Рестораните по патиштата, бензинските, аеродромите, ќе работат 24 часа

- Рестораните и кафетериите покрај патиштата, на бензинските пумпи, аеродромите, автобуските станици и граничните премини ќе работат 24 часа, а не ограничено како досега, предвидуваат измените на Законот за угостителска дејност кои денеска го поминаа првото читање пред собраниската Комисија за економски прашања.

Членовите на Комисијата едногласно го поддржаа владиниот предлог со оценка дека ќе го стимулира угостителството надвор од градовите и населените места, но и транзитниот туризам.

- Ова е мала, но многу битна измена со која значително ќе им помогнеме на угостителите посебно во летните периоди кога низ Македонија транзитираат многу туристи, нагласи заменик министерот за економија Христијан Делев, образложувајќи го текстот.

Поздравувајќи го ваквото решение, претседателот на Комисијата Љупчо Димовски истакна дека една од придобивките ќе биде и можноста за отворање нови работни места и остварување поголем прилив на средства.

- Сега  секој добронаменер турист од Куманово до Гевгелија ќе може да се освежи во кое било време, рече Димовски.

Според Владанка Авировиќ од Социјалистичка партија, со измените не само што се корегира досегашниот пропуст, туку и се усогласуваме со праксата во Европа каде работното време на угостителските објекти покрај патиштата, бензинските,... е 24 часа.

- Исто така, мора да се земе предвид дека за нас туристичката сезона е многу битна и не ретко, туристите кои застануваат да наполнат бензин, не можат да седнат, да каснат, да се одморат со кафе или да си купат каква било ситница, напомена Авировиќ.

За Драган Цуклев од ВМРО-ДПМНЕ, измените ќе овозможат туристите да ја сменат сликата за Македонија како транзитна дестинација.

- Досега, приходот од транзитните туристи беа само патарините. Но, веќе се менува сликата за Македонија, изградени се повеќе угостителски објекти. На пример во Гевгелија, долж Коридорот 10 има пет бензински станици, сите со угостителски објекти и ресторани, а се гради и уште една, посочи Цуклев, додавајќи дека веќе се издадени и локациите на патот Демир Капија - Смоквица, исто така за изградба на угостителски и туристички објекти.
Со измените се намалуваат и глобите за прекршок на физичко лице, од досегашните 3.000  - 4.000 евра на 200.

Комисијата за економски прашања на седницата ги поддржа и дополнувањата на Законот за приватизација на државниот капитал кои, како што рече Делев, се мали, но исклучително значајни.

- Со измените точно пропишуваме како да се продава капиталот што државата го поседува надвор од границите. Практично, се адаптираме кон матичните земји во кои се наоѓа тој капитал и нивните законодавства, објасни заменик министерот Делев.

Во текот на дискусијата, Зоран Илиоски од ВМРО-ДПМНЕ сугерираше да се направи регистар на фирми од земјите во поранешна Југославија каде Македонија се уште има акции.

Македонија, според Делев, има имот во Хрватска, Србија и уште неколку земји од поранешна Југославија. 

Прекин во снабдувањето со вода на дел од Гостивар

Гостиварското јавно комунално претпријатие „Комуналец“ за утре најави повеќечасовен прекин во снабдувањето со вода за пиење на дел од градското подрачје. 

Причината како што наведуваат од таму е санирање на дефект.

- Прекинот е заради изведување поправки на цевководот во близина железничката станица. Планирано е тој трае до пладне, односно до поправка и и негово оспособување. Во овој период дел од корисниците во градот кои се снабдуваат со вода од градскиот водовод, нема да добиваат вода, информираат од ЈП Комуналец.

Покрај тоа, за утре се планирани прекини во снабдувањето со вода за пиење на целото гостиварско подрачје.

- Тоа е планирано да почне од утринските часови. Прекините ќе бидат во функција на пробно пуштање во работа на пречистителната станица и подготовките за редовно снабдување со филтрирана вода. Од овие причини бараме разбирање од граѓаните, потенцираат од ЈП „Комуналец“.

Сончево, температура до 32 степени, попладне нестабилно

Времето претпладне ќе биде сончево со мала локална облачност. 

Попладне облачноста ќе се зголемува главно во планинските региони на север и на запад, каде ќе има услови за краткотрајна нестабилност, некаде проследена со краткотраен пороен дожд и ретки грмежи. Во текот на денот ќе дува слаб до умерен северен ветер.

Утринската температура ќе се движи од девет до 16,  дневната од 25 до 32 степени. УВ-индексот ќе изнесува 7.

Во Скопје претпладне сончево со мала локална облачност, а од пладневните часови и во Скопската котлина ќе се зголемува облачноста, која во планините ќе има услови за краткотрајна нестабилност. Утринската температура ќе биде 14, а дневната ќе достигне до 29 степени.

Во следните денови ќе преовладува стабилно и топло време, а во попладневните часови ќе има услови за ретка појава на краткотраен дожд и грмежи, особено во западните и јужните делови. Температурите нема многу да се менуваат, а ветерот ќе биде главно северен. /МИА

Традицонално искачување на Титов Врв

Традиционалното 37-мо искачување на „Титов Врв“ во организација на планинарскиот клуб „Љуботен“ од Тетово по маркираната патека „Вакуф“ почна утрово во 6:30 часот од платото пред хотелот „Попова Шапка“.

Традиционалното 37-мо искачување на „Титов Врв“ во организација на планинарскиот клуб „Љуботен“ од Тетово по маркираната патека „Вакуф“ почна утрово во 6:30 часот од платото пред хотелот „Попова Шапка“ и се очекува пешачењето до највисокиот врв на Шара да трае околу четири до 4,5 часа.

Патеката, велат организаторите, е средно тешка и има вкупна должина од 14 километри во еден правец и висинска разлика од 1.047 метри. Се движи по тревна површина, по каменит предел и е делумно покриена со снег.

- Патеката е маркирана со класична планинарска маркација, дополнета со знаменца. Сите учесници ќе бидат распоредени помеѓу челото и крајот на колоната, помеѓу кои ќе има водичи на клубовите кои носат видливи ознаки за препознавање (на ранците ќе имаат акредитации со ознака организатор), посочуваат организаторите.

По кратката пауза на врвот, додаваат, планинарите ќе се вратат на Попова Шапка, околку 14 часот каде ќе бидат посужени со чај од „Пријателите на Шара“со што настанот официјално ќе биде затворен.

За искачувањето е потребно да се користи стандардна планинарска опрема за движење во зимски услови. Исхраната е сопствена, индивидуално предвидена за планинарска тура до 10 часа. Секој од учесниците треба да биде во добра психофизичка кондиција. 

Оваа година се очекува бројот на искачени планинари да биде над 800.  За турата има пријавени панинари од Македонија, Албанија, Бугарија, Србија, Косово, БиХ, Хрватска и Словенија. /МИА

притисни ентер