Нов педијатриски ургентен центар за спас на детски животи треба да се изгради на Клиниката за детски болести. Секоја секунда е важна за дете на кое му треба итна помош. Во клиниката дневно се прегледуваат и до 50 деца. Условите за хоспитализирање на итните случаи се под стандардите. Во новиот простор ќе може да им се помогне и на десет деца во ист момент.
„Досега навистина беше проблемот да им се помогне на итните случаи со добра нега во добри услови“, вели д-р. Аспазија Софијанова, директор на Клиниката за детски болести.
Со националната донаторска кампања под покровителство на првата дама Маја Иванова почнува иницијатива за собирање на 55 илјади евра за реновирање и адаптирање на просторот.
„За секој родител е важен животот и здравјето на своето дете. За нас овде се важни сите детски животи. Да направиме оваа кампања да им помогне на сите“, објасни Маја Иванова, сопруга на претседателот на Република Македонија
Средствата треба да се соберат на донаторски коктел на ВИП личности. Партнерите во кампањата се Мери Џ. Волерс, сопруга на американскиот амбасадор, Клеј Батемер, од невладината „Линка Крос“, Мариет Шуман, амбасадор на Кралство Холандија и маркетинг агенцијата „Њу момент“. Да не заборавиме дека сме луѓе секој може да донира на бројот 14321 и да се откаже од едно не испиено кафе.