Македонија

Палитов: Не сме за издавање на „Фени“ под наем

Вработените на „Фени“ не се за издавање на нивната фабрика под наем, затоа што со тоа нема никаква иднина за вработените, а закупецот може во секој момент да си оди затоа што не платил ниту денар за фабриката, ниту има некаква инвестиција во неа.

Ова го истакна денеска Ѓоре Палитов, претседател на Синдикалната организација во кавадаречкиот комбинат. Тој рече дека нема да дозволат некој да прави краткорочни профити без да инвестира и без да се знае судбината на сите вработени и на побарувањата на сите доверители.

- Стечајот треба да заврши во најкраток рок, како и што ни беше ветено, независно дали Апелација ќе ја врати фабриката во предстечајна постапка или преку реорганизација, апелираше Палитов до надлежните институции.

Се осврна и на, како што рече, вчерашните обвинувања кон него како претседател на Синдикалната организација при „Фени Индустри АД“, од страна на некои медиуми.

- Имено, јас ја имав таа несреќа да бидам претседател на Синдикатот на “Фени” во можеби најтешкиот период во последните 15 години. Но во едно сум сигурен, а тоа е дека ја извршувам оваа функција максимално транспарентно, со преголема енергија и само со една цел, враќање на „Фени“ на правите патеки, односно помагање за рестартирање на комбинатот. Во согласност со ова како и за моите колеги, јас како борец за општото добро сум во постојан контакт и со другите загрозени субјекти од овој стечај, а тука спаѓаат и транспортерите. Точно е дека јас бев присутен на тој состанок по нивно барање и разговаравме за моменталните проблеми и евентуалните последици за сите нас. Ниту имам лична корист од некого да фаворизирам, ниту имам желба да критикувам. Имам улога на лидер на вработените и тоа го правам. Ние само сакаме „Фени“ да добие сопственици кои го сакаат најдоброто за фабриката и кои се подготвени да инвестираат во неа, рече тој.

На сите кои се служат со закани и уцени, им порача да се појават јавно и да не се кријат, затоа што, како што нагласи, ќе им следи и кривична пријава.

Свет

Девојка од Украина е фатена како си го продава 2 – годишниот син, барала за него 23.500 евра

Во украинскиот град Днипро, 19-годишна жена се обидела да го продаде сопствениот двегодишен син, соопшти локалната полиција, пренесуваат украинските медиуми.

Девојката наводно побарала еден милион гривни, што е околу 23.500 евра за своето дете. Деветнаесетгодишната девојка наводно му го понудила детето на својот познаник и договорила средба со него. Во вторникот полицијата привела маж додека носел пари на договорената локација.

Девојката наводно рекла дека не сака да се грижи за својот син, па решила да го продаде. Со парите што би ги добила планирала да отвори сопствен бизнис.

Детето е приведено во полиција и предадено на надлежните органи. Неговата мајка е обвинета за трговија со луѓе.

Македонија

Лукаревска: Да го почекаме вториот круг, ќе бидеме фактор на стабилност за формирање нова Влада

Очекувам дека кај граѓаните ќе надвладее разумот, а не инаетот.

Изборите не се за нашите интереси и функции туку за доброто на државата, рече Сања Лукаревска во „Само вистина“ на Канал 5.

До кога вие ќе се правите поголеми Македонци од сите нас. Сите сме Македонци.

Сите меѓународни претставници кажаа дека ова е најдобрата преговарачка рамка и дека подобар договор не може да имаме. Ова е нашата последна шанса.

Во однос на можно коалицирање со ЗНАМ на Димитриевски: За танго се потребни двајца, да видиме после 8 мај дали делиме исти вредности.

Македонија

Битиќи од Чучер Сандево: На 8 мај гласовите се бројат од нула

Потпретседателот на СДСМ и ко-носител на парламентарната листа во изборна единица 2 на „Коалицијата за европска иднина“ вечерва се обрати на централниот митинг во Чучер Сандево од каде порача дека не постои разлика која е недостижна.

„На 8ми мај, се почнува од почетокот, гласовите ќе се бројат од нула. Борбата не е завршена. Секој од нас има втора шанса да се вклучи енергично, со верба во себе и во СДСМ и да го промени текот на настаните. Ова од нас го бараат нашите деца, нашата држава, ова го бараат за да им ја заштитиме иднината.“ – кажа Битиќи

Дополнувајќи дека е потребен поглед напред, кон визијата за просперитетна и сплотена Македонија, членка на ЕУ, со силен економски раст и општество во кое секој граѓанин е третиран и ценет подеднакво.

„Една работа е јасна од првиот круг на претседателските избори, а тоа е дека ВМРО-ДПМНЕ и Гордана Силјановска го достигнаа својот максимум на гласови, го достигнаа плафонот. Повеќе нема што да бараат, ниту да очекуваат од граѓаните на 8ми мај. Толку можат, ништо повеќе. А тоа не е доволно за победа на претседателските избори.

Ве уверувам дека со оваа реторика која што ја има ВМРО-ДПМНЕ, со ксенофобијата на Гордана Силјановска Давкова не постојат гласови од албанскиот електорат кои тие ќе можат да ги добијат во вториот изброен круг на претседателските избори. За разлика од нив, пред нас е хоризонтот на гласови кон кој треба да се движиме на 8ми мај.“ – истакна Битиќи

Тој се осврна на фактот дека Македонија не е само ВМРО-ДПМНЕ, Македонија е многу повеќе, таа е на сите. На Македонците, Албанците, Србите, Турците, Ромите, Бошњаците, Власите - на сите кои се борат за европска држава.

“Упатувам повик за будење на сите прогресивни сили во нашата земја. Време е за уште повеќе средби со граѓани, да работиме за поголема поддршка, да ја испратиме нашата порака до секој еден граѓанин. Не е време за повлекување, за откажување. Обединети сме и ќе застанеме заедно – нема да дозволиме никој да ни ја раздели партијата или државата. Не се откажуваме ни од иднината а ниту од прогресивноста на заедништвото!“ – истакна Битиќи, се наведува во партиското соопштение.

притисни ентер