Македонија

Директорот на АЕК во посета на Јапонија

Директорот на Агенцијата за електронски комуникации Роберт Орданоски како потпретседател на Европското тело на регулатори за електронски комуникации (BEREC) од денеска до петок ќе престојува во посета на Јапонија.

Посетата е финансирана и организирана во рамки на меѓународната соработка на BEREC со регулатори и индустријата за електронски комуникации од развиени држави во светот.

Најавено е присуство на експерти и директори на регулатори за комуникации од повеќе држави.

За време на неколкудневниот престој во Токио планирано е да бидат остварени средби со Министерството за внатрешни работи и комуникации на Јапонија со кои ќе се разговара за модерните начини за регулација на пазарите за електронски комуникации, за ситуацијата на пазарите за електронски комуникации и за последните технички и технолошки трендови. Покрај ова ќе бидат остварени средби и со претставници на Сони ериксон, Нисан Моторс, Софтбанк, Нипон телеграф и телефон корпорација и КДДИ корпорација со кои ќе се разговара за новите софистицирани производи и за нивните планови за развој и можности за инвестирање надвор од Јапонија.

Од Агенцијата за електронски комуникации оценуваат дека ваквите средби се значајни, особено во овој период кога се создава новата европска регулативна рамка во која активно учествува и Република Македонија./МИА

Регион

Вучиќ: Со кампањата во Македонија, Курти ја поткопува регионалната стабилност

Предизборната кампања во Македонија најде место и на седницата на Советот за безбедност на Обединетите нации, каде синоќа се расправаше за извештајот за работата на УМНИК на Косово.

Српскиот претседател Вучиќ во своето обраќање рече дека косовскиот премиер Курти се мешал во внатрешните работи на Македонија и дека бил вклучен во предизборната кампања во земјава. Косовската претсеателка Вјоса Османи, пак, обвини дека Белград со терористички тактики го поткопувал уставниот поредок во Косово.

Свет

Швајцарија замрзна руски имот во вредност од 5,8 милијарди франци

Швајцарија замрзна руски имот во вредност од 5,8 милијарди швајцарски франци или 5,95 милијарди евра, соопшти денеска Државниот секретаријат за економски прашања на земјата (СЕКО).

Оваа бројка се однесува на вкупната вредност на руските средства замрзнати од Швајцарија од почетокот на војната во Украина до крајот на 2023 година.

Вредноста на замрзнатите руски средства во Швајцарија е помала отколку на крајот на 2022 година, кога изнесуваше 7,5 милијарди швајцарски франци.

„Вредноста на финансиските средства замрзнати во врска со санкциите против Русија изнесуваше 5,8 милијарди швајцарски франци на 31 декември 2023 година. Ова е за 1,7 милијарди швајцарски франци помалку од бројката пријавена за декември 2022 година. Покрај тоа, сега се блокирани 17 имоти во 7 кантони“ се вели во соопштението на СЕКО. /МИА

Регион

Првите шест авиони „Рафал“ во Хрватска пристигнуваат оваа недела

Хрватскиот министер за одбрана, Иван Анушиќ, денеска соопшти дека неделава во Хрватска ќе пристигнат првите шест од вкупно 12-те купени борбени авиони „Рафал“.

„Со историски прелет од Бордо до Загреб, пилотите на хрватското воено воздухопловство, кои беа обучени Франција, в четврток ќе ги донесат моќните ловци и нови заштитници на хрватскиот воздушен простор“, напиша Анушиќ на социјалната мрежа Х.

Тој додаде дека модернизацијата на воздушната флота е најголемата инвестиција на Владата и Министерството за одбрана во безбедноста на државата.

Во 2021 година Хрватска потпиша договор со Франција за купување на 12 половни француски борбени авиони „Рафал“ во вредност од 999 милиони евра.

Првиот авион беше преземен во октомври минатата година во француската воена база во Мон де Марсан.