кои се повредени седум полицајци и приведени 25 демонстранти. 

Барикадите се остранети, а сообраќајот по улиците околу собраниската зграда се одвива нормално. Забележливо е помало полициско присуство.  

МВР по синоќешните настани соопшти дека дел од демонстрантите на вчерашниот јавен протест во Скопје, употребија распрскувачки средства и насилно ја турнаа заштитната ограда, истовремено обидувајќи се насилно да влезат во Собранието. Со цел да се спречи ескалирање на ситуацијата и насилен упад во Собранието, а постапувајќи согласно процедурите, полицијата уопотреби солзавец, информира МВР.

Министерството за внатрешни работи потенцира дека го почитува правото на мирен протест, но нема да дозволи употреба на сила и насилен упад, како и нарушување на јавниот ред и мир. Министерството апелира на демократски начин на изразување на јавното мислење.

Повеќе информации од МВР за вчерашните случувањата пред законодавниот дом во центарот на Скопје ќе бидат соопштени во текот на денов.  

Протестите беа против Договорот за решавање на македонско-грчкиот спор за името и стратегиско партнерство потпишан вчера во Псарадес.

Нова демократија: Тажен и срамен ден за Грција

Тажен и срамен ден за Грција, бил вчерашниот според Нова демократија и поради инцидентите во близина на Преспа и поради потпишаниот договор.

Од грчката опозициска партија коментираат дека Ципрас и Каменос вчера ја отстапија можноста „граѓаните на ПЈРМ да се нарекуваат Македонци и да говорат македонски јазик“, јави дописничката на МИА од Атина.

- Во исто време додека Ципрас и Коѕијас славеа во Преспа за еден договор што им штети на националните интереси, на полицијата и беше дадена наредба да покаже, до сега невидена, бруталност, испраќајќи ги дури и во болница граѓаните кои ја покажаа нивната патриотска чувствителност. Не е само тажен ден за Грција, туку е и ден на срам за Ципрас и Каменос, бидејќи заедно, на граѓаните на ПЈРМ им ја отстапија можноста да се самонарекуваат „Македонци“ и да поддржуваат дека говорат наводен македонски јазик, соопштуваат од опозициската партија и додаваат дека „македонски јазик и македонска националност не прифатила ниту една претходна грчка влада“.

Од Нова демократија коментираат дека грчкиот народ со право бил бесен, бидејќи сфатил дека коалиционата грчка влада за да се задржи на власт „веќе не води сметка за националните интереси“. Паралелно ги повикаа граѓаните да покажат смиреност и воздржаност. 

притисни ентер