Иванов: Македонија денес се бори за придобивките од победата над фашизмот

Ако некогаш Македонците се бореа против злото на фашизмот и нацизмот, денес Република Македонија се бори за придобивките што произлегоа од победата над фашизмот и нацизмот. Република Македонија се бори за почитување на меѓународното право како една од основите на меѓународниот поредок. Право, кое е придобивка на победниците од Втората светска војна.
Тоа го истакна претседателот на Република Македонија Ѓорге Иванов на свечената академија по повод 11 Октомври-Денот на народното востание, што вечерва се одржа во Македонскиот народен театар.

На 11 Октомври, истакна Иванов, Република Македонија прославува 72 години од почетокот на народното востание за ослободување на Македонија од фашистичкиот окупатор.

- Ние ја живееме слободата за која пожртвувано се бореа и се изборија храбрите борци во Народноослободителната и антифашистичка борба.  Нашите деца безбедно растат под знамето на слободата, знаме под кое се бореа илинденците и АСНОМ-ците. Благодарение на нив, ние денес сме свои на своето. За тоа сме им вечно благодарни, посочи Иванов.

Потсети на злото од фашизмот и нацизмот кои, како што рече, донесоа повеќе смрт од која било друга човечка идеја. Според него, овие погубни идеологии се уште не се мртви и не се целосно искоренети од Европа.

- Со загриженост ги следиме појавите на радикализам и екстремизам во Европа, па и во нашето непосредно соседство. Ги охрабруваме напорите за нивно сузбивање. Сепак, неопходно е да се третираат причините, а не само последиците на овие негативни појави кои ги загорчуваат пријателските односи меѓу народите и државите, потенцира шефот на државата.

Иванов истакна дека без сеќавање, нема иднина и додаде оти Европската унија треба да учи од минатото на разединета Европа.

- Лекцијата од Втората светска војна е дека во услови на криза треба да се биде проактивен, а не пасивен. Во услови на криза треба да се бараат решенија, а не изговори. Токму во моменти на криза треба принципиелно да се бранат заедничките вредности, слободата, демократијата, човековите права и човековото достоинство. Секогаш кога се прави компромис со темелните вредности, се поткопува темелот врз кој е изградена слободата и демократијата, рече Иванов.

Меѓународниот поредок, како што рече, беше дополнително зацврстен со меѓународното право. Од европските урнатини, наведе тој, овој пат се роди идејата за обединета Европа како мировен проект, идеја која мотивира и инспирира и доброволно ги придвижува општествата кон реформи.

- Но, денес, таа идеја се соочува со криза. Денес, Европа се соочува со последиците од последната светска економска и финансиска криза. Криза што не може да се надмине без почитување на основните принципи врз кои се темели Европската унија: мирот, демократијата, владеењето на правото, човековите права, правото на самоидентификација и човеково достоинство. Принципи во кои ја гледаме причината и смислата на нашата евроинтеграција. Република Македонија и македонските граѓани се придобивка за Унијата само доколку влезат рамноправни во мозаикот на различностите на Европската унија, со својот идентитет и со своето достоинство, потенцира Иванов.

Според него, тогаш и денес Македонија и Македонците се на страната на правдата, исправното и доброто. Пред 72 години македонскиот народ активно се вклучил во големата антифашистичка коалиција, а денес македонските мировници ги бранат слободата, демократијата и човековите права во светот.

- Сведоци сме дека кај некои во соседството отсуствува дури и толеранција. Кај некои постои толеранција. Некои ги прифаќаат различностите. Но, Македонија секогаш гледала подалеку од овие концепти и негувала нешто што е повеќе и од толеранцијата и од прифаќањето, а тоа е почитта кон различноста. Се толерира само она што се мора, а се почитува она што се сака. Цврсто сме решени да истраеме на нашиот праведен пат. Пат што пожртвувано го пробија великаните на нашата историја – илинденците и учесниците во големата Народноослободителна и антифашистичка борба на Македонија, додаде Иванов. /Извор: МИА/

Петров од трибината Агенда 20-24 : Потребно e сите заеднички да го создадеме македонскиот "green deal"

Потпретседателот на СДСМ, Коста Петров на програмската трибина на СДСМ  во Тетово на којашто се дебатираше за мерки за намалување на загадувањето на воздухот, потенцираше дека мораме сите заеднички да работиме на долгорочно решение. 

Загадувачите мора да се казнат, заклучи Петров и додаде дека ерата на неказнивост завршува.

