Судењето за „Труст“ продолжува на 21 ноември

Првообвинетиот во случајот “ТРУСТ”, бизнисменот Сеат Кочан не се чувствува виновен за делото за кое го товари Специјалното јавно обвинителство.
Вина не чувствуваат ниту второ и трето обвинетите Василије Авировиќ и Сафет Ватиќ. Претставниците на “Трансмет”, “Силекс Неметали” и “Вато”, фирми кои СЈО ги товари дека со невистинити документи добиле тендер од ЕЛЕМ вреден 17 милиони евра се изјаснија дека правните лица не се кривично одговорни.

На воведното обраќање одбраната истакна дека обвинетите никого не измамиле и дека се погрешно обвинети. Адвокатот  Ванчо Митев на рочиштето рече дека откако ги слушнал незаконски прислушуваните разговори на високи личности од власта, очекувал дека тие ќе седнат на обвинителната клупа, а не неговиот клиент Авировиќ, за кој вели дека не е играч од висок ков за да игра големи игри.

Обвинителот Гаврил Бубевски во воведните зборови истакна дека со доказите што ќе ги презентираат, ќе докажат дека обвинетите биле водени од убедувањето дека криминалот се исплати и дека трупањето пари и збогатувањето на штета на граѓаните е активност што поминува во Македонија. Тој рече дека ќе докажат дека со невистинити документи, во случајот биле погазени принципите на здравата конкуренција и дека биле изиграни правилата на јавните набавки. Бубевски не ја исклучи можноста за проширување на постапката со нови лица.

На почетокот на рочиштето одбраната побара да се одложи расправата затоа што не им биле дадени сите докази на увид, по што обвинителот Артан Ајро им ги предаде на одбраната сите докази за случајот, освен незаконски прислушуваните разговори, кои ги има само Судот. По предавањето на материјалите судијката не дозволи одложување и ја почна главната расправа.


Дезинсекција на подрачјето на општина Демир Хисар

 Екипи на ЈЗУ Центар за јавно здравје-Битола денес и утре на подрачјето на општина Демир Хисар ќе вршат превентивна систематска дезинсекција.

Од ЈЗУ Центар за јавно здравје-Битола информираат дека акцијата се врши согласно Законот за заштита на населението од заразни болести и препораките на Министерството за здравство, а врз основа на одлуката на Советот на општина Демир Хисар за спроведување на превентивна систематска дезинсекција на територијата на тамошната локална самоуправа.

Запрашувањето со цел уништување на комарците ќе се врши во периодот од 19 до 2 часот по полноќ, со апаратура за УЛВ ладно запрашување поставена на пикап-возило. Со оглед на тоа дека активностите ќе се изведуваат во вечерните часови, на возилото со апаратурата за дезинсекција ќе му предходи  друго возило означено со ротационо светло.

Со дезинсекцијата ќе бидат опфатени зелените површини во општината, подрачјата по течението на реките и водотоците, застојни води и подрачјата околу каналниот систем на територијата на општина Демир Хисар, урбани населби и локалитети предвидени во планот и програмата.

Пред Собранието изутринава мирно, сообрачајот нормализирана

Пред Собранието на Македонија изутринава е мирно по синоќешните насилни протести во кои се повредени седум полицајци и приведени 25 демонстранти. 

Барикадите се остранети, а сообраќајот по улиците околу собраниската зграда се одвива нормално. Забележливо е помало полициско присуство.  

МВР по синоќешните настани соопшти дека дел од демонстрантите на вчерашниот јавен протест во Скопје, употребија распрскувачки средства и насилно ја турнаа заштитната ограда, истовремено обидувајќи се насилно да влезат во Собранието. Со цел да се спречи ескалирање на ситуацијата и насилен упад во Собранието, а постапувајќи согласно процедурите, полицијата уопотреби солзавец, информира МВР.

Министерството за внатрешни работи потенцира дека го почитува правото на мирен протест, но нема да дозволи употреба на сила и насилен упад, како и нарушување на јавниот ред и мир. Министерството апелира на демократски начин на изразување на јавното мислење.

Повеќе информации од МВР за вчерашните случувањата пред законодавниот дом во центарот на Скопје ќе бидат соопштени во текот на денов.  

Протестите беа против Договорот за решавање на македонско-грчкиот спор за името и стратегиско партнерство потпишан вчера во Псарадес.

Нова демократија: Тажен и срамен ден за Грција

Тажен и срамен ден за Грција, бил вчерашниот според Нова демократија и поради инцидентите во близина на Преспа и поради потпишаниот договор.

Од грчката опозициска партија коментираат дека Ципрас и Каменос вчера ја отстапија можноста „граѓаните на ПЈРМ да се нарекуваат Македонци и да говорат македонски јазик“, јави дописничката на МИА од Атина.

- Во исто време додека Ципрас и Коѕијас славеа во Преспа за еден договор што им штети на националните интереси, на полицијата и беше дадена наредба да покаже, до сега невидена, бруталност, испраќајќи ги дури и во болница граѓаните кои ја покажаа нивната патриотска чувствителност. Не е само тажен ден за Грција, туку е и ден на срам за Ципрас и Каменос, бидејќи заедно, на граѓаните на ПЈРМ им ја отстапија можноста да се самонарекуваат „Македонци“ и да поддржуваат дека говорат наводен македонски јазик, соопштуваат од опозициската партија и додаваат дека „македонски јазик и македонска националност не прифатила ниту една претходна грчка влада“.

Од Нова демократија коментираат дека грчкиот народ со право бил бесен, бидејќи сфатил дека коалиционата грчка влада за да се задржи на власт „веќе не води сметка за националните интереси“. Паралелно ги повикаа граѓаните да покажат смиреност и воздржаност. 

притисни ентер