"Буџетот на МЖСПП мора да се зголеми.Со ова процесот на трансформација на јавните објекти и домаќинствата на незагадувачко греење ќе биде побрз.Повеќе инспектори на терен за да се спречува палења на стрништа, горење кабли за бакар, недозволено фрлање отпад, рече Петров подвлекувајќи ги поентите на учесниците. 

Меѓу нив како предлог мерка е и воведување на постојана 24 часовна контрола на загадувачите и сите мали и средни капацитети од страна на државниот инспекторат за животна средина и локалните инспекторати, во соработка со граѓанскиот сектор преку воспоставување на граѓански зелени еко патроли како и вонредни контроли на сите издадени интегрирани еколошки дозволи и лиценци во животната средина, со особен акцент на загадувањето на воздухот и управувањето со отпад рече Петров и додаде дека се потребни поголеми инвестиции во животната средина за да им помогнеме на граѓаните да ги реновираат своите домови со што би трошеле помалку енергија, за да ја поддржиме индустријата да биде лидер во зелената економија, да имаме поефтини и поздрави форми на јавен превоз и алтернативен транспорт, да произведуваме енергија која нема да влијае на климатските промени. 

Петров најави дека целта е до крајот на 2025 година минимум 60% од тежината на отпадот од пакувањето што е создаден на територијата на Македонија да се преработи или да се употреби за добивање енергија, а до крајот на 2025 година минимум 55%, а максимум 80% од тежината на отпадот од пакувањето што е создаден и собран на територијата на  Македонија да се рециклира.

Прашањето со загадувањето е според мене една од најважните теми за што е потребно да се седне на заедничка маса за изнаоѓање на решение" заклучи потпретседателот Коста Петров,се наведува во соопштението на СДСМ. 

Путин: Русија мора да остане силна претседателска република

Претседателот на Русија, Владимир Путин, беше запрашан за можен период на транзиција по завршувањето на мандатот по четири години ,а тој рече дека верува оти Русија мора да остане силна претседателска република.

Тој ова го рече денеска на телевизиска средба со студентите во Сочи.

Минатата недела Путин, кој според Уставот веќе не може да се кандидира за претседател, предложи уставни измени кои му даваат неколку опции за да ја задржи власта по истекот на неговиот мандат.

Меѓу нив е намалување на овластувањата на претседателот и засилување на премиерот, што предизвика шпекулации дека Путин може да се врати на позицијата што ја имаше од 2008 до 2012 година.

„Нашата земја, очигледно, мора да биде силна претседателска република. Тоа е првото нешто. Имаме толку многу етнички групи, националности, стилови на живот, што е практично невозможно да се интегрираат во парламентарна република“, рече Путин, сосема оддалечувајќи се од изјавите од минатата недела.

На прашањето дали Русија треба да се подготви за специфичен период на транзиција, како што стори Сингапур, Путин рече дека тоа не одговара на неговата земја.

Ли Куан Ју, основачот на современиот Сингапур, станал министер-ментор или еден вид советник по пензионирањето за да овозможи стабилност на власта.

„Тој беше извонреден човек. Тоа е точно. Тој беше, како што знам, 30 години на власт и ја основа државата, тоа е вистина. Сакате јас да бидам министер-ментор?"  праша Путин.

„Вашиот предлог ќе се спротивстави на институцијата претседател. Мислам дека не може да се примени за земја како Русија“, рече Путин, кој како претседател и премиер веќе дваесет години доминира во руската политика.

СЗО утре ќе реши дали да прогласи вонредна состојба поради смртоносниот вирус

Светската здравствена организација (СЗО) објави дека утре ќе донесе одлука дали да прогласи глобална вонредна состојба поради појавата на новиот коронавирус кој се шири од Кина.

Ако тоа се случи, ќе биде шести пат да се прогласи меѓународна вонредна состојба  во последната деценија, објави Ројтерс.

Бројот на загинати од новиот коронавирус во Кина се зголеми на 19, додека бројот на заболени се искачи на 540, соопштија денеска официјалните лица.

Изворот на вирусот се верува дека е сличен на грипот од животинско потекло , а Светската здравствена организација се состана денеска за да одлучи дали појавата на болеста е светска здравствена криза, пренесува CNBC.

Кинескиот град Вухан, каде се евидентирани првите случаи на новиот корона вирус , ќе ги затвори сите сообраќајни и транспортни мрежи, а на граѓаните им било советувано да не го напуштат градот, јавуваат денеска државните медиуми.

Автобускиот, подземниот, фериботскиот и меѓуградскиот сообраќај ќе биде суспендиран , а аеродромот и железничката станица ќе бидат затворени за сите патници од утре, 23 јануари, со почеток во 10 часот по локално време.

притисни ентер